ম্যানমাৰৰ গৃহযুদ্ধক কেন্দ্ৰ কৰি বিবিচি ৱৰ্ল্ডৰ তথ্যচিত্ৰৰ জৰিয়তে আন্তঃৰাষ্ট্ৰীয় এমি বঁটা লাভ কৰা সাংবাদিক দলটোৰ সৈতে সংযুক্ত হৈ মিজোৰামৰ দুজন সাংবাদিক এইচ চি ভানলালৰুয়াটা আৰু আইজাক জোৰামছাংগাই এক ঐতিহাসিক সফলতা অৰ্জন কৰিছে। উত্তৰ-পূৰ্বাঞ্চলৰ পৰা এমি বঁটা লাভ কৰা দলটোত অংশগ্ৰহণ কৰা তেওঁলোকে প্ৰথম সাংবাদিক হিচাপে স্বীকৃতি লাভ কৰিছে।
তেওঁলোকৰ তথ্যচিত্ৰ “Myanmar’s Civil War” — Outstanding Continuing News Coverage (Short Form) শ্ৰেণীত এমি বঁটা লাভ কৰিছে। মুখ্যমন্ত্ৰী লালডুহোমাই এই জয়ক “ঐতিহাসিক মুহূর্ত” বুলি অভিহিত কৰি তেওঁলোকৰ সাহস, নিষ্ঠা আৰু প্ৰতিবেদনৰ বাবে ভূয়সী প্ৰশংসা কৰে।
২০২৪ চনত ভানলালৰুৱাটা আৰু জোৰামছাংগা পাঁচজনীয়া বিবিচি দলৰ সৈতে ম্যানমাৰৰ চিন ষ্টেটলৈ ভ্ৰমণ কৰিছিল। চিন নেচনেল আর্মিৰ (CNA) মুখ্য ঘাঁটি কেম্প ভিক্টোৰিয়াত প্ৰতিবাদী সংগঠনৰ সাক্ষাৎকাৰ লোৱাৰ লগতে, দলটোৱে বোমা বিস্ফোৰণত ক্ষতিগ্রস্ত এখন গাঁওলৈও গৈ তথ্য সংগ্ৰহ কৰিছিল। তেওঁলোকে সংগ্ৰহ কৰা ফুটেজৰ আধাৰত নিৰ্মিত তথ্যচিত্ৰখনত ম্যানমাৰৰ সামৰিক জন্টাৰ হিংসাত্মক কৌশল অপহৰণ, হত্যাকাণ্ড, আৰু নৃশংসতা আৰু সেই সকলোবোৰৰ বিপৰীতে বিদ্ৰোহী গোটসমূহৰ উত্তৰাধুনিক প্ৰতিৰোধ প্ৰদর্শন কৰা হৈছে।
এই তথ্যচিত্ৰই জন্টাৰ সামৰিক বলৰ বিৰুদ্ধে কিদৰে ইএঅ’ (উপজাতিক সশস্ত্ৰ সংগঠন) আৰু গণতান্ত্ৰিক দলসমূহে বিভিন্ন অঞ্চলত প্ৰতিরোধ গঢ়ি তুলিছে সেয়াও দেখুৱাইছে।
উল্লেখ্য যে ২০২১ চনৰ ফেব্ৰুৱাৰীত ম্যানমাৰত সামৰিক অভ্যুত্থানৰ পাছত গৃহযুদ্ধ আৰম্ভ হয়। সামৰিক বাহিনীয়ে গণতন্ত্ৰিকভাৱে নিৰ্বাচিত আউং ছান ছু কি চৰকাৰ উৎখাত কৰে আৰু গোটেই দেশত ব্যাপক বিক্ষোভৰ সূচনা হয়। ইয়ে আৰাকান সেনাৰ দৰে জাতিগত গোটৰ সশস্ত্ৰ প্ৰতিবাদৰ জন্ম দিয়ে।
মিজোৰাম আৰু ম্যানমাৰৰ মাজত ৫০০ কিলোমিটাৰ সীমান্ত আছে। মিজোৰামবাসীয়ে সীমান্তৰ ওপাৰৰ মিজো জনগোষ্ঠীৰ সৈতে ঘনিষ্ঠ সাংস্কৃতিক আৰু জাতিগত সম্পৰ্ক বজাই ৰাখে। ২০২৪ৰ মার্চ মাহত মিজোৰামৰ ৰাজধানী আইজলত ম্যানমাৰৰ বহু বিদ্ৰোহী সংগঠনক একত্ৰিত কৰি এক চুক্তিত স্বাক্ষৰ কৰা হৈছিল, য’ত মুখ্যমন্ত্ৰী লালডুহোমাও উপস্থিত আছিল।
