ভাৰত চৰকাৰে ৰাজ্য চৰকাৰসমূহৰ সহযোগত বিভিন্ন আঁচনিৰ অধীনত সমগ্ৰ দেশতে ১১৬টা নতুন পৰ্যটনস্থলীৰ উন্নয়নত অনুমোদন জনাইছে৷ এই আঁচনিৰ বাবদ ভাৰত চৰকাৰে ৪,০৮৮ কোটি বিনিয়োগ কৰা কথা ঘোষণা কৰিছে।
ইয়াৰে বহনক্ষম আৰু দায়িত্বশীল পৰ্যটনৰ বাবে থিম ভিত্তিক চাৰ্কিটৰ ওপৰত গুৰুত্ব আৰোপ কৰা স্বদেশ দৰ্শন ২.০ আঁচনিৰ অধীনত ৩৪টা স্থান বিকাশ কৰা হ’ব। পৰ্যটনস্থলীসমূহক প্ৰচাৰ কৰাৰ লক্ষ্যৰে বিনিয়োগৰ বাবে ৰাজ্যসমূহক বিশেষ সহায় (SASCI) আঁচনিৰ অধীনত ৪০টা স্থান বিকাশ কৰা হ’ব। ইয়াৰ উপৰিও স্বদেশ দৰ্শনৰ প্ৰত্যাহ্বান ভিত্তিক গন্তব্যস্থান উন্নয়ন (CBDD) উপ-আঁচনিৰ অধীনত ৪২ টা পৰ্যটন কেন্দ্ৰ নিৰ্বাচন কৰা হৈছে।
পৰ্যটন মন্ত্ৰালয়ে বহনক্ষম পৰ্যটন উন্নয়নৰ ওপৰত গুৰুত্ব প্ৰদানৰ লগতে দৰ্শনাৰ্থীৰ অভিজ্ঞতা উন্নত কৰাৰ বাবে পৰ্যটনস্থলীসমূহৰ সামগ্ৰিক উন্নয়ন সাধনৰ লক্ষ্যৰে সংশোধিত স্বদেশ দৰ্শন ২.০ আৰম্ভ কৰা হৈছে। স্বদেশ দৰ্শন আঁচনিৰ অধীনত পৰ্যটনৰ আন্তঃগাঁথনিৰ উন্নয়নৰ বাবে ৰাজ্যসমূহক আৰ্থিক সাহায্য প্ৰদান কৰা হ’ব৷
ইয়াৰ উপৰিও কেন্দ্ৰই SASCI আঁচনিৰ অধীনত ২৩খন ৰাজ্যৰ ৪০টা প্ৰকল্পত অনুমোদন জনাইছে, যাৰ বাবে ২০২৪-২৫ বিত্তীয় বৰ্ষত ৩,২৯৫.৭৬ কোটি টকাৰ আবণ্টন দিয়া হৈছে। এই পদক্ষেপে পৰ্যটন স্থলীসমূহৰ বিকাশ আৰু বিপণনত গুৰুত্ব আৰোপ কৰিছে।
তদুপৰি, প্ৰধানমন্ত্ৰী জনজাতি উন্নত গাঁও অভিযানৰ অংশ হিচাপে স্বদেশ দৰ্শন আঁচনিৰ অধীনত জনজাতীয় হোমষ্টেৰ উন্নয়নত সহায় কৰাৰ বাবে মন্ত্ৰালয়ে এক পদক্ষেপ গ্ৰহণ কৰিছে। ইয়াৰ ভিতৰত নতুন নিৰ্মাণৰ বাবে ৫ লাখ টকা পৰ্যন্ত আৰ্থিক সাহায্য, সংস্কাৰৰ বাবে ৩ লাখ আৰু সম্প্ৰদায়ৰ প্ৰয়োজনীয়তাৰ বাবে ৫ লাখ টকা পৰ্যন্ত আৰ্থিক সাহায্যৰে ১০০০টা হোমষ্টে নিৰ্মান কৰাৰ পৰিকল্পনা কৰিছে।
ইয়াৰ উপৰিও পৰ্যটন মন্ত্ৰালয়ে পৰ্যটন সেৱা প্ৰদানকাৰীসকলক প্ৰশিক্ষণ দিয়া আৰু স্থানীয় বিশেষজ্ঞতা বৃদ্ধিৰ বাবে নিয়োগমুখী হ্ৰস্বম্যাদী প্ৰশিক্ষণ কাৰ্যসূচীও আয়োজন কৰি আছে। ভাৰতৰ বিপুল পৰ্যটন সম্ভাৱনাৰ প্ৰতি লক্ষ্য কৰি সেৱা প্ৰদানৰ বাবে বিহাৰকে ধৰি সমগ্ৰ দেশৰ বিভিন্ন প্ৰতিষ্ঠানত এই কাৰ্যসূচীসমূহৰ আয়োজন কৰা হৈছে বুলি জানিব পৰা গৈছে।
