অসমৰ ক্ৰীড়া জগতৰ কিংবদন্তি অৰ্জুন ভোগেশ্বৰ বৰুৱাৰ নামত তিনিটা ৰাষ্ট্ৰীয় পুৰস্কাৰ প্ৰৱৰ্তন কৰাৰ কথা ঘোষণা কৰিছে অসম অলিম্পিক সন্থাই। দেওবাৰে গুৱাহাটীত অনুষ্ঠিত এক সংবাদমেলত সন্থাৰ সভাপতি তথা কেন্দ্ৰীয় মন্ত্ৰী সৰ্বানন্দ সোণোৱালে এই গুৰুত্বপূৰ্ণ সিদ্ধান্তৰ কথা ঘোষণা কৰে।
এছিয়ান গেমছৰ স্বৰ্ণপদক বিজয়ী তথা আন্তৰ্জাতিক পৰ্যায়ত অসমৰ প্ৰথম গৰাকী পদকজয়ী দৌৰবিদ হিচাপে ইতিহাস সৃষ্টি কৰা ভোগেশ্বৰ বৰুৱাৰ কৃতিত্বৰ প্ৰতি সন্মান জনোৱাৰ লক্ষ্যৰে এই পদক্ষেপ গ্ৰহণ কৰা হৈছে। অৰ্জুন বঁটা বিজয়ী এই প্ৰবীণ ক্ৰীড়াবিদগৰাকীৰ নামত তিনিটা শাখাত পুৰস্কাৰ প্ৰদান কৰা হ’ব:
- বছৰৰ শ্ৰেষ্ঠ ক্ৰীড়াবিদ বঁটা: ৫ লাখ টকাৰ নগদ পুৰস্কাৰ।
- বছৰৰ উদীয়মান ক্ৰীড়া প্ৰতিভা বঁটা: ২ লাখ টকাৰ নগদ পুৰস্কাৰ।
- ক্ৰীড়াত জীৱনজোৰা সাধনা বঁটা: ৩ লাখ টকাৰ নগদ পুৰস্কাৰ।
এই পুৰস্কাৰৰ বাবে ক্ৰীড়াবিদ নিৰ্বাচনৰ দায়িত্ব পালন কৰিব তিনিজনীয়া বিশেষ পেনেলে। পেনেলত থাকিব ক্ৰীড়াবিদ মনালিছা বৰুৱা, অভিজিৎ গোস্বামী আৰু অসম চৰকাৰৰ ক্ৰীড়া সচিব। পুৰস্কাৰসমূহ প্ৰদান কৰা হ’ব ৩ ছেপ্টেম্বৰত, ভোগেশ্বৰ বৰুৱাৰ জন্মদিনৰ দিনা, শিৱসাগৰত আয়োজিত এক বিশেষ অনুষ্ঠানত।
সৰ্বানন্দ সোণোৱালে কয়, “অতীতক সন্মান, বৰ্তমানক শক্তিশালী আৰু ভৱিষ্যতক প্ৰেৰণাৰে ভৰপূৰ কৰি ক্ৰীড়া ক্ষেত্ৰক অধিক গতিশীল কৰাৰ লক্ষ্যৰে এই পদক্ষেপ গ্ৰহণ কৰা হৈছে।” এই ঘোষণাই ৰাজ্যৰ ক্ৰীড়া জগতত নতুন উৎসাহৰ সঞ্চাৰ কৰিছে।
উল্লেখ্য যে, ভোগেশ্বৰ বৰুৱাৰ জন্মদিনক অসমত ‘অভিৰুচি ক্ৰীড়া দিৱস’ হিচাপে পালন কৰা হয়। তেওঁৰ নামত ৰাষ্ট্ৰীয় পৰ্যায়ৰ এই পুৰস্কাৰ প্ৰৱৰ্তনে ক্ৰীড়াপ্ৰেমীসকলৰ মাজত আনন্দৰ সৃষ্টি কৰাৰ লগতে অসমৰ ক্ৰীড়াৰ ভৱিষ্যতক উজ্জ্বল কৰাৰ প্ৰতিশ্ৰুতি প্ৰকাশ কৰিছে।
