কেন্দ্ৰীয় চৰকাৰৰ ৰোষত এইবাৰ ওলা-উবেৰ। বিভিন্ন ধৰণৰ ফোনত একে দূৰত্বৰ বাবে ভিন্ন ভাড়া দেখুৱাইছে বুলি অভিযোগৰ উত্তৰ বিচৰা হৈছে। বৃহস্পতিবাৰে গ্ৰাহক পৰিক্ৰমা মন্ত্ৰালয়ৰ অধীনস্থ কেন্দ্ৰীয় গ্ৰাহক সুৰক্ষা কৰ্তৃপক্ষই এপ কেব কোম্পানী ওলা আৰু উবেৰৰ পৰা উত্তৰ বিচাৰি জাননী জাৰি কৰিছে।
গ্ৰাহকৰ পৰা ইটোৰ পিছত সিটো অভিযোগ পোৱাৰ পিছত কেন্দ্ৰই কোম্পানী দুটাক কাৰণ দৰ্শাবলৈ কৈছে। গ্ৰাহকে অভিযোগ কৰে যে ওলা আৰু উবেৰৰ কেব বুকিং কৰাৰ সময়ত তেওঁলোকৰ বেলেগ বেলেগ ফোনত একে দূৰত্বৰ বাবে বেলেগ বেলেগ ভাড়া দেখা যায়। আনকি দুটা কোম্পানী বা আন কোম্পানীৰ ভাড়াৰ ক্ষেত্ৰতো অমিল দেখা যায়।
কেন্দ্ৰীয় মন্ত্ৰী প্ৰহ্লাদ যোশীয়ে আজি এক সাক্ষাৎকাৰত কয় যে ওলা-উবেৰে বিভিন্ন আইফোন আৰু এণ্ড্ৰইড মডেলত ভিন্ন ভাড়া দেখুৱাইছে। আমি এই কথা আগতেও লক্ষ্য কৰিছো, গতিকে ফলস্বৰূপে গ্ৰাহক সুৰক্ষাৰ কাৰণে আমি সেই দুটা কোম্পানীক তেওঁলোকৰ উত্তৰ বিচাৰি জাননী জাৰি কৰিছো।
যোৱা ডিচেম্বৰ মাহত টাইমছ অৱ ইণ্ডিয়াই এক অনুসন্ধানমূলক প্ৰতিবেদনত দেখুৱাইছিল যে একে দূৰত্বৰ বাবে এণ্ড্ৰইড ফোনত দেখুওৱা ভাড়া আইফোনত বুকিং কৰাৰ সময়ত বেছি। লগতে বিভিন্ন কোম্পানীৰ এপ কেবসমূহে একেটা গন্তব্যস্থান থাকিলেও বিভিন্ন ভাড়া অফৰা কৰে।
বিশেষজ্ঞসকলৰ মতে, এই এপটোৱে কোম্পানীসমূহৰ হাৰ্ডৱেৰ ডাটা চতুৰতাৰে ব্যৱহাৰ কৰি এই কাম কৰিছে। নতুন ফোনত যেতিয়াই এপটো ডাউনলোড হয় তেতিয়াই এই কৌশল ব্যৱহাৰ কৰা হয়।
মন্ত্ৰী যোশীয়ে যোৱা মাহতে কোম্পানীসমূহক সকীয়াই দিছিল যে গ্ৰাহকৰ সৈতে কৰা এই ছলনা সহ্য কৰা নহ’ব। তেওঁ চিচিপিএক পুংখানুপুংখ আৰু বিশদ তদন্ত কৰিবলৈ নিৰ্দেশ দিছিল। এয়া এক অসাধু ব্যৱসায়িক কৌশল বুলি মন্তব্য কৰে বিজেপি নেতাগৰাকীয়ে।
