ব্ৰহ্মপুত্ৰ নদীত চীনৰ আটাইটকৈ বৃহৎ নদী বান্ধ নিৰ্মানৰ কথা ঘোষণাৰ পিছতে ইয়াৰ পৰা হ’ব পৰা ভয়াবহ পৰিণতিক লৈ সচেতন ৰাইজে উদ্বেগ প্ৰকাশ কৰা সময়তে, অসমৰ মুখ্যমন্ত্ৰী হিমন্ত বিশ্ব শৰ্মাই কয় যে ব্ৰহ্মপুত্ৰ নদীত চীনৰ ১৬৭.৮ বিলিয়ন ডলাৰৰ ব্যয় সাপেক্ষে নিৰ্মান হ’বলগীয়া নতুন জলবিদ্যুৎ প্ৰকল্পক লৈ কোনো আতংকিত হোৱাৰ কোনো তাৎক্ষণিক কাৰণ নাই বুলি উল্লেখ কৰে। গুৱাহাটীত ভাষণ দি তেওঁ বুজাই দিয়ে যে নদীখন কেৱল তিব্বতৰ পানীৰ ওপৰত নিৰ্ভৰশীল নহয়, য’ত চীনে মথাউৰি নিৰ্মাণ কৰি আছে। বৰঞ্চ ব্ৰহ্মপুত্ৰৰ বহুখিনি পানী অৰুণাচল প্ৰদেশ, ভূটান, আৰু অসমৰ বৰষুণৰ পৰা আহে।
ভাৰত-চীন সীমান্তৰ সমীপৰ তিব্বতৰ নিয়িংচি চহৰত চীনে এই বৃহৎ নদীবান্ধ নিৰ্মাণৰ কাম আৰম্ভ কৰে। ইয়াৰ দ্বাৰা ৩০ কোটিতকৈ অধিক লোকৰ বাবে পৰ্যাপ্ত বিদ্যুৎ উৎপাদন হোৱাৰ সম্ভাৱনা আছে, যাৰ ফলত ই চীনৰ থ্ৰী গৰ্জ বান্ধতকৈও ডাঙৰ হ’ব। কিন্তু ভাৰত আৰু বাংলাদেশৰ বিশেষজ্ঞসকলে চিন্তিত যে ইয়াৰ দ্বাৰা তলৰ পানীৰ প্ৰবাহ হ্ৰাস পাব পাৰে বা সংঘাতৰ সময়ত পানী নিয়ন্ত্ৰণৰ বাবে ব্যৱহাৰ কৰিব পাৰে।
ইফালে শৰ্মাই উল্লেখ কৰে যে বান্ধটোৰ প্ৰভাৱ স্পষ্ট নহয়। একাংশ বিশেষজ্ঞই কয় যে কম পানীয়ে অসমৰ জৈৱ বৈচিত্ৰ্যৰ ক্ষতি কৰিব পাৰে, আনহাতে আন কিছুমানে বিশ্বাস কৰে যে ইয়াৰ ফলত বানপানী হ্ৰাস পাব পাৰে। বৰষুণীয়া, ভূমিকম্পৰ প্ৰৱণ অঞ্চলত বান্ধটোৰ অৱস্থানে ইয়াৰ সুৰক্ষাৰ প্ৰতি উদ্বেগ বৃদ্ধি কৰিছে।
উল্লেখনীয় ২০০৬ চনত স্থাপন কৰা এক্সপাৰ্ট লেভেল মেকানিজম নামৰ মঞ্চৰ জৰিয়তে দুয়োখন দেশে নদীৰ তথ্য ভাগ-বতৰা কৰে। এই ধৰণৰ প্ৰকল্পৰ সৈতে পৰিৱেশ ভাৰসাম্যতা, ভূৰাজনৈতিক তথা বৈদেশিক নীতিৰ দৰে দিশসমূহও অন্তৰ্ভুক্ত হৈ আছে। এনে পৰিস্থিতিত বিশেষজ্ঞৰ পৰ্যৱেষণ আৰু অধ্যয়নৰ জৰিয়তে কোনো ক্ষয় ক্ষতি নোৱাকৈ সিদ্ধান্তলৈ অহাতো বিশেষজ্ঞসকলৰ লগতে সাধাৰণ ৰাইজেও বিচাৰে।
