অৱশেষত হাৰিয়ানাৰ ৰোহটকস্থিত ইণ্ডিয়ান ইনষ্টিটিউট অৱ মেনেজমেণ্টৰ সঞ্চালক ধীৰাজ শৰ্মাৰ বিৰুদ্ধে ব্যৱস্থা গ্ৰহণ কৰিছে কেন্দ্ৰই। তেওঁৰ বিৰুদ্ধে উত্থাপিত অভিযোগৰ প্ৰাৰম্ভিক তদন্ত কৰিবলৈ দেশৰ শিক্ষা মন্ত্ৰালয়ে ৰাষ্ট্ৰপতি দ্ৰৌপদী মুৰ্মুৰ পৰা অনুমতি বিচাৰিছে । ৰাষ্ট্ৰপতিৰ অনুমতি পালেই ধীৰাজ শৰ্মাৰ বিৰুদ্ধে প্ৰাথমিক তদন্ত আৰম্ভ হ’ব বুলি ধাৰণা কৰা হৈছে।
ইনষ্টিটিউট অৱ মেনেজমেণ্টৰ (আই আই এম) সঞ্চালক হ’বলৈ হ’লে প্ৰথম শ্ৰেণীৰ স্নাতক ডিগ্ৰীৰ প্ৰয়োজন হয়। অভিযোগ অনুসৰি, সেই ডিগ্ৰী নথকা সত্ত্বেও ধীৰাজ শৰ্মা আই আই এমৰ সঞ্চালক হৈছিল। কেন্দ্রীয় চৰকাৰে তেওঁক কেনেদৰে নিযুক্তি দিলে সেই প্রশ্নৰ উত্তৰ বিচৰাৰ সময়ত প্রধানমন্ত্রীৰ কার্যালয়ৰ ভূমিকাক লৈও প্রশ্ন উত্থাপন হয়৷
উল্লেখ্য যে ২০২৩ চনৰ আগষ্ট মাহত চৰকাৰে ভাৰতীয় ব্যৱস্থাপনা প্ৰতিষ্ঠান আইন, ২০১৭ সংশোধন কৰিছিল। ৰাষ্ট্ৰপতিগৰাকীক তাত আই আই এমৰ ভিজিটৰ কৰা হয়। ৰাষ্ট্ৰপতিয়ে আই আই এমত গুৰুত্বপূৰ্ণ নিযুক্তি, অডিট আৰম্ভ কৰা আৰু তদন্ত প্ৰক্ৰিয়া আৰম্ভ কৰাৰ ক্ষমতা লাভ কৰে।
আই আই এমৰ দৰে শিক্ষানুষ্ঠানৰ সঞ্চালক নিযুক্তিৰ অনিয়মৰ বাতৰি বিয়পি পৰাৰ লগে লগে দেশৰ শিক্ষা সমাজত হুলস্থুলৰ সৃষ্টি হয়। কলকাতাৰ এজন বাসিন্দাই তথ্যৰ অধিকাৰ আইনৰ অধীনত আই আই এম ৰোহটকৰ কাষ চাপিছিল, সঞ্চালক সন্দৰ্ভত শিক্ষানুষ্ঠানৰ পৰা পোনপটীয়াকৈ তেওঁৰ শিক্ষাগত অৰ্হতাৰ প্ৰমাণ বিচাৰিছিল।
পঞ্জাৱ আৰু হাৰিয়ানা উচ্চ ন্যায়ালয়ত দাখিল কৰা গোচৰটোত কেন্দ্ৰীয় চৰকাৰে পূৰ্বে উল্লেখ কৰিছিল যে ধীৰাজ শৰ্মা দ্বিতীয় শ্ৰেণীৰ স্নাতক। ২০১৭ চনত এজন সঞ্চালক নিযুক্তিৰ বিজ্ঞাপনত নূন্যতম অৰ্হতা হিচাপে প্ৰথম শ্ৰেণীৰ স্নাতক বিচৰা হৈছিল। তাৰ পিছত কেনেকৈ ধীৰাজৰ নিযুক্তি হ’ল? সেইটোৰ তদন্ত কৰা হ’ব। প্ৰধানমন্ত্ৰীৰ নেতৃত্বত মন্ত্ৰীসভাৰ নিযুক্তি সমিতিয়ে আই আই এমকে ধৰি দেশৰ ২০টা শীৰ্ষ চৰকাৰী মেনেজমেন্ট শিক্ষানুষ্ঠানৰ সঞ্চালক নিযুক্তিৰ বাবে অনুমোদন জনায়।
