মঙলবাৰে সংসদত কেন্দ্ৰীয় বিত্তমন্ত্ৰী নিৰ্মলা সীতাৰমণে পশ্চিম বংগৰ তৃণমূল কংগ্ৰেছ চৰকাৰক তীব্ৰ সমালোচনা কৰে। লোকসভাত বাজেট বিতৰ্কৰ উত্তৰ দি আজি সীতাৰমণে কয়, “তৃণমূল এতিয়া শোষণৰ প্ৰতিশব্দ। দলটোৱে দুৰ্নীতিক প্ৰতিষ্ঠানিকৰণ কৰিছে।”
লগতে সীতাৰমণে পশ্চিমবংগত ১০০ দিনীয়া কাম আৰু প্ৰধানমন্ত্ৰী আৱাস যোজনাত ব্যাপক দুৰ্নীতি সংঘটিত হোৱাৰ অভিযোগ উত্থাপন কৰে। তেওঁৰ দাবী, “সাধাৰণ মানুহৰ ধন লুট কৰি তৃণমূলৰ নেতাসকল ধনী হৈছে।”
লোকসভাত সীতাৰমণে এই বক্তব্য দিয়াৰ সময়ত তৃণমূলৰ সাংসদসকলে থিয় হৈ তীব্ৰ প্ৰতিবাদ সাব্যস্ত কৰে। পিছত সংসদৰ বাহিৰত তৃণমূলৰ মুখ্য সংগঠক কল্যাণ বেনাৰ্জীয়ে কয় যে মোডী চৰকাৰে সামাজিক খণ্ডত ৰাজ্যসমূহৰ ধনৰ আবণ্টন হ্ৰাস কৰিছে।
ইয়াৰ পূৰ্বে সীতাৰমণে ঠাট্টা-মস্কৰা কৰি কৈছিল যে যি দলে নিজৰ নামত ‘তৃণমূল’ শব্দটো কঢ়িয়াই লৈ ফুৰে, সেই দল এতিয়া তৃণমূলৰ মানুহৰ শত্ৰু হৈ পৰিছে। এই দলটো এতিয়া সাধাৰণ মানুহৰ অধিকাৰ কাঢ়ি লোৱাৰ প্ৰতীক বুলিও কয়।
বাজেট বিতৰ্কৰ প্ৰতিক্ৰিয়া প্ৰকাশ কৰি কেন্দ্ৰীয় বিত্তমন্ত্ৰীয়ে দাবী কৰিছে যে কেন্দ্ৰই তৃণমূল কংগ্ৰেছৰ বিৰুদ্ধে আৰ্থিক অৱৰোধৰ অভিযোগ একেবাৰে সত্য নহয়। বাস্তৱ আৰু সত্যটো হ’ল পশ্চিমবংগত কেন্দ্ৰীয় প্ৰকল্প ৰূপায়ণৰ ক্ষেত্ৰত ব্যাপক দুৰ্নীতি সংঘটিত হৈছে।
তেওঁ কয় যে ২০১৬-১৭ বৰ্ষৰ পৰা প্ৰধানমন্ত্ৰী আৱাস যোজনাৰ বাবে কেন্দ্ৰই মুঠ ২৫,৭৯৮ কোটি টকা আবণ্টন দিছে।
সীতাৰমণে লগতে কয়, “ৰাজ্যত ২৫ লাখ ভুৱা জব কাৰ্ড পোৱা গৈছে। এই ধন আচলতে তৃণমূলৰ নেতা আৰু কৰ্মীৰ পকেটলৈ গৈছে।”
কেন্দ্ৰীয় গ্ৰামোন্নয়ন মন্ত্ৰালয়ে পশ্চিম বংগ চৰকাৰৰ পৰা সন্তোষজনক ব্যাখ্যা বিচাৰিছে যদিও কোনো স্পষ্ট উত্তৰ পোৱা নাই বুলিও তেওঁ কয়।
দুৰ্নীতিৰ অধিক উদাহৰণ দি সীতাৰমণে কয়, “কেৱল মধ্যাহ্ন ভোজন আঁচনিতে ১০০ কোটি টকাৰ দুৰ্নীতি হৈছে।”
অৰ্থনৈতিক পৰিসংখ্যাৰ উদ্ধৃতি দি নিৰ্মলা সীতাৰমণে আৰু দাবী কৰে যে ৰাজ্যত কোনো উদ্যোগ নাই, কৰ্মসংস্থাপন নাই, বিনিয়োগ নাই। তেওঁৰ মতে, ২০১০ চনত পশ্চিম বংগত মূলধন গঠনৰ হাৰ ৬.৭% আছিল যদিও এতিয়া ২.৯% লৈ নামি আহিছে। ফলত ৰাজ্যখনৰ অৰ্থনৈতিক বিকাশৰ হাৰ ৰাষ্ট্ৰীয় গড়তকৈ পিছ পৰি আছে।
এসময়ত ভাৰতৰ ঔদ্যোগিক কেন্দ্ৰ হিচাপে পৰিচিত পশ্চিম বংগত বৰ্তমান ঔদ্যোগিক উৎপাদনত মাত্ৰ ৩.৫%হে অংশগ্ৰহণ আছে, যিটো ১৯৪৭ চনত ২৪% আছিল।
