উত্তৰ-পূব ভাৰতৰ এক বৃহৎ অঞ্চল ধাৰাসাৰ বৰষুণৰ ফলত বিধ্বস্ত হৈ পৰিছে। বিগত দুদিনত অসম, মেঘালয়, মণিপুৰ, অৰুণাচল প্ৰদেশ, মিজোৰাম, ছিকিমত এই দুৰ্যোগৰ ফলত ৩৪ জন লোকৰ মৃত্যু হোৱা বুলি জানিব পৰা গৈছে। মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে। বানপানী আৰু ভূমিস্খলনৰ ফলত বহু অঞ্চলত পথ সংযোগ হেৰাই গৈছে। পৰিস্থিতি অধিক ভয়াৱহ হোৱাৰ লগে লগে উদ্ধাৰ অভিযানত ভাৰতীয় বায়ুসেনা আৰু অসম ৰাইফলছৰ বিষয়াকো মোতায়েন কৰা হৈছে।
অসমৰ ১৯ খন জিলাৰ ৭৬৪ খন গাঁৱ বানৰ কৱলত। অসম দুৰ্যোগ ব্যৱস্থাপনা বিভাগে জনোৱা মতে, এই দুৰ্যোগৰ বাবে ৰাজ্যত এতিয়ালৈকে ১০ জন লোকৰ মৃত্যু হৈছে। ঘৰ পানীত ডুব যোৱাৰ বাবে বহু লোক গৃহহীন হৈ পৰিছে। কাছাৰৰ পৰিস্থিতি আটাইতকৈ ভয়াৱহ বুলি জানিব পৰা গৈছে। তাত প্ৰায় এক লাখ লোক এই দুৰ্যোগৰ ফলত ক্ষতিগ্ৰস্ত হোৱাৰ খাবৰ পোৱা গৈছে। ক্ষতিগ্ৰস্তৰ সংখ্যা ক্ৰমে শ্ৰীভূমি জিলাত ৮৩ হাজাৰ, নগাঁও জিলাত ৬২ হাজাৰ আৰু লখিমপুৰ জিলাত ৪৬ হাজাৰ।
চৰাকাৰী তথ্য অনুসৰি এই পৰ্যন্ত ৫৫ হাজাৰ লোকে ১৫৫টা সাহায্য শিবিৰত আশ্ৰয় লৈছে। ইফালে মণিপুৰত ইম্ফল ইষ্ট আৰু ইম্ফল পশ্চিমৰ দুখন জিলাত ধাৰাসাৰ বৰষুণৰ ফলত অধিক ক্ষতিগ্ৰস্ত হৈছে বুলি জানিব পৰা গৈছে। এই পৰ্যন্ত সেনাই সেই ৰাজ্যৰ ১৫০০ লোকক উদ্ধাৰ কৰি সুৰক্ষিত স্থানলৈ স্থানান্তৰিত কৰিছে। অৰুণাচল প্ৰদেশত ভূমিস্খলনৰ ফলত ৯ জন লোকে প্ৰাণ হেৰুৱাইছে। পূব কামেং জিলাত ৭ জন আৰু জিৰো উপত্যকাত ২ জন লোকৰ মৃত্যুৰ খবৰ পোৱা গৈছে।
ধাৰাসাৰ বৰষুণ আৰু ভূমিস্খলনৰ ফলত উত্তৰ ছিকিমত আবদ্ধ হৈ আছে ১২০০ পৰ্যটক। মেঘালয়ৰ ১০খন জিলা তথা হাৰাপ্পা বনাঞ্চলৰ বিস্তৰ ক্ষতিগ্ৰস্ত হৈছে। ত্ৰিপুৰাতো বান পৰিস্থিতিৰ সৃষ্টি হৈছে বুলি জানিব পৰা গৈছে। সোমবাৰে পুৱা বতৰ বিজ্ঞান বিভাগে কয় যে উত্তৰ-পূব ভাৰতৰ ৰাজ্যসমূহত বৃহস্পতিবাৰলৈকে বৰষুণ অব্যাহত থাকিব। লগতে ধাৰাসাৰ বৰষুণৰ সতৰ্কবাণী জাৰি কৰিছে।
