নবীকৰণযোগ্য শক্তিৰ ওপৰত গুৰুত্ব আৰোপ কৰা আই আই টি গুৱাহাটী – সহযোগী ষ্টাৰ্টআপ ৰেনাৰ্জি ছলিউচনছ প্ৰাইভেট লিমিটেডে জৈৱ বৈচিত্ৰ্য আৰু সংৰক্ষণ বিষয়ৰ আগশাৰীৰ এন জি অ’ আৰণ্যকৰ সহযোগত আৰু স্থানীয় বাসিন্দাসকলৰ সক্ৰিয় সহযোগত দেওবাৰে (৮ জুন) পুৱা বশিষ্ঠ নদীৰ সমীপৰ ভেটাপাৰাৰ সুদাকান্ত পথৰ কাষত স্বচ্ছতা আৰু বননীকৰণ অভিযানৰ আয়োজন কৰে।
ৰেনাৰ্জি আৰু আৰান্যকৰ যৌথ অভিযানৰ সৈতে এই পদক্ষেপে তৃণমূল পৰ্যায়ৰ পৰা আৰম্ভ কৰি এখন পৰিষ্কাৰ, সেউজীয়া, আৰু অধিক বহনক্ষম পৃথিৱী সৃষ্টিৰ লক্ষ্যৰে আগবাঢ়িছে। স্বেচ্ছাসেৱক, সম্প্ৰদায়ৰ সদস্য, আৰু দলটোৱে একত্ৰিত হৈ:
– বশিষ্ঠ নদীৰ পূব পাৰ পৰিষ্কাৰ কৰে
– নদীৰ পাৰত থলুৱা গছপুলি ৰোপণ কৰে
– স্থানীয় বিক্ৰেতা আৰু ওচৰৰ আউটলেটসমূহক ডাষ্টবিন বিতৰণ কৰে
– আৱৰ্জনাৰ সঠিক নিষ্কাশন আৰু বহনক্ষম জীৱন-যাপনৰ বিষয়ে সজাগতা চলায়।
ৰেনাৰ্জি ছলিউচনৰ সহ-প্ৰতিষ্ঠাপক তথা সঞ্চালক ভাৰ্গৱ দেওৰীয়ে কয় যে এইটো এটা সৰু পদক্ষেপ যদিও এক গুৰুত্বপূৰ্ণ পদক্ষেপ।
তেওঁ কয়, “আজি যদি আমি আমাৰ পৰিৱেশ সুৰক্ষাৰ বাবে ব্যৱস্থা গ্ৰহণ নকৰো তেন্তে পৰৱৰ্তী প্ৰজন্মৰ ভৱিষ্যত নাথাকিব। বহনক্ষমতা কেৱল চৰকাৰৰ দায়িত্ব নহয়, এয়া প্ৰতিজন নাগৰিকৰ সামূহিক কৰ্তব্য।”
