অসমৰ বঙাইগাঁও জিলাৰ যোগীঘোপাত মানস নদীৰ পাৰত চলি থকা অবৈধ খননে গুৰুতৰ সমস্যাৰ সৃষ্টি কৰিছে। নদীৰ তলৰ পৰা অবিৰত মাটি খননৰ ফলত নদীৰ প্ৰাকৃতিক প্ৰবাহৰ ক্ষতি হোৱাৰ লগতে পৰিৱেশৰ ওপৰত মাৰাত্মক বিপদৰ আশংকাৰ বিষয়ে স্থানীয় লোকে সতৰ্কবাণী জাৰি কৰিছে।
গাঁওবাসীৰ মতে, ট্ৰেক্টৰ আৰু ডাম্পাৰৰ দৰে গধুৰ যন্ত্ৰপাতিৰে অহৰহ খনন কাৰ্য চলোৱা হৈছে, যাৰ ফলত বায়ু আৰু শব্দ প্ৰদূষণৰ মাত্ৰা বৃদ্ধি পাইছে। এই প্ৰদূষণৰ ফলত ছাত্ৰ-ছাত্ৰীৰ শিক্ষাৰ ক্ষেত্ৰত ব্যাঘাত ঘটিছে আৰু বায়ুৰ গুণাগুণ হ্রাস পোৱাৰ বাবে স্বাস্থ্যজনিত সমস্যাৰ সৃষ্টি কৰিব বুলি উদ্বেগ প্ৰকাশ কৰিছে স্থানীয় ৰাইজে।
স্থানীয় এক শক্তিশালী গোটৰ দ্বাৰা পৰিচালিত এই অবৈধ খননৰ ফলত মানস নদীৰ খহনীয়া তীব্ৰতৰ হৈছে বুলি গাঁওবাসীয়ে অভিযোগ উত্থাপন কৰিছে। নদীৰ সংৰক্ষিত অঞ্চলত চলি থকা এই কাৰ্যকলাপৰ বিৰুদ্ধে বন বিভাগৰ নিষ্ক্ৰিয়তাত স্থানীয় লোকসকল হতাশ হৈ পৰিছে।
