মিজোৰামত ভয়াৱহৰূপ লৈছে এইচ আই ভিয়ে৷ ভাৰতৰ ভিতৰত মিজোৰামত সৰ্বাধিক এইচ আই ভিৰ প্ৰাদুৰ্ভাৱৰ হাৰ ২.৭৩% পোৱা গৈছে, যিটো দেশৰ গড় হিচাপত ০.২% অতিক্ৰম কৰিছে। জৰুৰী ব্যৱস্থা গ্ৰহণৰ প্ৰয়োজনীয়তাৰ বাবে সোমবাৰে ৰাজ্যখনৰ স্বাস্থ্যমন্ত্ৰী লালৰিণপুইয়ে এই পৰিস্থিতিক লৈ উদ্বেগ প্ৰকাশ কৰি মহামাৰীৰ বিৰুদ্ধে যুঁজিবলৈ অধিক শক্তিশালী ব্যৱস্থা গ্ৰহণ কৰিবলৈ সাংসদসকলক আহ্বান জনায়৷
উল্লেখ্য যে আইজল আই এণ্ড পি আৰ কনফাৰেন্স হলত মিজোৰাম ৰাজ্যিক এইডছ কণ্ট্ৰল ছ’চাইটিৰ চমুকৈ এম এছ এ চি এছৰ প্ৰকল্প সঞ্চালক ডাঃ জেন আৰ ৰালটে ৰাজ্যখনৰ এইচ আই ভি পৰিস্থিতিৰ বিষয়ে এক বিস্তৃত বিবৰণ দাঙি ধৰে।
ডাঃ ৰালটে প্ৰকাশ কৰা তথ্য অনুসৰি ২০২৫ চনৰ জানুৱাৰী মাহলৈকে মিজোৰামত ৩২,২৮৭ জন ব্যক্তিৰ এইচ আই ভি পজিটিভ পোৱা গৈছে, ৫,৫১১ জনৰ মৃত্যু হোৱাৰ বাতৰি পোৱা গৈছে। ২০২৪ চনৰ এপ্ৰিলৰ পৰা ২০২৫ চনৰ জানুৱাৰী মাহৰ সমছোৱাতে ১,৭৬৯ জন এইচ আই ভিত আক্ৰান্ত হোৱা বুলি প্ৰকাশ কৰে। অসুৰক্ষিত যৌন কাৰ্য্যকলাপত লিপ্ত হোৱাৰ বাবে নতুন কৈ ৬৭% লোক এইচ আই ভিত সমক্ৰমিত হোৱাৰ লগতে ৩০.৪৪% লোক অবীজাণুমুক্ত চিৰিঞ্জৰ ব্যৱহাৰৰ কৰা বাবে সংক্ৰমিত হোৱ বুলি ডাঃ ৰাল্টেই আলোকপাত কৰে৷
এই ভয়াৱহতাৰ মাজতে ডাঃ ৰাল্টেই মিজোৰামত এইচ আই ভি সংক্ৰমণ হ্ৰাস পাইছে আৰু এইচ আই ভিত আক্ৰান্তৰ মৃত্যুৰ হাৰ লক্ষণীয়ভাৱে হ্ৰাস পাইছে বুলি উল্লেখ কৰে। উল্লেযোগ্য যে এইচ আই ভিৰ বিৰুদ্ধে যুঁজখন শক্তিশালী কৰিবৰ বাবে বিধায়কসকলে ২০২৪-২৫ চনৰ বাবে তেওঁলোকৰ বিধায়কৰ পুঁজিৰ পৰা ৫০ হাজাৰ টকাকৈ আবণ্টন দিবলৈ সন্মতি প্ৰকাশ কৰিছে। এইচ আই ভি পজিটিভ ব্যক্তিৰ বাবে এ আৰ টি চিকিৎসাৰ সুবিধা নিশ্চিত কৰিব পৰা যায় তালৈ লক্ষ্য ৰাখি এই ধনৰাশি এম এছ এ চি এছলৈ প্ৰেৰণ কৰা হ’ব বুলি সদৰী কৰে৷
