ইণ্ডিগ’ৰ এজন প্ৰশিক্ষাৰ্থী পাইলটে কৰ্মক্ষেত্ৰত জাতিগত বৈষম্যৰ অভিযোগ উত্থাপন কৰি কোম্পানীটোৰ তিনিগৰাকী শীৰ্ষ বিষয়াৰ বিৰুদ্ধে আৰক্ষীৰ এজাহাৰ দাখিল কৰিছে। অনুসূচিত জাতিৰ হোৱাৰ বাবে কেইবাবাৰো হাৰাশাস্তি কৰা বুলি অভিযোগ উত্থাপন কৰিছে ৩৫ বছৰীয়া প্ৰশিক্ষাৰ্থী পাইলটজনে।
এই ঘটনাৰ পিছত পাইলটগৰাকীয়ে বেংগালুৰু থানাত এফআইআৰ দাখিল কৰে। আৰক্ষীয়ে গোচৰটো ‘জিৰ’ এফআইআৰ’ হিচাপে গ্ৰহণ কৰে। পিছত গুৰুগ্ৰাম থানালৈ প্ৰেৰণ কৰে। এই এফ আই আৰত ইণ্ডিগোৰ তিনিজন জ্যেষ্ঠ বিষয়া তপস দে, মনীষ সাহনী আৰু কেপ্তেইন ৰাহুল পাটিলৰ নাম উল্লেখ কৰা হৈছে। এই আটাইকেইজনৰ বিৰুদ্ধে অনুসূচিত জাতি-জনজাতিৰ আইনৰ অধীনত গোচৰ ৰুজু কৰা হৈছে।
প্ৰশিক্ষাৰ্থী পাইলটজনে অভিযোগ কৰিছে যে ২৮ এপ্ৰিলত মুখ্য কাৰ্যালয়ত অনুষ্ঠিত হোৱা এখন বৈঠকৰ সময়ত তেওঁক অপমানজনক মন্তব্য কৰে। কোম্পানীটোৰ মুখ্য কাৰ্যালয়ৰ তিনিজন জ্যেষ্ঠ বিষয়াই তেওঁক অপমান কৰি ‘বিমান উৰুৱাবলৈ উপযুক্ত নহয়, উভতি গৈ জোতা চিলাই কৰৰাত নিয়োজিত হ’বলৈ কয়। আনকি এই অফিচত চকীদাৰ হ’বলৈ যোগ্য নহয় বুলিও মন্তব্য কৰিছিল।
প্ৰশিক্ষাৰ্থী পাইলটজনে অভিযোগ উত্থাপন কৰে যে তেওঁক চাকৰি এৰিবলৈও হেঁচা প্ৰয়োগ কৰা হৈছিল। লগতে তেওঁৰ দৰমহাৰ পৰা ধন কৰ্তন কৰাৰ লগতে বাৰে বাৰে সতৰ্কবাণী প্ৰেৰণ কৰাৰ অভিযোগ উত্থাপন কৰে। অৱশেষত প্ৰশিক্ষাৰ্থী পাইলটজন আৰক্ষীৰ কাষ চাপিবলৈ বাধ্য হয়।
ঘটনাটো পোহৰলৈ অহাৰ লগে লগে ইণ্ডিগ’ৰ বিৰুদ্ধে ক্ষোভ প্ৰকাশ কৰিছে নেটিজেনসকলে। লগতে অভিযুক্তক কঠোৰ শাস্তি প্ৰদানৰ দাবী জনাইছে। অৱশ্যে ইণ্ডিগই এই ঘটনা সন্দৰ্ভত কোনো স্পষ্টিকৰণ দিয়া নাই।
