‘আদালতত হাজিৰ হোৱাৰ সাহসকনো নাই?’ জালিয়াতিৰ গোচৰত CBIৰ অনুপস্থিতিত ক্ষুব্ধ উচ্চতম ন্যায়ালয়
ইণ্ডিয়াবুলছ হাউছিং ফাইনেন্সৰ বিৰুদ্ধে উত্থাপিত ধন আত্মসাৎৰ অভিযোগ সন্দৰ্ভত উচ্চতম ন্যায়ালয়ৰ শুনানিৰ সময়ত চিবিআইৰ অনুপস্থিতিৰ বাবে কঠোৰ ভাষাৰে ভৎৰ্সনা কৰে দেশৰ শীৰ্ষ আদালতে। পূৰ্বে জাননী প্ৰেৰণ কৰাৰ পিছতো কেন্দ্ৰীয় চোৰাংচোৱা সংস্থা চিবিআই আদালতত হাজিৰ নোহোৱা দেখি ন্যায়াধীশসকলৰ বিচাৰপীঠ বিস্মিত আৰু বিৰক্ত হৈ পৰে।
‘জাননী পঠোৱাৰ পিছতো যদি নাহে, তেন্তে আদালতত হাজিৰ নহয় বুলি তেওঁলোকে কেনেকৈ ক’ব পাৰে?’ একেবাৰে বিস্ময় প্ৰকাশ কৰি আদালতে মন্তব্য কৰে।
জানিব পৰা মতে, দিল্লী উচ্চ ন্যায়ালয়ত যি গোচৰটোত আদালতৰ নিৰ্দেশত তদন্তৰ আবেদন নাকচ কৰা হৈছিল, সেই নিৰ্দেশক উচ্চতম ন্যায়ালয়ত প্ৰত্যাহ্বান জনাইছিল। এই গোচৰৰ মূল বিষয় হৈছে ইণ্ডিয়াবুলছ হাউছিং ফাইনেন্স লিমিটেড (বৰ্তমান ‘সম্মান কেপিটেল লিমিটেড’ নামেৰে পৰিচিত)ৰ প্ৰমোটাৰৰ বিৰুদ্ধে বৃহৎ পৰিমাণৰ ধন আত্মসাৎ কৰাৰ অভিযোগ।
আবেদনকাৰীৰ অধিবক্তা প্ৰশান্ত ভূষণে আদালতত কয় যে বলবৎকাৰী সঞ্চালকালয়ে যিহেতু পূৰ্বৰ কোনো অপৰাধৰ ভিত্তিত গোচৰ ৰুজু কৰিব নোৱাৰে গতিকে তদন্ত আগবঢ়াব নোৱাৰে। সেয়ে চিবিআইক পোনপটীয়াকৈ গোচৰ পঞ্জীয়ন কৰিবলৈ অনুৰোধ জনোৱা হৈছে।
এই গোচৰত ন্যায়াধীশ সূৰ্যকান্তৰ নেতৃত্বত থকা বিচাৰপীঠে স্পষ্টকৈ উল্লেখ কৰিছে যে এনে অভিযোগে যথেষ্ট গুৰুত্ব দাবী কৰে৷ এনে ক্ষেত্ৰত কেন্দ্ৰীয় তদন্তকাৰী সংস্থাসমূহে বিষয়টোৰ ওপৰত নিৰপেক্ষ তদন্ত কৰি আদালতত প্ৰতিবেদন দাখিল কৰা উচিত আছিল।
বিচাৰপীঠে কয়, ‘অভিযোগ গুৰুতৰ। কেন্দ্ৰীয় সংস্থাসমূহে তদন্ত কৰি প্ৰতিবেদন দাখিল কৰিব লাগিছিল। আৰু যিহেতু জাননী পঠিওৱা হৈছিল, তেন্তে CBI আদালতলৈ কিয় নাহিল? সাহসকনো নাই?’
এই পৰ্যায়ত অতিৰিক্ত ছলিচিটৰ জেনেৰেলে আদালতৰ পৰা এসপ্তাহৰ সময় বিচাৰে যাতে তেওঁ চিবিআইৰ পৰা নিৰ্দেশনা ল’ব পাৰে। আদালতে আবেদন মঞ্জুৰ কৰিলে যদিও স্পষ্ট কৰি দিলে যে চিবিআইক নিজৰ কাম কৰিবলৈ কোনো‘আনুষ্ঠানিক অভিযোগকাৰী’ৰ প্ৰয়োজন নাই। তেওঁলোকৰ হাতত তথ্য আৰু প্ৰমাণ থাকিলেই যথেষ্ট। বিচাৰপীঠে কয়, ‘আৰু কি তথ্যৰ প্ৰয়োজন? তেওঁলোকৰ হাতত সকলো ৰেকৰ্ড আগৰে পৰা আছে।’
ইণ্ডিয়াবুলছৰ হৈ হাজিৰ হোৱা জ্যেষ্ঠ অধিবক্তা মুকুল ৰোহাটগীয়ে যুক্তি দাঙি ধৰি কয় যে ইণ্ডিয়াবুলছে বহু বছৰ ধৰি কাম কৰি আহিছে আৰু ইয়াৰ বিৰুদ্ধে কেতিয়াও কোনো অভিযোগ উত্থাপন হোৱা নাই। এই গোচৰৰ পৰৱৰ্তী শুনানি ৩০ জুলাইত অনুষ্ঠিত হ’ব।
