গাজাৰ পিছত এইবাৰ লেবাননৰ ৰাজধানী বেৰুটত আক্ৰমণ চলালে ইজৰায়েলী সেনাই। প্ৰায় চাৰি মাহ ধৰি চলি থকা যুদ্ধবিৰতিৰ ম্যাদ শেষ হোৱাৰ পাছতে ইজৰায়েলে একপক্ষীয় ভাবে আক্ৰমণ আৰম্ভ কৰে। লেবানন চৰকাৰে মঙলবাৰে সদৰী কৰা অনুসৰি ইজৰায়েলৰ ক্ষেপণাস্ত্ৰৰ আঘাতত এটা বৃহৎ অট্টালিকা ধ্বংসপ্ৰাপ্ত হোৱাৰ লগতে এতিয়ালৈকে পাঁচজনৰ মৃতদেহ উদ্ধাৰ হৈছে।
বেৰুট আৰক্ষীয়ে আশংকা কৰিছে যে ধ্বংসস্তূপৰ তলত এতিয়াও বহু লোক আছে। ইজৰায়েলৰ দাবী, এই আক্ৰমণত সশস্ত্ৰ গোট হিজবুল্লাৰ এজন ডাঙৰ নেতা নিহত হৈছে। ইয়াৰ পূৰ্বেও নৱেম্বৰৰ শেষৰ ফালে ইজৰায়েলৰ প্ৰধানমন্ত্ৰী বেঞ্জামিন নেতানিয়াহুৰ সেনাই হিজবুল্লাৰ বিৰুদ্ধে অভিযান চলাইছিল।
উল্লেখ্য যে গাজাত ইজৰায়েলৰ আক্ৰমণ আৰম্ভ হোৱাৰ পিছতে দক্ষিণ লেবাননত সক্ৰিয় হিজবুল্লা বাহিনীয়ে তেল আভিভৰ বিৰুদ্ধে ‘যুদ্ধ’ ঘোষণা কৰিছে। তাৰ পিছত এবছৰ ধৰি দুয়োপক্ষৰ মাজত সংঘৰ্ষ চলিছিল। শেষত নৱেম্বৰৰ তৃতীয় সপ্তাহত আমেৰিকা আৰু ফ্ৰান্সৰ মধ্যস্থতাত দুয়োপক্ষই সাময়িক যুদ্ধবিৰতিৰ বাবে সন্মত হৈছিল। যুদ্ধবিৰতিৰ চুক্তি অনুসৰি, সাধাৰণ মানুষে নিৰাপদে ঘৰলৈ ঘূৰিব পাৰিব আৰু ইজৰায়েলে লেবানন সীমান্তৰ পৰা সেনা উঠাই নিবলৈ ৬০ দিনৰ সময় লাভ কৰিব। কিন্তু কোনো পক্ষই নতুনকৈ আক্ৰমণ কৰিব নোৱাৰিব বুলি কোৱা হৈছিল যদিও নেতানিয়াহুৰ সেনাই চুক্তি ভংগ কৰি লেবাননত পুনৰ আক্ৰমণ চলালে।
