ৰাজপথত ভিক্ষা খুজি গ্ৰেপ্তাৰ হ’ল এজন যুৱক। এইবাৰ প্ৰথম মধ্যপ্ৰদেশত ভিক্ষা প্ৰতিৰোধী আইন প্ৰয়োগ কৰা হৈছে। এই আইনখন ১৯৭৩ চনৰ পৰা ৰাজ্যখনত প্ৰযোজ্য হৈ আছে। শেহতীয়াকৈ এজন ব্যক্তিয়ে যুৱকজনৰ বিৰুদ্ধে আৰক্ষী থানাত এজাহাৰ দাখিল কৰে। সেই অভিযোগৰ ভিত্তিতে আৰক্ষীয়ে ব্যৱস্থা গ্ৰহণ কৰিছে।
মধ্যপ্ৰদেশ আৰক্ষীৰ উপ আয়ুক্ত (জ’ন ২) সঞ্জয় আগৰৱালাই সাংসদ নগৰ আৰক্ষী থানা এলেকাত এজন ভিক্ষাৰীৰ বিৰুদ্ধে এজাহাৰ দাখিল কৰা বুলি জানিবলৈ দিয়ে। ভোপালৰ ব’ৰ্ড অফিচৰ চিগনেলত ৰখাই থোৱা গাড়ীত তেওঁ ভিক্ষা বিচাৰিছিল।
অভিযোগকাৰীয়ে জনায় যে যুৱকজনে ভিক্ষা খুজিবলৈ অহাৰ সময়ত তেওঁক ভিক্ষা কৰাৰ কাৰণ সুধিছিল। তেওঁ আন কাম কৰি টকা উপাৰ্জন কৰিবলৈও পৰামৰ্শও দিয়ে। কিন্তু ডেকা ভিক্ষাৰীজনে কয় যে তেওঁ আন কোনো কাম কৰিব নোৱাৰে। ভিক্ষা খুজিয়ে নিজৰ পোহপাল দিয়ে। যুৱকজনৰ বক্তব্য শুনাৰ পিছতে ব্যক্তিজনে থানাত তেওঁৰ বিৰুদ্ধে এজাহাৰ দাখিল কৰে।
অভিযোগ লাভ কৰাৰ লগে লগে আৰক্ষীয়ে মধ্যপ্ৰদেশ ভিক্ষা প্ৰতিৰোধ আইনৰ অধীনত গোচৰ ৰুজু কৰে। সেই বিশেষ ট্ৰেফিক চিগনেলৰ সন্মুখতে গ্ৰেপ্তাৰ কৰা হৈছে যুৱকজনক। আৰক্ষী উপ আয়ুক্তগৰাকীয়ে কয় যে ভিক্ষা ৰোধৰ ক্ষেত্ৰত আৰক্ষী সক্ৰিয় হৈ আছে। বহু সময়ত ট্ৰেফিক লাইটত ৰখাই থোৱা গাড়ীৰ সন্মুখত এনে একাংশ লোকে হাত পাতি থকাৰ অভিযোগ পোৱা যায় যিসকলক দৰাচলতে ‘ভিক্ষাৰীৰ দৰে দেখা নাযায়’। এনে অভিযোগৰ বিৰুদ্ধে আৰক্ষীয়ে ব্যৱস্থা গ্ৰহণ কৰিবলৈ আৰম্ভ কৰিছে।
১৯৭৩ চনত মধ্যপ্ৰদেশত ভিক্ষা প্ৰতিৰোধ আইন প্ৰৱৰ্তন কৰা হয়। ইয়াত উল্লেখ আছে যে যদি কোনো ব্যক্তিক ভিক্ষা কৰি থকা দেখা পোৱা যায়, তেওঁক গ্ৰেপ্তাৰ কৰি উপযুক্ত কামৰ প্ৰশিক্ষণ দিব লাগিব, আৰু তেওঁৰ লগতে তেওঁৰ ওপৰত নিৰ্ভৰশীল লোকসকলৰ বাবে কৰ্মসংস্থাপনৰ ব্যৱস্থা কৰি দিয়া হ’ব।
