আজি গোৱালপাৰা জিলাৰ দুটা পৃথক স্থানত বনৰীয়া হাতীৰ আক্ৰমণত দুজনকৈ লোকে মৃত্যুক আঁকোৱালি লয়।
ইয়াৰে প্ৰথম ঘটনাটো সংঘটিত হয় শুকুৰবাৰে পুৱাৰ ভাগত। প্ৰাপ্ত তথ্য মতে ধূপধৰা আৰক্ষী চকীৰ অন্তৰ্গত অম্বুক বাঁহবাৰী গাঁৱত প্ৰায় ২৫-৩০ জনীয়া এটা বনৰীয়া হাতীৰ জাক প্ৰৱেশ কৰে। ফলত গাঁওবাসীৰ মাজত এক হুলস্থলীয়া পৰিৱেশৰ সৃষ্টি হয়। ঠিক সেই সময়তে নিজৰ প্ৰাণ বচাবলৈ পলায়ণ কৰা সতীশ ৰাভা নামৰ লোকজন বনৰীয়া হাতীৰ দলটোৰ মুখামুখি হয় আৰু বনৰীয়া হাতীৰ দলটোৱে ৰাভাক গছকাত তেওঁ গুৰুতৰভাৱে আঘাতপ্ৰাপ্ত হয়।
গুৰুতৰভাৱে আঘাতপ্ৰাপ্ত সতীশক গাঁওবাসীয়ে তাৎক্ষণিকভাৱে নিকটৱৰ্তী ধূপধৰা বিকালী আদৰ্শ চিকিৎসালয়ত ভৰ্তি কৰে যদিও চিকিৎসালয়তে ৰাভাই শেষ নিশ্বাস ত্যাগ কৰে।
ইফালে আনটো ঘটনা সংঘটিত হয় গোৱালপাৰা জিলাৰ পাহাৰতুলি গাঁৱত।
উল্লেখযোগ্য যে পাহাৰতুলি গাঁৱত পুৱতি নিশা বন্যহস্তীয়ে ভৰাঁলৰ ধান খোৱাৰ উমান পাই মনোজ হজং আৰু ভাতৃ বিদ্যাধৰ হজং ঘৰৰ পৰা বাহিৰলৈ ওলাই আহে আৰু সেই সময়তে বনৰীয়া হাতীৰ দলটোৱে দুয়োকে আক্ৰমণ কৰে।
ফলত মনোজ হজঙে ঘটনাস্থলীতে মৃত্যুক আঁকোৱালি লোৱাৰ বিপৰীতে বিদ্যাধৰ হজঙে কোনোমতে নিজৰ জীৱন ৰক্ষা কৰিবলৈ সক্ষম হয়।
আনহাতে ঘটনা সংঘটিত হোৱাৰ লগে লগে ঘটনাস্থলীত বন বিভাগৰ লোক আৰু আৰক্ষী উপস্থিত হৈ ঘটনাৰ বুজ লয়। লগতে ৰংজুলী ৰেঞ্জ অফিচাৰ মৃতকৰ পৰিয়ালক নিজৰ ফালৰ পৰা ৫ হাজাৰ টকাৰ আৰ্থিক সাহায্য আগবঢ়ায়।
গাঁওবাসীয়ে কৰা অভিযোগ অনুসৰি এই বনৰীয়া হাতীৰ জাকটোৰ মাজৰে লাডেন নামৰ হাতীটোৱে অকলেই অঞ্চলটোৰ কেইবাজনৰো প্ৰাণ কাঢ়ি নিয়াৰ পিছতো বন বিভাগে এতিয়ালৈকে কোনো উচিত পদক্ষেপ গ্ৰহণ কৰা নাই।
আনহাতে সাংবাদিকে ৰংজুলীৰ বন বিভাগৰ এগৰাকী বিষয়াই কয় যে, ‘আমি বনৰীয়া হাতীৰ জাকটোক মেঘালয়ৰ পাহাৰীয়া জিলালৈ ঘূৰাই পথাবৰ বাবে বিভিন্ন উপায় অৱলম্বন কৰিছো কিন্তু হাতীৰ দলটোৱে তাৎক্ষণিকভাৱে এটা ঠাই এৰি আন ঠাইত প্ৰৱেশ কৰে।’
তাৰোপৰি সাংবাদিকে হাতীৰ জাকটোক ট্ৰেংকুলাইজ কৰাৰ কথা সোধাত বিষয়া গৰাকীয়ে কয় যে ট্ৰেংকুলাইজ কৰাৰ বাবে হাতীৰ দলটোৰ ওচৰলৈ গাড়ীৰে যোৱাটো এটা সমস্যা। যিহেতু হাতীৰ জাকটো ঘন অৰণ্যত ঘূৰি ফুৰে য’ত গাড়ীৰে যোৱাৰ কোনো পথ নাই।
