ইতি পৰিল ট্ৰাম্পৰ শুল্ক যুদ্ধ! আমেৰিকাৰ ৰাষ্ট্ৰপতি ড’নাল্ড ট্ৰাম্পৰ শুল্ক নীতি বাতিলৰ নিৰ্দেশ দিছে আন্তঃৰাষ্ট্ৰীয় বাণিজ্য আদালতে। আদালতে স্পষ্ট কৰি দিছে যে ট্ৰাম্পে নিজৰ কৰ্তৃত্বৰ বাহিৰত কাম কৰিছে। বিধায়িনী দলৰ সদস্যৰ লগত আলোচনা নকৰাকৈয়ে তেওঁ বিভিন্ন দেশত অতিৰিক্ত কৰ আৰোপ কৰিছে বুলি উল্লেখ কৰিছে। কিন্তু এই আদালতৰ নিৰ্দেশত নতশিৰ হ’বলৈ সাজু হোৱা নাই ট্ৰাম্প প্ৰশাসন। ট্ৰাম্প প্ৰশাসনে যুক্তি দিছে চীনৰ আগ্ৰাসন দমন কৰিবলৈ আৰু ভাৰত-পাকিস্তানৰ সংঘাত ৰোধ কৰিবলৈ ‘শুল্ক’ ব্যৱহাৰ কৰিছিল।
এতিয়া এই সিদ্ধান্তৰ বিৰুদ্ধে আবেদন কৰিবলৈ ওলাইছে হোয়াইট হাউছ। ট্ৰাম্পে দ্বিতীয়বাৰৰ বাবে ক্ষমতালৈ ঘূৰি অহাৰ পিছত বিভিন্ন দেশত অতিৰিক্ত শুল্ক আৰোপ কৰাৰ হুংকাৰ দিছিল। ২ এপ্ৰিলৰ পৰা তেওঁ নতুন শুল্ক নীতি কাৰ্যকৰী কৰে।এই দিনটোক আমেৰিকাৰ ‘মুক্তি দিৱস’ হিচাপেও ঘোষণা কৰা হয়। যাৰ প্ৰভাৱ পৰিছে বিশ্ব বাণিজ্য। চীনেও প্ৰতিশোধ স্বৰূপে আমেৰিকাৰ ওপৰত অতিৰিক্ত কৰ আৰোপ কৰিছে। এই ‘বাণিজ্য যুদ্ধ’ৰ মাজতে আমদানিকৃত সামগ্ৰীৰ ওপৰত নিৰ্ভৰশীল বহু আমেৰিকান ব্যৱসায়ীয়ে ট্ৰাম্পৰ শুল্ক নীতিৰ বিৰুদ্ধে আদালতৰ কাষ চাপে। বুধবাৰে শুনানিৰ সময়ত মানহাটান আদালতৰ তিনিজন ন্যায়াধীশে কয় যে ৰাষ্ট্ৰপতি ট্ৰাম্পে নিজৰ আইনী বাধ্যবাধকতাৰ বাহিৰত কাম কৰিছে। আমেৰিকাৰ কংগ্ৰেছৰ লগত এই বিষয়ত আলোচনা নকৰাকৈয়ে তেওঁ অকলে সকলো সিদ্ধান্ত লৈছে বুলি উল্লেখ কৰে।
উল্লেখ্য বিশ্বৰ বিভিন্ন দেশে আমেৰিকাৰ ওপৰত অতিৰিক্ত কৰ আৰোপ কৰা বাবে ট্ৰাম্পে এই নীতি গ্ৰহণ কৰা বুলি জানিবলৈ দিছে। সেয়েহে ব্যৱসায়ৰ ক্ষেত্ৰত আমেৰিকাৰ ব্যৱসায়ীসকলে এক বিপৰ্যয়ৰ সন্মুখীন হৈছে বুলি মত প্ৰকাশ কৰি। এয়া দেশত জৰুৰীকালীন অৱস্থাৰ সমতুল্য বুলি অভহিত কৰিছে। সেয়েহে ঘাটি হ্ৰাস কৰাৰ লগতে আমেৰিকাৰ ব্যৱসায়ক প্ৰসাৰিত কৰাৰ বাবে শুল্ক আৰোপ কৰা হৈছে বুলি যুক্তি দৰ্শাইছে। এই সিদ্ধান্তৰ জৰিয়তে ট্ৰাম্প চৰকাৰে ১৯৭৭ চনত কাৰ্যকৰী হোৱা ‘আন্তঃৰাষ্ট্ৰীয় জৰুৰীকালীন অৰ্থনৈতিক ক্ষমতা আইন’ ৰক্ষা কৰা বুলি দিয়াৰ পৰিৱৰ্তে অদালতে এই জৰুৰীকালীন আইনখনেও ৰাষ্ট্ৰপতিক আন দেশৰ ওপৰত শুল্ক আৰোপ কৰি আমেৰিকাৰ আমদানি নিয়ন্ত্ৰণ কৰাৰ চূড়ান্ত কৰ্তৃত্ব প্ৰদান নকৰে বুলি উল্লেখ কৰিছে। এই আইনখনে ৰাষ্ট্ৰপতিক জৰুৰীকালীন অৱস্থাত কিছুমান প্ৰয়োজনীয় অৰ্থনৈতিক নিষেধাজ্ঞা আৰোপ কৰাৰ ক্ষমতাহে প্ৰদান কৰে বুলি অদালতে স্পষ্ট কৰি দিছে।
