ম্যানমাৰত ৭.৭ প্ৰাবল্যৰ শক্তিশালী ভূমিকম্পই ৩০০ৰো অধিক পাৰমাণৱিক বোমাৰ সমান শক্তি নিৰ্গত কৰিছিল বুলি ভূতত্ত্ববিদ জেছ ফিনিক্সে জনায়। আন্তৰ্জাতিক সংবাদ মাধ্যম চিএনএনক তেওঁ কয় যে ‘’এই ভূমিকম্পৰ পৰা নিৰ্গত শক্তি প্ৰায় ৩৩৪টা পাৰমাণৱিক বোমাৰ সমতুল্য।‘’
ভূমিকম্পৰ কেন্দ্ৰবিন্দু ম্যানমাৰৰ দ্বিতীয় বৃহত্তম চহৰ মাণ্ডেলত আছিল আৰু ই ১০ কিলোমিটাৰ গভীৰতাত আঘাত হানিছিল বুলি আমেৰিকাৰ ভূতাত্ত্বিক জৰীপ সংস্থাই (USGS) প্ৰকাশ কৰিছে। স্থানীয় কৰ্তৃপক্ষৰ মতে, ভূমিকম্পত মৃত্যু হোৱা লোকৰ সংখ্যা ১৬০০ অতিক্ৰম কৰিছে যদিও ইউ এছ জি এছৰ প্ৰাৰম্ভিক অনুমান অনুসৰি মৃত্যুৰ সংখ্যা ১০ হাজাৰতকৈ অধিক হ’ব পাৰে।
জেছ ফিনিক্সে সকীয়াই দিছে যে ভাৰতীয় টেকটনিক প্লেট আৰু ইউৰেছিয়ান প্লেটৰ মাজত চলি থকা সংঘৰ্ষৰ বাবে ম্যানমাৰত অহা কেইমাহমানৰ বাবে আফটাৰশ্বক অব্যাহত থাকিব পাৰে। তেওঁ কয় যে এই অঞ্চলটো ভূমিকম্প প্ৰৱণ অঞ্চলত অৱস্থিত আৰু ইমান বৃহৎ ভূমিকম্পৰ পিছত আফটাৰশ্বক স্বাভাৱিক।
শুকুৰবাৰে বিয়লি হোৱা ভূমিকম্পৰ পিছতো ৬.৪ প্ৰাবল্যৰ প্ৰবল আফটাৰশ্বক ৰেকৰ্ড কৰা হয়। এই পৰিস্থিতি ম্যানমাৰৰ বাবে আৰু অধিক বিপজ্জনক হৈ পৰিছে, কিয়নো বৰ্তমান দেশখনে গৃহযুদ্ধৰ মাজেৰে পাৰ হৈ গৈ আছে আৰু যোগাযোগ ব্যৱস্থাত ব্লেকআউট চলিছে। ফিনিক্সৰ মতে, “যুদ্ধ আৰু যোগাযোগৰ অভাৱৰ বাবে বাহিৰৰ জগতখনে এই দুৰ্যোগৰ সম্পূৰ্ণ ছবিখন বুজিব পৰা নাই।”
ম্যানমাৰৰ সামৰিক চৰকাৰে জনাইছে যে এই ভূমিকম্পত এতিয়ালৈকে ১৬৪৪ জন লোকৰ মৃত্যু হোৱাৰ লগতে ৩০০০ৰো অধিক লোক আহত হৈছে। মাণ্ডেলে আৰু ৰাজধানী নেপিডোকে ধৰি ছটা অঞ্চল আৰু ৰাজ্যত জৰুৰীকালীন অৱস্থা ঘোষণা কৰা হৈছে। ৰাজ্যিক টেলিভিছন এম আৰ টিভিয়ে এই ঘোষণা সম্প্ৰচাৰ কৰিছিল যদিও ক্ষতি আৰু হতাহতৰ সম্পূৰ্ণ সবিশেষ প্ৰদান কৰা নাই।
মাণ্ডেলে চহৰত বহুমহলীয়া এটা অট্টালিকা ভাঙি ধ্বংসাৱশেষৰ তলত আবদ্ধ হৈ থকা লোকসকলক উদ্ধাৰৰ চেষ্টা চলাইছে। চুবুৰীয়া ৰাষ্ট্ৰ থাইলেণ্ডৰ ৰাজধানী বেংককতো এই ভূমিকম্প অনুভুত হয়। তাত নিৰ্মাণৰত বহুমহলীয়া অট্টালিকা ভাঙি ৬ জন লোক নিহত, ২২ জন আহত আৰু ১০১ জন নিৰুদ্দেশ হৈছে।
ম্যানমাৰৰ সামৰিক চৰকাৰে এই দুৰ্যোগৰ পৰিপ্ৰেক্ষিতত আন্তঃৰাষ্ট্ৰীয় সহায়ৰ বাবে আহ্বান জনাইছে। ভাৰতে উদ্ধাৰ আৰু সাহায্য দল প্ৰেৰণ কৰিছে। এই দলে কম্বল, টাৰ্পলিন, হাইজিন কিট, শোৱা বেগ, সৌৰ লেম্প, খাদ্য সামগ্ৰী আৰু পাকঘৰৰ সামগ্ৰী লৈ উপস্থিত হৈছে। চীনৰ ইউনান প্ৰদেশৰ ৩৭ জনীয়া এটা দল ইয়াংগনত উপস্থিত হৈছে।
তেওঁলোকে জীৱন ৰক্ষাকাৰী সঁজুলি, ভূমিকম্পৰ সতৰ্কবাণী ব্যৱস্থা, ড্ৰ’ন, আৰু অন্যান্য জৰুৰীকালীন সঁজুলিৰে সাহায্য আৰু চিকিৎসা অভিযানত সহায় কৰি আছে। দক্ষিণ-পশ্চিম চীনৰ ইউনান প্ৰদেশতো ভূমিকম্পৰ ফলত প্ৰবল কঁপনি অনুভূত হয়। ৰাছিয়াৰ জৰুৰীকালীন মন্ত্ৰালয়ে দুখন বিমানত ১২০ জন উদ্ধাৰ কৰ্মী আৰু প্ৰয়োজনীয় সামগ্ৰী প্ৰেৰণ কৰিছে বুলি ৰাষ্ট্ৰীয় সংবাদ সংস্থা টাছে প্ৰকাশ কৰিছে।
মাণ্ডেলেৰ পৰা প্ৰায় ১০০০ কিলোমিটাৰ দূৰত্বত অৱস্থিত বেংককত প্ৰবলভাৱে অনুভৱ কৰা হৈছে ভূমিকম্প। নিৰ্মাণৰত ৩৩ মহলীয়া এটা অট্টালিকা ভাঙি যোৱাৰ ফলত উদ্ধাৰকাৰীয়ে এতিয়াও ধ্বংসাৱশেষৰ তলত আবদ্ধ শ্ৰমিকক বিচাৰি উলিয়াবলৈ চেষ্টা কৰি আছে। থাইলেণ্ডৰ প্ৰধানমন্ত্ৰী ফেইথনটাৰ্ণ শ্বিনাৱাট্ৰাই বেংককক জৰুৰীকালীন অৱস্থা ঘোষণা কৰি বাসিন্দাসকলক উচ্চ অট্টালিকা খালী কৰিবলৈ নিৰ্দেশ দিছে।
বিশেষজ্ঞসকলৰ মতে অহা কেইসপ্তাহমানৰ ভিতৰত ধুমুহা অব্যাহত থাকিলে ক্ষতি আৰু বৃদ্ধি পাব পাৰে। ম্যানমাৰৰ দুৰ্বল আন্তঃগাঁথনি আৰু অব্যাহত থকা সংঘাতৰ বাবে সাহায্য প্ৰদানৰ কামত বৃহৎ প্ৰত্যাহ্বানৰ সন্মুখীন হৈছে। ৰাষ্ট্ৰসংঘৰ মানৱীয় সাহায্য বিভাগে কয় যে দেশত ইতিমধ্যে ২ কোটিতকৈ অধিক লোকক সহায়ৰ প্ৰয়োজন। এই ভূমিকম্পই সেই সংকট আৰু অধিক ভয়াৱহ কৰি তুলিছে।
ম্যানমাৰৰ এই দুৰ্যোগ কেতিয়া সম্পূৰ্ণ নিয়ন্ত্ৰিত হ’ব সেয়া এতিয়াও অনিশ্চিত। অৱশ্যে আন্তঃৰাষ্ট্ৰীয় সমাজৰ সামূহিক প্ৰচেষ্টা আৰু স্থানীয় পদক্ষেপৰ জৰিয়তে পৰিস্থিতিৰ মোকাবিলা কৰাৰ প্ৰচেষ্টা অব্যাহত আছে।
