উপ-ৰাষ্ট্ৰপতি জগদীপ ধনখাৰৰ পদত্যাগৰ পিছত দেশৰ ৰাজনৈতিক মহলত মিশ্ৰিত প্ৰতিক্ৰিয়া দেখিবলৈ পোৱা গৈছে। উপ ৰাষ্ট্ৰপতিৰ পদত্যাগৰ পিছতে সৰৱ হৈ পৰিছে কংগ্ৰেছ। কংগ্ৰেছে দাবী কৰিছে যে তেওঁৰ উল্লেখ কৰা স্বাস্থ্যজনিত কাৰণতকৈ অধিক গভীৰ কাৰণ আছে পদ ত্যাগৰ আঁৰত। কংগ্ৰেছৰ মতে, এই পদত্যাগে ধনখৰৰ ব্যক্তিগত সততাৰ প্ৰশংসা কৰে, কিন্তু তেওঁক এই পদত নিৰ্বাচিত কৰা লোকসকলৰ ওপৰত নেতিবাচক প্ৰভাৱ পেলোৱা বুলি উল্লেখ কৰিছে।
কংগ্ৰেছৰ সাধাৰণ সম্পাদক জয়ৰাম ৰমেশে কয় যে ধনখৰে সোমবাৰে (২১ জুলাই, ২০২৫) দুপৰীয়া ১২:৩০ বজাত ৰাজ্যসভাৰ ব্যৱসায়িক পৰামৰ্শ সমিতিৰ (বিএচি) এখন বৈঠকৰ সভাপতিত্ব কৰিছিল। এই বৈঠকত গৃহৰ নেতা জে পি নড্ডা আৰু সংসদীয় পৰিক্ৰমা মন্ত্ৰী কিৰেন ৰিজিজুৰ সৈতে বহু সদস্য উপস্থিত আছিল। আলোচনাৰ পিছত, বিএচিৰ পুনৰ বৈঠকৰ সময় নিৰ্ধাৰণ কৰা হৈছিল বিয়লি ৪:৩০ বজাত।
ৰমেশে কয়, “বিয়লি ৪:৩০ বজাত বিএচিৰ বৈঠক পুনৰ অনুষ্ঠিত হৈছিল, কিন্তু নড্ডা আৰু ৰিজিজু উপস্থিত নাছিল। ধনখৰক এই দুই জ্যেষ্ঠ মন্ত্ৰীৰ অনুপস্থিতিৰ কথা জনোৱা হোৱা নাছিল। এই কাৰণে তেওঁ ক্ষুব্ধ হৈ পৰৱৰ্তী বৈঠক মঙলবাৰে দুপৰীয়া ১ বজালৈ পিছুৱাই দিছিল।”
ৰমেশে দাবী কৰে যে সোমবাৰে দুপৰীয়া ১ বজাৰ পৰা ৪:৩০ বজাৰ ভিতৰত কিবা এটা গুৰুতৰ ঘটনা ঘটিছিল, যাৰ ফলত নড্ডা আৰু ৰিজিজু ইচ্ছাকৃতভাৱে বৈঠকত অনুপস্থিত আছিল। তেওঁ কয়, “এক অভূতপূৰ্ব পদক্ষেপত ধনখৰে পদত্যাগ কৰিছে। তেওঁ স্বাস্থ্যজনিত কাৰণ দেখুৱাইছে, যিটো আমি সন্মান কৰোঁ। কিন্তু এই পদত্যাগৰ পিছত অধিক গভীৰ কাৰণ আছে।”
ৰমেশে আৰু কয় যে ধনখৰে সদায় ২০১৪ৰ পিছৰ ভাৰতৰ প্ৰশংসা কৰিছিল, কিন্তু কৃষকৰ কল্যাণ, ৰাজনৈতিক অহংকাৰৰ বিৰোধিতা আৰু ন্যায়িক জবাবদিহিতাৰ পক্ষত সাহসেৰে কথা কৈছিল। তেওঁ বৰ্তমানৰ শাসন ব্যৱস্থাৰ মাজতো বিৰোধী দলক সম্মান জনাইছিল আৰু সংসদীয় নিয়ম-নীতিৰ প্ৰতি কঠোৰ আছিল।
উল্লেখ্য যে ধনখাৰে ২১ জুলাইত স্বাস্থ্যজনিত কাৰণ দেখুৱাই ৰাষ্ট্ৰপতি দ্ৰৌপদী মুৰ্মুৰ ওচৰত পদত্যাগপত্ৰ জমা দিছিল। তেওঁৰ এই পদক্ষেপক কংগ্ৰেছে অপ্ৰত্যাশিত আৰু ব্যাখ্যাৰ অযোগ্য বুলি অভিহিত কৰিছে। ৰমেশে কয় যে তেওঁ একে দিনৰ সন্ধিয়া ৫ বজালৈ ধনখৰৰ সৈতে আছিল আৰু ৭:৩০ বজাত ফোনত কথা পাতিছিল, কিন্তু তেওঁ পদত্যাগৰ কোনো ইংগিত দিয়া নাছিল।
কংগ্ৰেছে প্ৰধানমন্ত্ৰী নৰেন্দ্ৰ মোদীক ধনখৰক তেওঁৰ সিদ্ধান্ত পুনৰবিবেচনা কৰিবলৈ প্ৰেৰণা দিয়াৰ আহ্বান জনাইছে। তেওঁ ২০২২ চনৰ আগষ্টত উপ-ৰাষ্ট্ৰপতিৰ পদ গ্ৰহণ কৰিছিল আৰু তেওঁৰ কাৰ্যকাল ২০২৭ চনলৈ আছিল। যিহেতু উপৰাষ্ট্ৰাপতিয়ে ৰাজ্যসভাৰ অধ্যক্ষ হিচাপেও কাৰ্যনিৰ্বাহ কৰে, তেনেস্থলত সংসদৰ বৰ্ষাকালীন অধিৱেশনৰ প্ৰথম দিনাই তেওঁ পদত্যাগকলৈ চলিছে সৰৱ চৰ্চা। এতিয়া অধ্যক্ষৰ অনুপস্থিতিত উপাধ্যক্ষই সদনৰ কাম কাজ আগোৱাই নিব।
প্ৰসংগ ক্ৰমে ধনখৰে শেহতীয়াকৈ দিল্লীৰ এইমছত এঞ্জিঅ’প্লাষ্টী কৰিছিল। ইয়াৰোপৰি তেওঁৰ ৰাজ্যসভাৰ অধ্যক্ষ থকা সময়ছোৱাত বিৰোধী দলৰ সৈতে কেইবাটাও সংঘাত হৈছিল, আনকি তেওঁৰ বিৰুদ্ধে অপসাৰণৰ প্ৰস্তাৱো আগবঢ়োৱা হৈছিল, যিখন পিছত ৰাজ্যসভাৰ উপাধ্যক্ষই নাকচ কৰিছিল।
