মধ্য প্ৰাচ্যৰ পিছত এইবাৰ এছিয়াটো যুদ্ধৰ উকমুকনি দেখিবলৈ পোৱা গৈছে। শেহতীয়া খবৰ অনুসৰি চীনৰ যুদ্ধ বিমানে টাইৱানৰ আকাশ সীমা উলংঘন কৰি বৃহৎ পৰিসৰত অনুপ্ৰৱেশ কৰইছে। এই বিমানসমূহে টাইৱানৰ উত্তৰ, দক্ষিণ-পশ্চিম আৰু পূব সীমান্তৰ চাৰিওফালৰ পৰা প্ৰৱেশ কৰিছে। ইয়াৰ প্ৰতিক্ৰিয়া হিচাপে টাইৱানৰ সেনাও সক্ৰিয় হৈ পৰিছে আৰু চীনক প্ৰত্যুত্তৰ দিবলৈ প্ৰস্তুতি চলাইছে।
মধ্যপ্ৰাচ্য আৰু ইউৰোপৰ পিছত এতিয়া এছিয়াত নতুন যুদ্ধৰ আশংকা প্ৰকাশ পাইছে। এই উত্তেজনাৰ মূল কাৰণ হৈছে চীনৰ আগ্ৰাসী মনোভাৱ। টাইৱান দখলৰ উদ্দেশ্যে চীনে ক্ষিপ্ৰগতিত প্ৰস্তুতি চলাইছে। মঙলবাৰে এই আশংকাৰ স্পষ্ট ইংগিত পোৱা গৈছিল, যেতিয়া টাইৱানৰ আকাশত ২১খন চীনৰ যুদ্ধ বিমান দেখা গৈছিল। এই ঘটনাৰ পিছত টাইৱানেও প্ৰতিৰক্ষাৰ প্ৰস্তুতি তীব্ৰতৰ কৰিছে।
দক্ষিণ চীন সাগৰত নিজৰ প্ৰভাৱ বৃদ্ধিৰ বাবে চীনে যিকোনো সময়তে টাইৱানৰ ওপৰত আক্ৰমণ চলাব পাৰে। এই উদ্দেশ্যে চীনৰ যুদ্ধ বিমানে টাইৱানৰ সীমান্তত বাৰে বাৰে অনুপ্ৰৱেশ কৰি আছে। মঙলবাৰে চীনৰ যুদ্ধ বিমানৰ এনে অনুপ্ৰৱেশৰ সময়ত টাইৱানৰ এটা কাৰখানাত বিস্ফোৰণ সংঘটিত হয়। এই বিস্ফোৰণৰ কাৰণ স্পষ্ট নহ’লেও টাইৱানৰ ধাৰণা যে ইয়াৰ পিছত চীনৰ হাত থাকিব পাৰে।
চীন এতিয়া টাইৱানৰ বাবে প্ৰধান ভাবুকি হৈ পৰিছে। টাইৱানৰ ৰাষ্ট্ৰপতি লাই চিং টেৰ বাবে এই পৰিস্থিতিৰ সৈতে মোকাবিলা কৰাটো কঠিন হৈ পৰিছে। ইয়াৰ এটা কাৰণ হৈছে আমেৰিকাৰ সাবেক ৰাষ্ট্ৰপতি ট্ৰাম্পৰ মনোভাৱ। ট্ৰাম্পৰ নীতিৰ ফলত টাইৱানৰ নিৰাপত্তাৰ নিশ্চয়তা দুৰ্বল হৈ পৰিছে, কাৰণ তেওঁৰ ভূমিকা কেৱল অস্ত্ৰ যোগানৰ মধ্যে সীমাবদ্ধ হৈছে। এই পৰিস্থিতিৰ সুবিধা লৈ চীনে আগ্ৰাসী নীতি অৱলম্বন কৰিছে।
১৫ জুলাইৰ পুৱা ৬ বজাত চীনৰ যুদ্ধ বিমানে পুনৰ টাইৱানৰ আকাশ সীমাত অনুপ্ৰৱেশ কৰে। এই সময়ত ২৬খন যুদ্ধ বিমানৰ লগতে চীনৰ নৌসেনাৰ ৭খন জাহাজো টাইৱানৰ অঞ্চলত টহল দি থকা দেখা গৈছিল। ইয়াৰ উপৰিও টাইৱানৰ কেন্দ্ৰীয় ৰেখাৰ ওচৰত চীনৰ এখন বিমানবাহী জাহাজো লক্ষ্য কৰা গৈছিল। এই ২৬খন বিমানৰ ভিতৰত ২১খনে টাইৱানৰ উত্তৰ, দক্ষিণ-পশ্চিম আৰু পূব সীমান্ত উলংঘন কৰিছিল। ইয়াৰ প্ৰতিক্ৰিয়াত টাইৱানৰ সেনাই সীমান্তত সৈন্য সমদল কৰাৰ লগতে চীনৰ বিৰুদ্ধে প্ৰতিৰক্ষামূলক অনুশীলন আৰম্ভ কৰিছে।
উল্লেখ্য যে বিগত সাত দিন ধৰি চীনে দক্ষিণ চীন সাগৰত ‘হান কুৱাং’ নামৰ সামৰিক অনুশীলন চলাই আহিছে। এই অনুপ্ৰৱেশ এই অনুশীলনৰ সময়ত সংঘটিত হৈছিল। ফলত টাইৱানেও সীমান্তত লেণ্ডিং বিৰোধী অনুশীলন আৰম্ভ কৰিছে। এই অনুশীলনত ষ্টিংগাৰ ক্ষেপণাস্ত্ৰৰে সজ্জিত সৈন্যই অংশগ্ৰহণ কৰিছে। লজিষ্টিক যোগানৰ বাবে মেট্ৰ’ পথৰ জৰিয়তে প্ৰস্তুতি চলাইছে। একে সময়তে চীনৰ জাহাজ ধ্বংসৰ প্ৰশিক্ষণ আৰু বায়ুসেনাৰ ৰাণৱে মেৰামতিৰ কামো আৰম্ভ কৰিছে, যাতে যিকোনো পৰিস্থিতিৰ সৈতে মোকাবিলা কৰিব পৰা যায়।
