দুদিনীয়া মৰিচাছ ভ্ৰমণত প্ৰধানমন্ত্ৰী নৰেন্দ্ৰ মোদী। ভ্ৰমণৰ প্ৰথম দিনা মঙলবাৰে তেওঁ মৰিচাছৰ ৰাষ্ট্ৰপতি আৰু প্ৰধানমন্ত্ৰীৰ সৈতে সাক্ষাৎ কৰে। এই ভ্ৰমণৰ সময়তে মৰিচাছৰ প্ৰধানমন্ত্ৰীয়ে দেশৰ সৰ্বোচ্চ অসামৰিক সন্মান ‘দ্য গ্ৰেণ্ড কমাণ্ডাৰ অৱ দ্য অৰ্ডাৰ অৱ দ্য ষ্টাৰ এণ্ড কী অৱ দ্য ইণ্ডিয়ান অ’চেন’ প্ৰধানমন্ত্ৰী মোদীক প্ৰদান কৰা কঠা ঘোষণা কৰে। এই সন্মান লাভ কৰা মোদী হৈছে প্ৰথমজন ভাৰতীয় প্ৰধানমন্ত্ৰী।
এই সন্মান লাভ কৰি প্ৰধানমন্ত্ৰী মোদীয়ে এই সন্মান গ্ৰহণ কৰি কয় এইটো কেৱল মোৰ বাবে নহয়, সেই সকলো ভাৰতীয়ৰ বাবে এক গৌৰৱ, যিসকলে যুগৰ পৰম্পৰা অনুসৰি পৃথিৱীৰ সেৱা কৰি আহিছে।
উল্লেখ্য যে এইটো প্ৰধানমন্ত্ৰীৰ ২০১৫ৰ পিছৰ দ্বিতীয় মৰিচাছ ভ্ৰমণ। এইবাৰ তেওঁ মৰিচাছৰ ৰাষ্ট্ৰীয় দিৱস উদযাপন উপলক্ষে মুখ্য অতিথি হিচাপে অংশগ্ৰহণ কৰিছে। এই পদক্ষেপে দুয়োখন দেশৰ মাজৰ সম্পৰ্ক অধিক সুদৃঢ় কৰিব বুলি আশা কৰা হৈছে।
প্ৰংসগক্ৰমে মৰিচাছৰ প্ৰায় ৭০% জনসংখ্যাই ভাৰতীয় মূলৰ। এই ঐতিহাসিক সম্পৰ্কই দুয়োখন দেশৰ মাজত গভীৰ সাংস্কৃতিক আৰু সামাজিক বন্ধন গঢ়ি তুলিছে। ১২ মাৰ্চত মৰিচাছৰ ৰাষ্ট্ৰীয় দিৱস পালন কৰা হয়, যি ভাৰতৰ বাবে বিশেষ তাৎপর্যপূর্ণ। কাৰণ ১৯০১ চনত মহাত্মা গান্ধী দক্ষিণ আফ্ৰিকাৰ পৰা ভাৰতলৈ উভতি অহাৰ সময়ত মৰিচাছত অৱস্থান কৰিছিল। তাত তেওঁ প্ৰবাসী ভাৰতীয় শ্ৰমিকসকলক শিক্ষা, ৰাজনৈতিক সচেতনতা আৰু ভাৰতৰ সৈতে সংযুক্ত হৈ থকাৰ প্ৰেৰণা প্ৰদান কৰিছিল। তাৰ স্মৃতিত মৰিচাছে এই দিনটোত ৰাষ্ট্ৰীয় দিৱস উদযাপন কৰি আহিছে।
