ৰাজা ৰঘুবংশীৰ ভাতৃ শচীন ৰঘুবংশীয়ে সোণমৰ নাৰ্কো টেষ্ট কৰিবলৈ দাবী জনাইছে। ইপিনে, বৃহস্পতিবাৰে সমাপ্ত হয় সোণম, প্ৰেমিক ৰাজ কুশ্বৱাহা আৰু আন তিনিজন লোকৰ আৰক্ষীৰ জিম্মা।
একেদিনাই ৫ অভিযুক্তক শ্বিলঙৰ আদালতত হাজিৰ কৰোৱা হয়। সকলো দিশ বিবেচনা কৰি ন্যায়াধীশে সোণম আৰু ৰাজক আৰু দুদিন আৰক্ষীৰ জিম্মাত ৰখাৰ নিৰ্দেশ দিয়ে। বাকী তিনিজনক ১৪ দিনৰ কাৰাগাৰলৈ প্ৰেৰণ কৰা হৈছে।
বৃহস্পতিবাৰে শচীনে প্ৰশ্ন উত্থাপন কৰে, “যোৱা আঠ দিন আৰক্ষীৰ জিম্মাত থকাৰ পিছতো যেতিয়া সোণমে হত্যাকাণ্ডৰ বিষয়ে একো কোৱা নাই, তেতিয়া আৰু দুদিন জিম্মাত থকাৰ পিছতো আৰক্ষীয়ে তেওঁৰ পৰা এনে তথ্য কেনেকৈ উলিয়াব পাৰিব?”
ইয়াৰ পিছতে মেঘালয়ত হানিমুন হত্যাকাণ্ডৰ অন্যতম অভিযুক্ত সোণমক নাৰ্কো টেষ্ট কৰিবলৈ দাবী জনায়। তেওঁ দাবী কৰে যে এই ঘটনাত আৰু কেইবাজনো লোক জড়িত। তেওঁলোকক চিনাক্ত কৰিবলৈ সোণমক নাৰ্কো টেষ্ট কৰা প্ৰয়োজন।
উল্লেখযোগ্য যে ২০ মে’ত নৱবিবাহিতা ৰাজা ৰঘুবংশী আৰু সোণম ৰঘুবংশী হানিমুনৰ বাবে মেঘালয়লৈ গৈছিল। যোৱা ২৩ মে’ত চেৰাপুঞ্জীত উপস্থিত হোৱাৰ পিছতে নিৰুদ্দেশ হৈ পৰে দম্পতী। এই ঘটনাৰ ১১ দিন পিছত জলপ্ৰপাতৰ খাৱৈৰ পৰা উদ্ধাৰ কৰা হয় ৰাজাৰ মৃতদেহ।
অৱশ্যে সোণমক বিচাৰি পোৱা হোৱা নাছিল। ইয়াৰ মাজতে গাজীপুৰৰ পৰা ঘৰলৈ ফোন কৰে সোণমে। সেই ফোনটোৰ ভিত্তিত আৰক্ষীয়ে তাইক আটক কৰি জেৰা কৰিবলৈ আৰম্ভ কৰে। ইয়াৰ পিছত সোণমৰ বক্তব্যত বিসংগতি ধৰা পৰাত তেওঁক গ্ৰেপ্তাৰ কৰা হয়। ইপিনে সোমবাৰে ৰাজাক হত্যা কৰা স্থানৰ পৰা আৰক্ষীয়ে এখন দা উদ্ধাৰ কৰে।
