গুজৰাটৰ আৰ্হিত পোন প্ৰথমবাৰৰ বাবে অসমৰ চৰকাৰী বিদ্যালয় সমূহত ৰূপায়ণ কৰা গুণোৎসৱ আঁচনিখন সফল হোৱাৰ পাছত ৰাজ্য চৰকাৰৰ শিক্ষা বিভাগে পুনৰ অনুষ্ঠিত কৰিবলৈ ওলাইছে গুণোৎসৱ। চলিত বৰ্ষৰ অক্টোবৰ মাহত দুটা পৰ্যায়ত দ্বিতীয়বাৰৰ বাবে গুণোৎসৱ অনুষ্ঠিত হ’ব।
অসম সৰ্বশিক্ষা মিশ্যনে যোৱা ২৮ মে’ত এই সন্দৰ্ভত ৰাজ্যৰ প্ৰতিখন জিলাৰ বিদ্যালয়, পৰিদৰ্শক, জিলা প্ৰাথমিক শিক্ষা বিষয়া আৰু সৰ্বশিক্ষাৰ মিশ্যন সমন্বয়কসকলক দ্বিতীয় গুণোৎসৱৰ বিষয়ে অৱগত কৰোৱাৰ উদ্দেশ্যে পত্ৰ প্ৰেৰণ কৰে।
উল্লেখ্য যে দুটা পৰ্যায়ত অনুষ্ঠিত হ’বলগীয়া দ্বিতীয় গুণোৎসৱৰ প্ৰথম পৰ্যায়ত ১৭ খন জিলাত আৰু দ্বিতীয় পৰ্যায়ত ১৬ খন জিলাত অনুষ্ঠিত হ’ব।
৩ অক্টোবৰৰ পৰা ৬ অক্টোবৰলৈ অনুষ্ঠিত হ’বলগীয়া প্ৰথম পৰ্যায়ত বঙাইগাঁও, কাছাৰ, চিৰাং, চৰাইদেউ, ডিব্ৰুগড়, ডিমা হাছাও, হাইলাকান্দি, যোৰহাট, কামৰূপ (মেট্ৰ’), কাৰ্বি আংলং, কোকৰাঝাৰ, নলবাৰী, শিৱসাগৰ, শোণিতপুৰ, তিনিচুকীয়া, ওদালগুৰি আৰু পশ্চিম কাৰ্বি আঁলঙত গুণোৎসৱ অনুষ্ছিত হ’ব।
আনহাত ৩১ অক্টোবৰৰ পৰা ৩ নবেম্বৰলৈ দ্বিতীয় পৰ্যায়ত বাকসা, বৰপেটা, বিশ্বনাথ, দৰং, ধেমাজি, ধুবুৰী, গোৱালপাৰা, গোলাঘাট, হোজাই, কামৰূপ), কৰিমগঞ্জ, লখিমপুৰ, মাজুলী, মৰিগাঁও, নগাঁও আৰু দক্ষিণ শালমাৰা মানকাচৰত অনুষ্ঠিত হ’ব।
উল্লেখযোগ্য যে ৰাজ্যৰ প্ৰাথমিক আৰু মাধ্যমিক শিক্ষাখণ্ডৰ গুণগত মান নিৰূপণৰ বাবে বিগত বৰ্ষত প্ৰথমবাৰৰ বাবে আয়োজন কৰা হৈছিল গুণোৎসৱ। এইবাৰ গুণোৎসৱত প্ৰথম শ্ৰেণীৰ পৰা নৱম শ্ৰেণীলৈ সাঙুৰি লোৱা হ’ব।
চৰকাৰী শিক্ষানুষ্ঠানসমূহৰ শৈক্ষিক পৰিৱেশ, অভাৱ-অভিযোগ, ছাত্ৰ-ছাত্ৰীৰ সমস্যা, আন্তঃগাথনি উন্নয়ন আদিৰ প্ৰকৃত স্বৰূপ পোহৰলৈ আহিছিল। শিক্ষাৰ গুণগত মান নিৰূপণত বিদ্যালয়সমূহত আই এ এছ, আই পি এছ বিষয়াসকলৰ লগতে বিভিন্ন বিভাগৰ চৰকাৰী কৰ্মচাৰীসকলক নিয়োগ কৰা হৈছিল।
তিনিটা পৰ্যায়ত অনুষ্ঠিত হোৱা প্ৰথম গুণোৎসৱৰ বৃহৎ সাফল্যৰ পাছত ৰাজ্যৰ শিক্ষা বিভাগে দ্বিতীয়বাৰৰ বাবে গ্ৰহণ কৰা এই পদক্ষেপে তাৎপৰ্য বহন কৰিছে।
ইফালে জানিব পৰা মতে অহামাহত দ্বিতীয় গুণোৎসৱ সন্দৰ্ভত সৰ্বশিক্ষা অভিযান মিশ্যনে সকলো জিলালৈ সম্পূৰ্ণ গাইড লাইন প্ৰেৰণ কৰিব।
