আৰ জি কৰ হাস্পতালৰ ঘটনাক লৈ সমগ্ৰ দেশ উত্তাল হৈ পৰিছিল। কলকাতাৰ এখন চিকিৎসালয়ত এগৰাকী মহিলা চিকিৎসকক নিৰ্মম ধৰ্ষণ আৰু হত্যাৰ ঘটনাৰ স্মৃতি মাৰ নৌযাওতেই মহাৰাষ্ট্ৰত এগৰাকী চিকিৎসা বিজ্ঞানৰ ছাত্ৰীক দলবদ্ধ ধৰ্ষণৰ অভিযোগ উত্থাপন হৈছে।
পানীয়ত নিচাযুক্ত দ্ৰব্য মিহলাই সেৱন কৰিবলৈ দি ধৰ্ষণ কৰাৰ অভিযোগ উঠিছে। এই ঘটনাত ছাত্ৰীগৰাকীৰ দুজন সহপাঠী আৰু তেওঁলোকৰ এজন বন্ধুক গ্ৰেপ্তাৰ কৰা হৈছে। আদালতে তিনিওজনকে ২৭ মে’লৈকে আৰক্ষীৰ জিম্মাত ৰখাৰ নিৰ্দেশ দিছে।
যোৱা ১৮ মে’ৰ নিশা প্ৰায় ১০ বজাত মহাৰাষ্ট্ৰৰ সাংলি জিলাৰ তৃতীয় বৰ্ষৰ এমবিবিএছৰ ছাত্ৰীগৰাকীয়ে দুজন সহপাঠীৰ সৈতে চিনেমা চাবলৈ যোৱাৰ পৰিকল্পনা কৰিছিল। সহপাঠী দুজনৰ লগতে তেওঁলোকৰ আন এজন বন্ধুও আছিল। চিনেমা হললৈ যোৱাৰ পথত চাৰিওজনেই এটা ফ্লেটলৈ গ’ল। অভিযোগ অনুসৰি ছাত্ৰীগৰাকীক ড্ৰাগছ মিহলোৱা পানীয় দিয়া হৈছিল।
আৰক্ষীয়ে জনোৱা মতে, ছাত্ৰীগৰাকীয়ে তদন্তকাৰীক জনোৱা মতে, এই পানীয় খোৱাৰ পিছত তেওঁৰ মূৰ ঘূৰোৱা আৰম্ভ হয়। অভিযোগ অনুসৰি সেই একেটা ফ্লেটতে তিনিজনে তেওঁক ধৰ্ষণ কৰিছিল। আনকি অভিযুক্তই ছাত্ৰীগৰাকীক ভাবুকি দিয়ে যে যদি তেওঁ কাৰোবাক ঘটনাৰ বিষয়ে কয় তেন্তে তেওঁৰ বিপদ হ’ব।
চিকিৎসা বিজ্ঞানৰ ছাত্ৰীগৰাকী ঘৰলৈ উভতি অহাৰ পিছত পিতৃ-মাতৃক এই বিষয়ে অৱগত কৰে। কৰ্ণাটকৰ বেলাগাভিৰ বাসিন্দা ছাত্ৰীগৰাকী। ছাত্ৰীগৰাকীৰ পৰিয়ালৰ তৰফৰ পৰা আৰক্ষীত এজাহাৰ দাখিল কৰে।
বিষ্ণুবাগ থানাৰ আৰক্ষীয়ে তিনিওজনকে গ্ৰেপ্তাৰ কৰে। এজন আৰক্ষী বিষয়াই জনোৱা মতে, অভিযুক্তৰ বিৰুদ্ধে দলবদ্ধ ধৰ্ষণ আৰু অন্যান্য অভিযোগত গোচৰ ৰুজু কৰা হৈছে। এতিয়াও তদন্ত অব্যাহত আছে।
