উত্তৰ-পূৰ্বাঞ্চলৰ শীৰ্ষস্থানীয় উচ্চ শিক্ষাপ্ৰতিষ্ঠান গুৱাহাটী বিশ্ববিদ্যালয়ৰ অধীনত ২০২৫ বৰ্ষৰ বি.এড. প্ৰৱেশিকা পৰীক্ষা (GUBEDCET-2025) আজি ২০ জুলাই তাৰিখে সমগ্ৰ অসমজুৰি সফলতাৰে সম্পন্ন হৈছে।
বিশ্ববিদ্যালয়ৰ উপাচাৰ্য অধ্যাপক ননী গোপাল মহন্তই এই সন্দৰ্ভত প্ৰকাশ কৰি কয়, “গুৱাহাটী বিশ্ববিদ্যালয়ে সদায় অসম তথা উত্তৰ-পূৰ্বাঞ্চলৰ শিক্ষা ক্ষেত্ৰত গুৰুত্বপূৰ্ণ অৱদান আগবঢ়াই আহিছে। শিক্ষাৰ্থীসকলৰ সপোন বাস্তৱায়িত কৰাৰ ক্ষেত্ৰত আমি দৃঢ় সংকল্পবদ্ধ। আশা কৰোঁ, এই পৰীক্ষাত অৱতীৰ্ণ প্ৰাৰ্থীসকলৰ ফলাফল সন্তোষজনক হ’ব।”
অসমৰ ১৬খন চহৰত থকা ১৮টা পৰীক্ষা কেন্দ্ৰত অনুষ্ঠিত হোৱা এই প্ৰৱেশিকা পৰীক্ষাত মুঠ ১৫,২৮২ জন আবেদনকাৰীৰ ভিতৰত ১৪,৭৬০ গৰাকী প্ৰাৰ্থীয়ে পৰীক্ষাত অংশগ্ৰহণ কৰে। কেৱল গুৱাহাটী বিশ্ববিদ্যালয়ৰ কেন্দ্ৰতেই ৩,৩৩২ গৰাকী প্ৰাৰ্থীয়ে অৱতীৰ্ণ হয়। পৰীক্ষাত অংশগ্ৰহণৰ হাৰ ৯৬.৫৮% আছিল, যিটো উচ্চ শিক্ষাৰ ক্ষেত্ৰত এক যথেষ্ট উৎসাহব্যঞ্জক দিশ।
টাইমছ হায়াৰ এডুকেচন ৱৰ্ল্ড ইউনিভাৰ্চিটি ৰেংকিং ২০২৫ আৰু ৰাষ্ট্ৰীয় মূল্যায়ন আৰু স্বীকৃতি পৰিষদ (NAAC) ৰ A+ শ্ৰেণীভুক্ত স্বীকৃতি লাভ কৰা গুৱাহাটী বিশ্ববিদ্যালয়ে শৈক্ষিক ক্ষেত্ৰত গৌৰৱৰপূৰ্ণ স্থান অধিকাৰ কৰি আহিছে।
বিশ্ববিদ্যালয়ৰ পঞ্জীয়ক অধ্যাপক উৎপল শৰ্মাই এই পৰীক্ষা সম্পৰ্কে মত প্ৰকাশ কৰি কয়, “GUBEDCET-2025 ৰ সফলতা গুৱাহাটী বিশ্ববিদ্যালয়ৰ সুদক্ষ পৰিকল্পনা আৰু শৈক্ষিক উৎকৰ্ষতাৰ প্রতিফলন। আমি সংশ্লিষ্ট সকলো কৰ্তৃপক্ষক ধন্যবাদ জ্ঞাপন কৰিছোঁ আৰু সকলো প্ৰাৰ্থীলৈ শুভেচ্ছা জ্ঞাপন কৰিছোঁ।”
