কৰ্ণাটকৰ বেলগাম জিলাৰ ৰাম মন্দিৰৰ এজন সন্ন্যাসীয়ে ১৭ বছৰীয়া নাবালিকা কিশোৰীক অপহৰণ কৰি ধৰ্ষণ কৰাৰ অভিযোগ উত্থাপন হৈছে। আৰক্ষীয়ে অভিযুক্ত সন্ন্যাসীজনৰ বিৰুদ্ধে POCSO আইনৰ অধীনত গোচৰ ৰুজু কৰিছে। লগতে অভিযুক্তক গ্ৰেপ্তাৰ কৰা হৈছে।
আৰক্ষীয়ে জনোৱা মতে অভিযুক্ত সন্ন্যাসীজনৰ নাম লোকেশ্বৰ মহাৰাজ। কৰ্ণাটকৰ ৰাজধানী বাংগালুৰুৰ পৰা ৫০০ কিলোমিটাৰ দূৰত অৱস্থিত বেলগাঁৱৰ ৰাইবাগ তালুকৰ মেখালী গাঁৱৰ ৰাম মন্দিৰৰ তেওঁ সন্ন্যাসী।
অভিযুক্ত সন্ন্যাসীগৰাকীয়ে ১৭ বছৰীয়া এগৰাকী কিশোৰীক প্ৰলোভিত কৰি বাগালকোট চহৰৰ এখন লজলৈ লৈ যায়। তাতেই ছোৱালীজনীক ধৰ্ষণ কৰা বুলি অভিযোগ উত্থাপন হৈছে।
অভিযোগ অনুসৰি অভিযুক্ত লোকেশ্বৰ মহাৰাজে তাৰ পিছত নাবালিকাগৰাকীক ৰায়চুৰলৈ লৈ গৈ নিৰ্যাতন চলাইছিল।
ধৰ্ষণ কৰাৰ পিছত সন্ন্যাসীয়ে ছোৱালীজনীক বাগালকোট জিলাৰ মহালিংগাপুৰ বাছ ষ্টেণ্ডত এৰি থৈ যায় বুলি আৰক্ষীয়ে জানিবলৈ দিয়ে।
বেলাগাভি জিলা আৰক্ষী অধীক্ষক ডাঃ ভীমশংকৰ এছ গুলেদে কয়, “অভিযুক্তই ভুক্তভোগীক ঘৰত নমাই দিয়াৰ অজুহাতত প্ৰলোভিত কৰি গাড়ীত উঠাই লৈ যায়। তাৰপিছত ৰাইচুৰ আৰু বাগালকোটৰ এখন লজলৈ লৈ যায় আৰু যৌন নিৰ্যাতন চলায়। পিছত বেলাগাভিৰ ওচৰত এৰি থৈ যায়।”
বাগালকোটৰ নবনগৰ থানাত পকচো আইনৰ অধীনত সন্ন্যাসীৰ বিৰুদ্ধে গোচৰ ৰুজু কৰা হৈছে।
আৰক্ষী অধীক্ষক ডাঃ ভীমশংকৰ এছ গুলেদে দাবী কৰে যে, “আৰক্ষীত এফআইআৰ দাখিলৰ খবৰ পোৱাৰ পিছতে অভিযুক্তই ভুক্তভোগীৰ পিতৃ-মাতৃক এই অধ্যায়ৰ বিষয়ে অৱগত কৰে। ভুক্তভোগীৰ পিতৃ-মাতৃয়ে বাগালকোট আৰক্ষীক লিখিত অভিযোগ দাখিল কৰে। যিহেতু ভুক্তভোগীক আমাৰ এই এলেকাৰ পৰাই উঠাই নিয়া হৈছিল, সেয়ে ইয়াতেই এটা গোচৰ ৰুজু কৰা হৈছে আৰু অভিযুক্তক গ্ৰেপ্তাৰ কৰি জেৰা কৰা হৈছে।”
পিছত গোচৰটো বেলাগাৱী জিলাৰ মুদালাগী আৰক্ষী থানালৈ স্থানান্তৰ কৰা হয়। ইতিমধ্যে এই থানাৰ আৰক্ষীয়ে লোকেশ্বৰ মহাৰাজ নামৰ অভিযুক্ত সন্ন্যাসীগৰাকীক গ্ৰেপ্তাৰ কৰিছে।
