জম্মু-কাশ্মীৰত সন্ত্ৰাসবাদ দমন, মাওবাদ, উগ্ৰ বাওঁপন্থৰ নিৰ্মূলকৰণ, উত্তৰ-পূবৰ ৰাজ্যসমূহত উগ্ৰপন্থী সংগঠনৰ বিদ্ৰোহ দমন কৰাৰ বাবে কেন্দ্ৰীয় চৰকাৰৰ পদক্ষেপ ইত্যাদি। কেন্দ্ৰীয় গৃহমন্ত্ৰী অমিত শ্বাহে শুকুৰবাৰে ৰাজ্যসভাত গৃহ মন্ত্ৰালয়ৰ ওপৰত আলোচনাৰ অন্তত তেওঁৰ প্ৰত্যুত্তৰত দিয়া দুঘণ্টীয়া ভাষণত প্ৰায় সকলো বিষয় সামৰি লৈছিল।
কিন্তু তেওঁৰ দীঘলীয়া ভাষণত মণিপুৰকলৈ দুমিনিট সময়ো ব্যয় কৰা নাছিল। তেওঁ মাত্ৰ কয়, মণিপুৰত এতিয়া শান্তি আছে। সকলো গোটৰ সৈতে আলোচনা চলি আছে। এই বিষয়ে এতিয়া বেছি নকওঁ। পিছত যেতিয়া আলোচনা হ’ব, তেতিয়া ক’ম। সকলোৰে মতামত শুনিম।
ৰাজনৈতিক মহলে অমিত শ্বাহৰ মন্তব্যক তাৎপৰ্যপূৰ্ণ বুলি গণ্য কৰে। শুকুৰবাৰ ৰাজ্যসভাত দিয়া উত্তৰত গৃহমন্ত্ৰীয়ে একে সময়তে ঘোষণা কৰে যে ২০২৬ চনৰ ৩১ মাৰ্চৰ ভিতৰত দেশৰ পৰা মাওবাদ সম্পূৰ্ণৰূপে নিৰ্মূল হ’ব। কেন্দ্ৰীয় গৃহমন্ত্ৰীয়ে সন্ত্ৰাসবাদক লৈ কংগ্ৰেছক তীব্ৰ সমালোচনা কৰে, সেয়া জম্মু-কাশ্মীৰ হওক বা উত্তৰ-পূবৰ ৰাজ্যই হওক।
তেওঁ ৰাহুল গান্ধীকো নাম নোলোৱাকৈ টানি আনে। শ্বাহে কয় যে কোনোবাই কাশ্মীৰলৈ গৈছিল। বৰফৰ সৈতে হোলী খেলিছে। তাৰ পিছত তেওঁ কৈছে যে তেওঁ হেনো সন্ত্ৰাসবাদীসকলক দূৰৰ পৰাই দেখা পাইছে। দৃষ্টিত যদি সন্ত্ৰাসবাদ থাকে তেন্তে সেয়া সপোনতো আহিব, বাস্তৱতো আহিব। সন্ত্ৰাসবাদীক দেখিলে আমি পোনে পোনে চকুৰ মাজত গুলী চলাও।
তেওঁ CAA, NRC, BNSৰ কথা উল্লেখ কৰিছিল, যদিও লোকপিয়লৰ সন্দৰ্ভত কোনো মন্তব্য নকৰিলে। শেহতীয়া ভাষা বিতৰ্কৰ কথা উল্লেখ কৰি কেন্দ্ৰীয় গৃহমন্ত্ৰীগৰাকীয়ে অভিযোগ কৰে যে বহুতে ভাষাক ব্যৱহাৰ কৰি দুৰ্নীতিৰ পৰা হাত সাৰিবলৈ চেষ্টা কৰিছে। বিভাজনকাৰী ৰাজনীতিৰ প্ৰয়াস চলিছে। হিন্দীৰ লগত কোনো ভাষাৰ সংঘাত নাই।
