শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্টে (ৰাম মন্দিৰ ট্ৰাষ্ট) বিগত পাঁচ বছৰত চৰকাৰক প্ৰায় ৪০০ কোটি টকা কৰ আদায় দিয়া বুলি ট্ৰাষ্টৰ সম্পাদক চম্পট ৰাইয়ে জানিবলৈ দিয়ে। ধৰ্মীয় পৰ্যটন যথেষ্ট বৃদ্ধি পোৱাৰ মাজতে দেওবাৰে এই তথ্য প্ৰকাশ কৰা হৈছে। ৰাইয়ে কয় যে এই ধনৰাশি ২০২০ চনৰ ৫ ফেব্ৰুৱাৰীৰ পৰা ২০২৫ চনৰ ৫ ফেব্ৰুৱাৰীৰ ভিতৰত প্ৰদান কৰা হৈছে।
মুঠ ৪০০ কোটি টকাৰ ভিতৰত ২৭০ কোটি টকা সামগ্ৰী আৰু সেৱা কৰ (জি এছ টি) হিচাপে পৰিশোধ কৰা হৈছে, আৰু বাকী ১৩০ কোটি টকা আন বিভিন্ন কৰৰ অধীনত পৰিশোধ কৰা হৈছে বুলিও তেওঁ কয়। এই বৃহৎ কৰ পৰিশোধ অযোধ্যাত ৰাম মন্দিৰ নিৰ্মাণ আৰু তীৰ্থযাত্ৰীৰ আগমন বৃদ্ধিৰ সৈতে প্ৰত্যক্ষভাৱে সম্পৰ্কিত।
২০২০ চনত উচ্চতম ন্যায়ালয়ৰ ঐতিহাসিক ৰায়দানৰ পিছতে ৰাম মন্দিৰ নিৰ্মাণৰ বাবে শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্ট গঠন কৰা হয়। তেতিয়াৰ পৰাই অযোধ্যাৰ মন্দিৰ নিৰ্মাণৰ কাম দ্ৰুত গতিত আগবাঢ়িছে। ২০২৪ চনৰ ২২ জানুৱাৰীত প্ৰধানমন্ত্ৰী নৰেন্দ্ৰ মোডীৰ উপস্থিতিত ৰাম মন্দিৰৰ ভূমি পূজন সমাপ্ত হয়। এই ঘটনাৰ পিছৰে পৰা অযোধ্যালৈ তীৰ্থযাত্ৰীৰ সংখ্যা দ্ৰুতভাৱে বাঢ়িছে, যাৰ ফলত স্থানীয় অৰ্থনীতি আৰু ট্ৰাষ্টৰ আয়ত গভীৰ প্ৰভাৱ পৰিছে।
চম্পাট ৰাইয়ে কয় যে মন্দিৰ নিৰ্মাণত ব্যৱহৃত সামগ্ৰী, সেৱা আৰু অন্যান্য কাম-কাজৰ ক্ষেত্ৰত জি এছ টি প্ৰযোজ্য হৈ আহিছে। তদুপৰি ট্ৰাষ্টৰ বিভিন্ন আৰ্থিক লেনদেনতো অন্যান্য কৰ আদায় দিয়া হৈছে। তেওঁ কয় যে ‘’আমি চৰকাৰৰ নিয়ম মানি চলিছো আৰু যোৱা পাঁচ বছৰত ৪০০ কোটি টকা কৰ দিছো। ইয়াৰে ২৭০ কোটি জি এছ টিৰ অধীনত আৰু বাকী ১৩০ কোটি অন্য কৰৰ অধীনত আছে।”
ৰাম মন্দিৰ উদ্বোধনৰ পিছত অযোধ্যা ভাৰতৰ অন্যতম প্ৰধান তীৰ্থস্থান হিচাপে পৰিগণিত হৈছে। প্ৰতিদিনে ইয়ালৈ ৰামলালাৰ দৰ্শন কৰিবলৈ লাখ লাখ ভক্ত আহে। উত্তৰ প্ৰদেশ চৰকাৰৰ তথ্য অনুসৰি ২০২৪ চনত মন্দিৰ উদ্বোধন হোৱাৰ পিছত প্ৰথম বছৰতে ১০ কোটিতকৈ অধিক তীৰ্থযাত্ৰীয়ে অযোধ্যা ভ্ৰমণ কৰিছিল। এই বিশাল ভিৰৰ ফলত স্থানীয় ব্যৱসায়, হোটেল, পৰিবহণ আৰু অন্যান্য সেৱাৰ চাহিদা বৃদ্ধি পাইছে, যাৰ পৰা ট্ৰাষ্টেও আয় লাভ কৰে।
এই আয়ৰ এক বৃহৎ অংশ চান্দা হিচাপে আহে যদিও মন্দিৰ নিৰ্মাণ আৰু ৰক্ষণাবেক্ষণত হোৱা খৰচৰ ওপৰত জি এছ টি আৰোপ কৰা হৈছে। নিৰ্মাণত ব্যৱহাৰ কৰা শিল, চিমেণ্ট, তীখা, শ্ৰমিক সেৱাৰ ওপৰত কৰ দিব লাগিছিল। চম্পট ৰাইয়ে কয় যে ট্ৰাষ্টে স্বচ্ছভাৱে এই কৰ পৰিশোধ কৰিছে, যাৰ ফলত চৰকাৰৰ পুঁজি বৃদ্ধি পাইছে।
এই তথ্য প্ৰকাশ পোৱাৰ পিছতে বিজেপি নেতাসকলে ট্ৰাষ্টৰ স্বচ্ছতা আৰু জবাবদিহিতাৰ প্ৰশংসা কৰে। বিজেপিৰ এজন নেতাই কয়, “এইটোৱে প্ৰমাণ কৰে যে ৰাম মন্দিৰ ট্ৰাষ্টে কেৱল ধৰ্মীয় কামতেই নহয়, দেশৰ অৰ্থনীতিতো অৰিহণা যোগাইছে।”
অৱশ্যে এই বিষয়ত বিৰোধী দলসমূহে প্ৰশ্ন উত্থাপন কৰিছে। সমাজবাদী পাৰ্টিৰ এজন নেতাই কয়, “যদি ট্ৰাষ্টে ইমান কৰ দিছে, তেন্তে তেওঁলোকৰ আয় আৰু ব্যয়ৰ হিচাপ ৰাজহুৱা কৰিব লাগে। এয়া ৰাজহুৱা অনুদান, চৰকাৰৰ নহয়।”
ৰাম মন্দিৰৰ বাবে অযোধ্যাৰ অৰ্থনৈতিক বিকাশ উল্লেখযোগ্য। স্থানীয় ব্যৱসায়ীসকলে কয় যে তীৰ্থযাত্ৰী অহাৰ লগে লগে তেওঁলোকৰ আয় দুগুণ হৈছে। হোটেল, দোকান, পৰিবহণ ব্যৱস্থা নতুনকৈ গঢ়ি তোলা হৈছে। উত্তৰ প্ৰদেশ চৰকাৰে অযোধ্যাক আন্তঃৰাষ্ট্ৰীয় তীৰ্থস্থান হিচাপে গঢ়ি তুলিবলৈ বিমানবন্দৰ, ৰে’ল সংযোগ আৰু পথ উন্নয়নৰ ক্ষেত্ৰতো বিনিয়োগ কৰিছে। এই কৰ আদায় দি ট্ৰাষ্টে পৰোক্ষভাৱে এই বিকাশত অৰিহণা যোগাইছে।
এই খবৰ পাই অযোধ্যাৰ তীৰ্থযাত্ৰীসকলে মিশ্ৰিত প্ৰতিক্ৰিয়া প্ৰকাশ কৰিছে। এজন ভক্তই কয়, “আমি ৰামলালাৰ বাবে দান দিওঁ, কিন্তু ইমান টকা কৰ হিচাপে গৈ আছে বুলি জানি দুখ লাগে। আন এজনে কয়, ট্ৰাষ্টে চৰকাৰৰ লগত সহযোগিতা কৰাটো ভাল কথা। এই ধন দেশৰ সুবিধাৰ বাবে ব্যৱহাৰ কৰা হ’ব।”
