আজাৰাস্থিত গিৰিজানন্দ চৌধুৰী বিশ্ববিদ্যালয়ৰ ছাত্ৰ ছাত্ৰীয়ে ২৭ জানুৱাৰী ২০২৫ৰ পৰা ৩১ জানুৱাৰীলৈ ত্ৰিপুৰাৰ আই চি এফ এ আই বিশ্ববিদ্যালয়ত ভাৰতীয় বিশ্ববিদ্যালয় সংস্থাৰ উদ্যোগত অনুষ্ঠিত হোৱা উত্তৰ পূব মণ্ডল আন্তঃবিশ্ববিদ্যালয় যুৱ মহোৎসৱত ব্যতিক্ৰমী প্ৰতিভা আৰু দক্ষতা প্ৰদৰ্শন কৰি তিনিটাকৈ স্বৰ্ণ পদক লাভ কৰিবলৈ সক্ষম হৈছে l
উল্লেখযোগ্য যে এই যুৱ মহোৎসৱত সমগ্ৰ উত্তৰ-পূব ভাৰতৰ মুঠ ২২খন বিশ্ববিদ্যালয় আৰু ৮০০ৰো অধিক ছাত্ৰ-ছাত্ৰীয়ে অংশগ্ৰহণ কৰে। ২৪ জন সদস্যৰে গঠিত গিৰিজানন্দ চৌধুৰী বিশ্ববিদ্যালয়ৰ দলটোৰ নেতৃত্বত আছিল ছাত্ৰ পৰিক্ৰমা বিভাগৰ ডীন ড০ মৈত্ৰী শৰ্মা আৰু দলৰ পৰিচালক অঞ্জন ডেকা।
বিজয়ীসকলৰ ভিতৰত চাৰ্লিন মহলিয়াই পশ্চিমীয়া গীত (একক)ত স্বৰ্ণ পদক লাভ কৰে। পশ্চিমীয়া দলীয় গীতৰ শাখাত আৰ্জু মাহচিন আলী, অয়ন চিলা ওজা, চাৰ্লিন মহলিয়া, ল্যান্সি এম মাৰাক, শিৱ মল, সুৰজিত দাস, চফিকুল হুছেইন আৰু নিশান্ত হৃদয় ডেকাৰে গঠিত দলটোৱে শীৰ্ষ পুৰস্কাৰ লাভ কৰে।
মিমিক্ৰিত অয়ন চিলা ওজাই স্বৰ্ণ পদক লাভ কৰাৰ উপৰিও গিৰিজানন্দ চৌধুৰী বিশ্ববিদ্যালয় (তেজপুৰ)ৰ ভবজিৎ সন্দিকৈয়ে ক্লাছিকেল ইনষ্ট্ৰুমেণ্টেল (পাৰ্কাচন) শাখাত পঞ্চম স্থান দখল কৰিবলৈ সক্ষম হয়।
আগন্তুক ২০২৫ চনৰ ৩ মাৰ্চৰ পৰা ৭ মাৰ্চলৈ উত্তৰ প্ৰদেশৰ এমিটি বিশ্ববিদ্যালয়ত অনুষ্ঠিত হ’বলগীয়া ৰাষ্ট্ৰীয় যুৱ মহোৎসৱত স্বৰ্ণ পদক বিজয়ীসকলে নিজ নিজ শাখাত উত্তৰ-পূব মণ্ডলক প্ৰতিনিধিত্ব কৰিব।
১৯৮৫ চনৰ পৰা ভাৰতীয় বিশ্ববিদ্যালয় সংস্থাই প্ৰতি বছৰে আয়োজন কৰা আন্তঃবিশ্ববিদ্যালয় যুৱ মহোৎসৱ (ইউনিফেষ্ট)ত তেওঁলোকৰ সদস্য বিশ্ববিদ্যালয়ৰ লগতে আৰু দেশৰ প্ৰায় ৪৫,০০০ সংযুক্ত মহাবিদ্যালয়ৰ প্ৰতিভাৱান যুৱ শিল্পীয়ে অংশগ্ৰহণ কৰে। এই বছৰ অনুষ্ঠিত হোৱা এই মহোৎসৱত গিৰিজানন্দ চৌধুৰী বিশ্ববিদ্যালয়ৰ ছাত্ৰ ছাত্ৰীৰ এই সাফল্যই বিশ্ববিদ্যালয়খনলৈ গৌৰৱৰ বাৰ্তা কঢ়িয়াই আনিছে l
