২০২২ চনৰ পৰাই নাগৰিক ঐক্য মঞ্চই মহানগৰখনত তীব্ৰ হৈ উঠা পানীযোগানৰ সমস্যাটোৰ বিষয়ত পানীযোগান প্ৰকল্পসমূহৰ ক্ষিপ্ৰ ৰূপায়ণৰ বাবে, বিভিন্ন কাৰ্যসূচীৰ জৰিয়তে জনমত গঠন কৰি চৰকাৰৰ ওপৰত হেঁচা প্ৰয়োগ কৰি আহিছে। ইয়াৰ বাবে, জলবোৰ্ডকে ধৰি চৰকাৰী অনুষ্ঠান-বিভাগ আদিৰ লগত আলোচনাত মিলিত হোৱা, ন্যায়ালয়ত চলি থকা গোচৰত ইতিবাচক ভূমিকা পালন কৰা, সংবাদ মাধ্যমত সক্ৰিয় হৈ থকা আদি কামকাজো চলাই থকা হৈছে। ইয়াৰ অংশ হিচাপে, আজি ২/৭/২০২৫ তাৰিখে, গুৱাহাটী জলবোৰ্ডৰ খাৰঘূলীস্থিত কাৰ্যালয়ৰ সন্মুখত চাৰিওটা পানীযোগান প্ৰকল্প, বিশেষকৈ দক্ষিণ পূব গুৱাহাটী প্ৰকল্পটোৰ ক্ষিপ্ৰ ৰূপায়ণৰ দাবীত এটা ধৰ্ণা কাৰ্যসূচী পালন কৰে।এই কাৰ্যসূচীত মহানগৰখনৰ বিভিন্ন অঞ্চলৰ পৰা অহা পুৰুষ-মহিলাকে ধৰি সত্তৰজনমান ব্যক্তিৰ উপস্থিতিত এই কাৰ্যসূচী পালন কৰা হয় ।
ধৰ্ণা কাৰ্য্যসূচীৰ মাজতে নাগৰিক ঐক্য মঞ্চৰ এটা পাঁচজনীয়া প্ৰতিনিধি দলে জলবৰ্ডৰ সচিব, মূখ্য অভিযন্তা, প্ৰকল্প অভিযন্তা আদিৰ উপস্থিতিত এখন স্মাৰক পত্ৰ প্ৰদান কৰে।
এই স্মাৰক পত্ৰত উল্লেখ কৰা অনুসৰি…
২০০৯ চনত আৰম্ভ হোৱা প্ৰথমটো প্ৰকল্প অৰ্থাৎ দক্ষিণ-পশ্চিম গুৱাহাটী প্ৰকল্পটোৱে সোতৰ বছৰৰ দীৰ্ঘ পৰিক্ৰমাৰ অন্তত আৰু কিছুদিনৰ আগতে ইয়াক মেছাৰ্ছ এল এণ্ড টিক গতাই দিয়াৰ পিছতো ইয়াৰ অগ্ৰগতি মুঠেই সন্তোষজনক নহয়, আৰু ইয়াৰ যোগেদি এতিয়াও এলেকাটোৰ পাঁচ শতাংশ জনসংখ্যাকহে পানীযোগান ধৰিব পৰা গৈছে ।
চাৰিটা পানীযোগান প্ৰকল্পৰ ভিতৰত আটাইতকৈ ডাঙৰ আৰু চকুত পৰা দক্ষিণ মধ্য গুৱাহাটী প্ৰকল্পটো এতিয়াও সম্পূৰ্ণ হোৱাৰ পৰা বহু দূৰত; ইয়াৰ যোগেদি, এলেকাটোৰ পঞ্চাছ শতাংশ পৰিয়ালকো এতিয়ালৈকে পানীযোগান ধৰিব পৰা হোৱা নাই । আমি গম পোৱা মতে, ইতিমধ্যে, জাপানৰ প্ৰতিষ্ঠান জাইকাৰ অৰ্থসাহায্যৰ ম্যাদ ইতিমধ্যে উকলি গৈছে আৰু এতিয়া প্ৰকল্পটোৰ কামকাজ স্থবিৰ হৈ পৰা দেখা গৈছে ।
জাইকাৰ সাহায্যপ্ৰাপ্ত অতি ক্ষুদ্ৰ উত্তৰ গুৱাহাটী প্ৰকল্পটোৰ স্থিতিও অতি ৰহস্যজনক অৱস্থাত আছে । আজি বহুদিন ধৰি এই সৰু প্ৰকল্পটোৰ কাম সম্পূৰ্ণ হোৱা বুলি চৰকাৰে কৈ আছে যদিও এতিয়ালৈকে প্ৰজেক্ট এলেকাৰ অন্তৰ্গত এটা ঘৰেও পানী সংযোগ পোৱা নাই। অথচ, ইয়াৰ বাবেও এতিয়া জাইকাৰ অৰ্থসাহায্য বন্ধ হৈ গৈছে ।
আটাইতকৈ চিন্তনীয় হৈ আছে দক্ষিণ-পূব গুৱাহাটী প্ৰকল্প। দৰাচলতে, প্ৰথমাৱস্থাত সামান্য কাম হোৱাৰ পিছত, ২০১৯ চনৰ পৰাই এই প্ৰকল্পত কোনো কামকাজ চলা নাই; চৰকাৰে উচ্চ ন্যায়ালয়ত দাখিল কৰা শপতনামা মতেই, ২০২৯ চনৰ আগলৈকে, এই প্ৰকল্প ৰূপায়ণ হোৱাৰ আশা নাই । শেহতীয়াকৈ চৰকাৰে পিএমচি নিযুক্তি আৰু প্ৰকল্পটো ৰূপায়ণৰ (মানে, ইন-টে’ক পইণ্ট, পানী পৰিশোধন কেন্দ্ৰ, বাকী থকা তিনিটা জলাধাৰ আৰু প্ৰয়োজনীয় সংবহন আৰু বিতৰণ পাইপলাইন আদি কাম) বাবে ঠিকাদাৰক নিযুক্তি দিবলৈ নিবিদা আহ্বান কৰা পৰিলক্ষিত হৈছে যদিও প্ৰয়োজনীয় পুঁজিৰ প্ৰশ্নটো এতিয়াও অনিশ্চিত হৈ আছে। তেঁওলোকে প্ৰথম তিনিওটা প্ৰকল্পৰে ক্ষিপ্ৰ ৰূপায়ণ দাবী কৰাৰ লগতে দক্ষিণ পূব গুৱাহাটী প্ৰকল্প এলাকাত, ভূগৰ্ভৰ পানী চিন্তনীয়ভাৱে নিম্নগামী হৈছে আৰু এই প্ৰকল্প ৰূপায়ণ হ’বলৈও বহু বছৰ থকাৰ পৰিপ্ৰেক্ষিতত, অঞ্চলটোত অনতিপলমে বিনামূলীয়াকৈ পানীযোগানৰ ব্যৱস্থা কৰিবলৈ আৰু পানীযোগান সুনিশ্চিত নোহোৱালৈকে কোনো বহু-মহলীয়া ভৱনৰ নিৰ্মাণকাৰ্যত অনুমতি নিদিবলৈ চৰকাৰক দাবী জনাইছে।
