বিহাৰ নিৰ্বাচনৰ প্ৰতি দৃষ্টি ৰাখি প্ৰধানমন্ত্ৰী নৰেন্দ্ৰ মোদীয়ে দেওবাৰে এন ডি এৰ মুখ্যমন্ত্ৰীসকলৰ সৈতে বৈঠকত মিলিত হয়। সূত্ৰসমূহে জনোৱা মতে, সেই বৈঠকতে নেতা-মন্ত্ৰীসকলক অতিৰঞ্জিত বা অবাঞ্চিত মন্তব্য কৰাৰ পৰা বিৰত থাকিবলৈ পৰামৰ্শ দিয়া হৈছে।
জানিব পৰা মতে, বৈঠকত দলৰ নেতাসকলৰ অপ্ৰয়োজনীয় বক্তব্যক লৈও প্ৰধানমন্ত্ৰীয়ে উদ্বেগ প্ৰকাশ কৰে। তেওঁ কয় যে নিৰ্বাচনৰ পূৰ্বে অন্ততঃ অতিৰঞ্জিত কথা কোৱাৰ পৰা বিৰত থাকি সুশাসনৰ ওপৰত গুৰুত্ব দিয়ে।
বহু পৰ্যবেক্ষকৰ মতে মধ্যপ্ৰদেশ আৰু হাৰিয়ানাত বিজেপি নেতাসকলে কৰা বিতৰ্কিত মন্তব্যই দলটোৰ ভাবমূৰ্তি ক্ষতিগ্ৰস্ত কৰিছে। অপাৰেছন সিন্দুৰৰ পিছত একাংশ নেতাৰ মন্তব্যই বিতৰ্ক সৃষ্টি কৰাৰ লগতে দলৰ ভাৱমূৰ্তিত আঘাত হানিছে। এই প্ৰেক্ষাপটতে হয়তো প্ৰধানমন্ত্ৰীয়ে এনে পৰামৰ্শ আগবঢ়াইছে।
বৈঠকত গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং, স্বাস্থ্য মন্ত্ৰী জে পি নাড্ডাকে ধৰি কেইবাগৰাকীও বিজেপি শীৰ্ষ নেতা উপস্থিত থাকে। এন ডি এ শাসিত ৰাজ্যসমূহৰ মুখ্যমন্ত্ৰী আৰু উপ-মুখ্যমন্ত্ৰীসকলো উপস্থিত আছিল।
অনুমান কৰা হৈছে যে এন ডি এৰ এক ঐক্যবদ্ধ ভাবমূর্তি দাঙি ধৰিবলৈ আৰু এন ডি এ শাসিত ৰাজ্যসমূহৰ কাম-কাজ যাতে কেন্দ্ৰীয় চৰকাৰৰ কাম-কাজৰ সৈতে সমন্বয় আৰু সুসংহত হয় তাৰ বাবে এই বৈঠক আহ্বান কৰা হৈছিল।
বৈঠকত বিহাৰৰ মুখ্যমন্ত্ৰী নীতিশ কুমাৰো উপস্থিত থাকে। কিন্তু সভাৰ পৰা আধাতে ওলাই যায়। তাৰ পাছত হুলস্থুলৰ সৃষ্টি হয় । হঠাতে নীতিশে কিয় সভা এৰি গ’ল সেয়া স্পষ্ট হোৱা নাই। অৱশ্যে শুনা গৈছে যে তেওঁ অসুস্থ অনুভৱ কৰিছিল। দৰাচলতে শনিবাৰে নিটি আয়োগৰ বৈঠকতো উপস্থিত নাছিল নীতিশ কুমাৰ। যাক লৈ চৰ্চা আৰম্ভ হৈছিল।
নীতিশ কুমাৰে কংগ্ৰেছ-আৰজেডিৰ মিত্ৰতা ত্যাগ কৰি ২০২৪ চনৰ লোকসভা নিৰ্বাচনৰ ঠিক পূৰ্বেই এন ডি এলৈ উভতি আহিছিল আৰু ‘গাদী ৰক্ষা’ৰ বিষয়টোৱে কাৰণ বুলি স্পষ্ট হৈছিল। কিন্তু, এইবাৰ বিহাৰৰ নিৰ্বাচনত বিৰোধীয়ে জাতিভিত্তিক লোকপিয়লক ডাঙৰ ইচ্ছ্যু কৰি তুলিবলৈ ওলাইছে। এই প্ৰেক্ষাপটত নীতিশ কুমাৰৰ স্থিতি কি সেয়া স্পষ্ট হোৱা নাই।
