ইণ্ডোনেছিয়াৰ এখন যাত্ৰীবাহী জাহাজত সাগৰৰ মাজতে অগ্নিকাণ্ডৰ ঘটনা সংঘটিত হয়। এই ঘটনাত কমেও ৫ জন লোকৰ মৃত্যু হৈছে। দেওবাৰে চুলাৱেছি দ্বীপৰ সমীপত সংঘটিত হয় এই দুৰ্ঘটনা।
এক বিবৃতিত উপকূলৰক্ষী বাহিনীয়ে কয় যে সৰু জাহাজখন উত্তৰ চুলাৱেছি প্ৰদেশৰ ৰাজধানী মানাডো অভিমুখে গৈ আছে। কে এম বাৰ্চিলোনা ৫ নামৰ জাহাজখনত হঠাতে সাগৰৰ মাজত জুই লগাত কেইবাজনো যাত্ৰীয়ে নিজৰ জীৱন ৰক্ষাৰ বাবে সাগৰত জপিয়াই পৰে।
ইণ্ডোনেছিয়াৰ সামুদ্ৰিক সুৰক্ষা সংস্থা ‘বাকামালা’ই জানিবলৈ দিয়া মতে জাহাজখনত ৩০০জন যাত্ৰী আছিল। “এতিয়ালৈকে এই দুৰ্ঘটনাত ৫ জন লোকৰ মৃত্যু হোৱাৰ খবৰ পোৱা গৈছে। ২৮৪ জন লোকক নিৰাপদে উদ্ধাৰ কৰা হৈছে।”
স্থানীয় সময় অনুসৰি দুপৰীয়া প্ৰায় ১:৩০ বজাত জাহাজখনত অগ্নিকাণ্ড সংঘটিত হয়। ওপৰৰ ডেকবোৰ দাউ দাউকৈ জ্বলিবলৈ ধৰে। ক’লা ধোঁৱাই আকাশ ছানি ধৰিছিল। ছ’চিয়েল মিডিয়াত বিয়পি পৰা কেইবাখনো ছবি আৰু ভিডিঅ’ত দেখা গৈছে যে আতংকিত যাত্ৰীসকলে লাইফ জেকেট পিন্ধি সাগৰত জপিয়াই পৰিছে।
আব্দুল ৰহমাদ আগু নামৰ এজন যাত্ৰীয়ে ফেচবুক যোগে দুৰ্ঘটনাস্থলীৰ লাইভ ষ্ট্ৰীম কৰে। তেওঁ নিজেই লাইফ জেকেট পিন্ধি সাগৰত ওপঙি আছিল। কোলাত এটি শিশু লৈ ওপঙি থকা দেখা গৈছে আগুক।
উদ্ধাৰ কৰা যাত্ৰীসকলৰ এজন আৰক্ষীৰ পত্নীয়ে স্থানীয় ইণ্ডোনেছিয়াৰ সংবাদ মাধ্যমৰ আগত কয় যে তেওঁলোক প্ৰায় এঘণ্টা ধৰি পানীত ওপঙি আছিল। ইয়াৰ পিছতে তেওঁলোকক উদ্ধাৰ কৰিবলৈ নৌসেনা আহি উপস্থিত হয়।
উদ্ধাৰ অভিযান সন্দৰ্ভত অভিযোগ উত্থাপন হ’লেও এখন এখনকৈ তিনিখন জাহাজ ঘটনাস্থলীত উপস্থিত হৈ যাত্ৰীসকলক নিৰাপদে গন্তব্যস্থানলৈ লৈ যায়। ইপিনে, দুৰ্ঘটনাৰ কাৰণ জানিবলৈ তদন্ত আৰম্ভ কৰা হৈছে। অৱশ্যে জাহাজখনত কি কাৰণত অগ্নিকাণ্ড সংঘটিত হৈছিল তাক লৈ এতিয়াও বিভ্ৰান্তিৰ সৃষ্টি হৈছে।
