মাকৰ কোলাকে সাৰথি কৰি আগৱাঢ়ি যোৱা ছাত্ৰীগৰাকীৰ শাৰীৰিক উচ্চতা মাত্ৰ ২ ফুট । থিয় হ’ব নোৱাৰে আৰু খোজ কাঢ়িবলৈও সক্ষম নহয় এইগৰাকী ছাত্ৰী । কিন্ত মানসিকভাৱে প্ৰৱল ইচ্ছা শক্তিৰ গৰাকী দিব্যাংগ ছাত্ৰীগৰাকী ।
যোৰহাট মৰিয়নী চেলেংহাট বেলতল জাপিসজীয়া গাঁৱৰ লক্ষী গগৈ আৰু ৰুমী গগৈৰ জ্যেষ্ঠ কন্যা বিষ্ণুপ্ৰিয়া গগৈ শিশুকালৰ পৰাই দিব্যাংগ । কিন্তু শিক্ষাৰ প্ৰতি প্ৰৱল ধাউতি থকা বিষ্ণুপ্ৰিয়াই প্ৰাথমিক বিদ্যালয়ৰ পৰা নিজৰ মেধাৰ পৰিচয় দিছিল । তদুপৰি সুখ্যাতিৰে উত্তীৰ্ণ হৈছিল হাইস্কুল শিক্ষান্ত পৰীক্ষা আৰু উচ্চতৰ মাধ্যমিক পৰীক্ষা ।
আনহাতে সদ্যঘোষিত ডিব্ৰুগড় বিশ্ববিদ্যালয়ৰ স্নাতক চূড়ান্ত পৰীক্ষাত উত্তীৰ্ণ হৈ স্নাতক ডিগ্ৰী লাভ কৰিলে বিষ্ণুপ্ৰিয়াই । সমাজত্বত বিষয়ক সন্মান বিষয় হিচাপে লৈ আমগুৰি মহাবিদ্যালয়ৰ পৰা স্নাতক চূড়ান্ত পৰীক্ষাত বহিছিল বিষ্ণুপ্ৰিয়া ।
অতি দৰিদ্ৰ পৰিয়ালৰ সন্তান বিষ্ণুপ্ৰিয়াই অসমৰ মুখ্যমন্ত্ৰী ড৹ হিমন্ত বিশ্ব শৰ্মালৈ এখন বিদ্যুৎ চালিত হুইল শ্বেয়াৰ আৰু সৰুকৈ হ’লেও এটা কৰ্ম সংস্থাপন বিচাৰি জনাইছে অনুৰোধ আৰু ভৱিষ্যতে শিক্ষক হোৱাৰ সপোন দেখিছে বিষ্ণুপ্ৰিয়াই ।
