পাকিস্তানে ভাৰতক নিজ সীমান্তৰ ভিতৰত সন্ত্ৰাসবাদী কাৰ্যকলাপত জড়িত হোৱা বুলগ অভিযোগ উত্থাপন কৰিছে। জাফৰ এক্সপ্ৰেছৰ ওপৰত হোৱা আক্ৰমণৰ কথা উল্লেখ কৰি কঠোৰ ভাষাৰে প্ৰকাশ কৰা এক বিবৃতিত বৈদেশিক কাৰ্যালয়ৰ মুখপাত্ৰ শ্বফকাত আলী খানে ভাৰতক আক্ৰমণৰ সৈতে জড়িত বুলি অভিযোগ উত্থাপন কৰাৰ লগতে আফগানিস্তানৰ নেতাসকলৰ সৈতে যোগাযোগ ৰাখিছিল বুলিও দাবী উত্থাপন কৰিছে।।
ইয়াৰ প্ৰত্যুত্তৰত, ভাৰতৰ বিদেশ মন্ত্ৰণালয়ৰ মুখ্য প্ৰবক্তা ৰণধীৰ জয়ছৱালে পাকিস্তানৰ অভিযোগ নাকচ কৰি কয় যে এই অভিযোগ ভিত্তিহীন। লগতে কয় বিশ্বই জানে গোলকীয় সন্ত্ৰাসবাদৰ কেন্দ্ৰবিন্দু ক’ত। পাকিস্তানে অনাৰ উপৰত অভিযোগ কৰাৰ সলনি নিজৰ সমস্যাবোৰ সমাধানৰ ওপৰত গুৰুত্ব দিব লাগে বুলি উল্লেখ কৰে।
উল্লেখ্য যে পাকিস্তানৰ বালোচিস্তানত এখন ৰেলগাড়ীৰ ওপৰত সন্ত্ৰাসবাদীৰ আক্ৰমণত ২১ জন যাত্ৰী আৰু সেনা বাহিনীৰ ৪ জন সদস্য নিহত হোৱা বুলি জানিব পৰা গৈছে।নিষিদ্ধ সংগঠন বেলোচ লিবাৰেচন আৰ্মীয়ে (BLA) এই আক্ৰমণৰ দায়িত্ব স্বীকাৰ কৰিছে। ইয়াৰ পূৰ্বেও এই সংগঠনটো কেইবাটাও হিংসাত্মক ঘটনাৰ সৈতে জড়িত হৈ আহিছে।
অৱশ্যে সেনা বাহিনীয়ে এই অভিযানত ৩৩ জন বিদ্ৰোহীক হত্যা কৰে বুলি প্ৰকাশ কৰাৰ লগতে এই অভিযানত আন কোনো যাত্ৰী নিহত হোৱা নাই বুলি জানিবলৈ দিছে।
