ছত্তীশগড়ত সেনাৰ গুলীত নিহত হ’ল মষ্ট ৱাণ্টেড মহিলা মাওবাদী নেত্ৰী ৰেনুকা ওৰফে বানু। নিষিদ্ধঘোষিত ভাৰতীয় কমিউনিষ্ট পাৰ্টি (মাওবাদী)ৰ দণ্ডাকাৰণ্য বিশেষ খণ্ড সমিতিৰ শীৰ্ষ নেতা আছিল ৰেণুকা ওৰফে বানু।
খবৰ অনুসৰি, ছত্তীশগড়ৰ দণ্ডেৱাড়া জিলাত সোমবাৰে নিৰাপত্তাৰক্ষীৰ সৈতে হোৱা সংঘৰ্ষত নিহত হয় নেত্ৰীগৰাকী।
জানিব পৰা মতে, তেলেংগানাৰ ৱাৰংগল জিলাৰ কাদভেণ্ডীৰ বাসিন্দা ৰেনুকা দণ্ডকাৰণ্য বিশেষ মণ্ডলৰ সংবাদ দলৰ দায়িত্বত আছিল।
ইয়াৰ পূৰ্বে চৰকাৰে ৰেণুকাৰ মূৰৰ দাম ৫ লাখ টকা নিৰ্দ্ধাৰণ কৰি থৈছিল।
জানিব পৰা মতে, ৰেণুকাৰ পৰা নিৰাপত্তা বাহিনীয়ে এটা ইনছাছ ৰাইফল, কেইবা জাঁই গুলী আৰু অন্যান্য অস্ত্ৰ উদ্ধাৰ কৰে।
সোমবাৰে বিজাপুৰ জিলাৰ দন্তেৱাড়া আৰু ভৈৰামগড় থানাৰ গিদাম থানা এলেকাত জিলা ৰিজাৰ্ভ গাৰ্ডৰ এটা বিশেষ দলে এক অভিযান আৰম্ভ কৰে। এই অভিযানৰ সময়তে ৰেণুকা নিৰাপত্তাৰক্ষীৰ মুখামুখি হয় আৰু দুয়োপক্ষৰ মাজত হোৱা সংঘৰ্ষত তেওঁ নিহত হয়। পিছত তেওঁক ৰেনুকা বুলি চিনাক্ত কৰা হয়।
জানিব পৰা মতে, সমগ্ৰ অঞ্চলটোত এতিয়াও অব্যাহত আছে অনুসন্ধান অভিযান।
ইয়াৰ পূৰ্বে শনিবাৰে দুটা পৃথক এনকাউণ্টাৰত কমেও ১৮ জন সন্দেহযুক্ত মাওবাদী নিহত হোৱাৰ লগতে চাৰিজন নিৰাপত্তাৰক্ষী আহত হৈছিল।আৰক্ষীয়ে জনোৱা মতে, জানুৱাৰী মাহৰ পৰা বাষ্টাৰ ৰেঞ্জত বিভিন্ন এনকাউণ্টাৰত মুঠ ১১৯ জন মাওবাদীৰ মৃতদেহ উদ্ধাৰ কৰা হৈছে।
