সোমবাৰে বিধানসভাত মুখ্যমন্ত্রীয়ে বৰদুৱাৰ বাগান প্রমুখ্যে জনজাতীয় মানুহৰ মাটিৰ পট্টা সম্পর্কত যি বক্তব্য প্রকাশ কৰিছে, সেই ক্ষেত্রত তীব্র প্রতিক্রিয়া প্রকাশ কৰিছে ভূমি অধিকাৰ যৌথ সংগ্রাম সমিতিয়ে।
যৌথ সংগ্রাম সমিতিৰ হৈ কৃষ্ণ গগৈ, প্রণৱ দলে আৰু সুব্রত তালুকদাৰে এক প্রেছ বিজ্ঞপ্তিযোগে কয় যে, প্রথমতেই হিমন্ত বিশ্ব শৰ্মাই এক গোকাট মিছা কৈছে যে বিজেপি চৰকাৰৰ দিনত জনজাতীয় মানুহক কোনোধৰণৰ উচ্ছেদ কৰা হোৱা নাই অথবা অনাগত দিনত উচ্ছেদ কৰা নহয়। এই কথা গোকাট মিছা, কিয়নো ২০২১ চনত হিমন্ত বিশ্ব শৰ্মা মুখ্যমন্ত্রী হোৱাৰ পিছত জনজাতীয় মানুহৰ মাটিৰ ওপৰত আটাইতকৈ বেছি আক্রমণ হৈছে।
‘এডভান্টেজ অসম’ কাৰ্য্যসূচীৰ পিছত আদানী – আম্বানী – জয় শ্বাহ – ৰামদেৱৰ স্বাৰ্থত কাৰ্বি আংলং, ডিমা হাছাও, বিটিআৰ, ৰাভা হাছঙৰ লাখ লাখ বিঘা জনজাতীয় মানুহৰ পৰম্পৰাগত কৃষিভূমি হস্তান্তৰ কৰিবলৈ চৰকাৰে সিদ্ধান্ত লৈছে। ইয়াৰ বিৰুদ্ধে ৰাইজে প্রবল প্রতিবাদো অব্যাহত ৰাখিছে।
যৌথ সংগ্রাম সমিতিয়ে লগতে প্রশ্ন কৰে যে, মিকিৰ বামুনীৰ ২৭৬ বিঘা জনজাতীয় মানুহৰ গেৰ ধৰা খেতিৰ ওপৰত কোন চৰকাৰৰ দিনত বুলডোজাৰ চলিছিল? কাজিৰঙাৰ ৪৫ বিঘা খেতিমাটিৰ পৰা কোন চৰকাৰৰ দিনত আদিবাসী মানুহক বিতাড়িত কৰা হৈছিল? এই প্রশ্ন কৰিলেই মুখ্যমন্ত্রী হিমন্ত বিশ্ব শৰ্মাই হিন্দু-মুসলিমৰ কথা আনি মূল বিষয়টো লঘু কৰে আৰু সোমবাৰে বিধানসভাতো ইয়াৰ ব্যতিক্রম ন’হল।
বৰদুৱাৰ বাগানৰ চেটেলাইট টাউন প্রকল্প আৰু মাটিৰ পট্টাৰ বিষয় সন্দৰ্ভত মুখ্যমন্ত্রীয়ে কৈছে যে, ১৯৭৫ চনৰ আগৰ মানুহখিনিক চৰকাৰে পট্টা দিব। এইটো কেনেধৰণৰ কথা? জনজাতীয় মানুহক জনজাতীয় এলেকাত মাটিৰ পট্টা দিয়াৰ ক্ষেত্ৰত ১৯৭৫ চনটো কি ধৰণে ধাৰ্য্য কৰা হ’ল। ৰাইজে দাবী কৰিছে যে, ভোগদখল কৰি থকা সমগ্র মাটিৰ পট্টা পাব লাগে। তাৰ বিপৰীতে মুখ্যমন্ত্রীয়ে কৈ আছে কিছুমান বিভাজনকাৰী কথা। ভোগদখলকাৰী ৰাইজে কেতিয়া মাটিৰ পট্টা পাব, সেই বিষয়েও মুখ্যমন্ত্রীয়ে একো স্পষ্টকৈ নকলে।
তদুপৰি এইখন চৰকাৰৰেই তদানীন্তন ৰাজহ মন্ত্রীয়ে ২০২৫ চনৰ ফেব্রুৱাৰী মাহৰ ভিতৰত ৰাইজক মাটিৰ পট্টা দিম বুলি ঘোষণা কৰিছিল আৰু এতিয়া মুখ্যমন্ত্রীয়ে কৈছে যে বাগানৰ মাটি চৰকাৰে কিনি লোৱাৰ পিছতহে ৰাইজে মাটিৰ পট্টা পাব। জিএমডিএ ৰ মন্ত্রী জয়ন্ত মল্ল বৰুৱা আৰু মূখ্যমন্ত্ৰীৰ কথাৰ মাজতো কোনো মিল নাই। অৰ্থাৎ একেখন চৰকাৰৰেই ভিন্নজনৰ ভিন্ন কথা।
ইয়াৰ উপৰিও চেটেলাইট টাউনশ্বীপ প্রসংগটো মুখ্যমন্ত্রীয়ে স্পষ্টকৈ ৰাইজৰ পক্ষত একো কোৱা দেখা ন’গল আৰু কিছুমান মিছা কথাহে ক’লে। অফিচিয়েলি ঘোষণা কৰিছিল বৰদুৱাৰ চেটেলাইট টাউনশ্বীপ হিচাপে, কিন্তু সোমবাৰে সদনত ক’লে পলাশবাৰী টাউনশ্বীপ হিচাপে। এয়া কেনেধৰণৰ বিভ্রান্তি?
মুখ্যমন্ত্রীয়ে কৈছে যে, চেটেলাইট টাউনশ্বীপ্ মানে ৰাস্তা ঘাট, পানী যোগান প্রকল্প, বিদ্যুৎ যোগান আদিৰ কথা। কিন্তু চেটেলাইট টাউনশ্বীপৰ ডাঙৰ ডাঙৰ প্রকল্পবোৰৰ কথা মুখ্যমন্ত্রীয়ে নক’লে , যিসমূহৰ জৰিয়তে সমগ্র অঞ্চলটোৰ জনজাতীয় আৱেষ্টনীৰ প্রতিয়ে তীব্র ভাবুকি আহিব।
সোমবাৰে বিজ্ঞপ্তিযোগে ভূমি অধিকাৰ যৌথ সংগ্রাম সমিতিয়ে স্পষ্টকৈ কয় যে, ৰাইজৰ দাবী অনুসৰি মুখ্যমন্ত্রীয়ে জনজাতীয় আৱেষ্টনীৰ বৰদুৱাৰ বাগানৰ চেটেলাইট টাউনশ্বীপ প্রকল্প সম্পূর্ণভাবে বাতিল কৰাৰ ঘোষণা কৰিব লাগে, ভোগদখলকাৰী ৰাইজক মাটিৰ পট্টা দিব লাগে আৰু চাহ বাগানৰ অৱশিষ্ট অঞ্চলৰ ওপৰত নিৰ্ভৰশীল আদিবাসীসকলৰ জীৱন – জীৱিকাৰ অধিকাৰ সুৰক্ষিত কৰিব লাগে। ইয়াৰ উপৰিও বাগানৰ যিসমূহ খালী ঠাই আছে, সেইসমূহত কল্যাণকামী ৰাষ্ট্ৰৰ চৰিত্ৰ অটুট ৰাখি ৰাভা হাছঙৰ সৰ্বসাধাৰণ ৰাইজৰ সুবিধাৰ কাৰণে চৰকাৰী শিক্ষানুষ্ঠান, চিকিৎসালয়ৰ ব্যবস্থা কৰিব লাগে।
