ফ্ৰান্সৰ ৰাষ্ট্ৰপতি ইমানুৱেল মেক্ৰ’নে পেলেষ্টাইনক ৰাষ্ট্ৰ হিচাপে স্বীকৃতি প্ৰদানৰ ঘোষণা কৰা পিছতে আন্তৰ্জাতিক মঞ্চত তীব্ৰ সমলোচনাৰ সন্মুখীন হৈছে। ২০২৫ চনৰ ২৫ জুলাইত তেওঁ ঘোষণা কৰে যে আগন্তুক ছেপ্টেম্বৰত ৰাষ্ট্ৰসংঘৰ সাধাৰণ সভাত ফ্ৰান্সে পেলেষ্টাইনক আনুষ্ঠানিকভাৱে স্বীকৃতি প্ৰদান কৰিব। মধ্যপ্ৰাচ্যত এক স্থায়ী আৰু ন্যায়সঙ্গত শান্তিৰ প্ৰতিশ্ৰুতি পুনৰ নিশ্চিত কৰা উদ্দেশ্যে তেওঁ এই সিদ্ধান্ত গ্ৰহণ কৰা বুলি মত প্ৰকাশ কৰিছে।
মেক্ৰ’নে গাজাত চলি থকা যুদ্ধৰ তীব্ৰতা হ্ৰাস কৰাৰ বাবে এক মানৱীয় যুদ্ধবিৰতিৰ আহ্বান জনাইছে, যাতে জনসাধাৰণৰ বাবে জৰুৰী সহায়ৰ ব্যৱস্থা কৰিব পৰা যায়। তেওঁৰ মতে, গাজাৰ জনসাধাৰণৰ মৌলিক প্ৰয়োজনীয়তা যেনে খাদ্য, পানী, স্বাস্থ্যসেৱা নিশ্চিত কৰাটো এতিয়া অতি জৰুৰী। ইতিমধ্যে ফ্ৰান্সে ২০২৩ চনত পেলেষ্টাইনৰ জনসাধাৰণৰ বাবে ১০০ মিলিয়ন ইউৰো মানৱীয় সহায়ৰ প্ৰতিশ্ৰুতি দিছিল, যিটো ৰাষ্ট্ৰসংঘৰ মাধ্যমেৰে প্ৰদান কৰা হৈছিল।
কিন্তু এই সিদ্ধান্তই ক্ষুব্ধ কৰি তুলিছে ইজৰাইলক। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে মেক্ৰ’নৰ এই ঘোষণাক “সন্ত্ৰাসবাদক পুৰস্কৃত কৰা” আৰু “ইৰানৰ প্ৰক্সি ৰাষ্ট্ৰ সৃষ্টিৰ কৌশল” বুলি অভিহিত কৰিছে। তেওঁৰ মতে, ২০২৩ চনৰ ৭ অক্টোবৰত হামাছৰ আক্ৰমণৰ পিছত এনে সিদ্ধান্ত গ্ৰহণ কৰাটো গ্ৰহণযোগ্য হোৱা নাই। ইজৰাইলৰ বৈদেশিক মন্ত্ৰীয়ে এই পদক্ষেপক “লজ্জাজনক” বুলি মন্তব্য কৰি শান্তি প্ৰক্ৰিয়াক বাধাগ্ৰস্ত কৰিব পাৰে বুলি মতপ্ৰকাশ কৰিছে।
অন্যহাতে, ফ্ৰান্সৰ এই পদক্ষেপে পশ্চিম ইউৰোপৰ দেশসমূহৰ মাজতো মিশ্ৰিত প্ৰতিক্ৰিয়াৰ সৃষ্টি কৰিছে। কিছুমানে ইয়াক পেলেষ্টাইনৰ জনসাধাৰণৰ প্ৰতি সংহতিৰ প্ৰকাশ বুলি গণ্য কৰিছে, আন কিছুমানে আশংকা কৰিছে যে এই সিদ্ধান্তই আঞ্চলিক সংঘাতক আৰু জটিল কৰি তুলিব পাৰে। উল্লেখ্য যে, ফ্ৰান্সত মুছলমান জনসংখ্যাৰ শতকৰা হাৰ ইউৰোপৰ অন্যান্য দেশৰ তুলনাত তুলনামূলকভাৱে বেছি, যিয়ে এই সিদ্ধান্তৰ ৰাজনৈতিক প্ৰভাৱকো উজ্বল কৰিছে।
মেক্ৰ’নে জোৰ দি কৈছে যে তেওঁৰ এই সিদ্ধান্তৰ মূল লক্ষ্য হৈছে দুই-ৰাষ্ট্ৰৰ মাজমত দীৰ্ঘম্যাদী শান্তি প্ৰতিষ্ঠা কৰা। তেওঁ হামাছকো অৱশিষ্ট জিম্মিৰ মুক্তিৰ বাবে তৎক্ষণাৎ পদক্ষেপ গ্ৰহণৰ আহ্বান জনাইছে। তদুপৰি, তেওঁ গাজাত মানৱীয় সহায়ৰ প্ৰৱেশত দিয়া বাধা প্ৰত্যহাৰৰ বাবে আহ্বান জনাইছে ইজৰাইলক। কিয়নো আন্তৰ্জাতিক আইনৰ অধীনত ইজৰাইলৰ এই দায়িত্ব পালনৰ বাবে বাধ্য।
উল্লেখ্য যে ১৯৯৪ৰ পৰা ২০২০ চনৰ ভিতৰত ফ্ৰান্সে পেলেষ্টাইনৰ বাবে প্ৰায় ২.৭% মুঠ সাহায্য প্ৰদান কৰিছে, যিটো মুঠ ৪০ বিলিয়ন ডলাৰৰ ভিতৰত এক গুৰুত্বপূৰ্ণ অংশ। এই সিদ্ধান্তই পেলেষ্টাইনৰ বাবে ফ্ৰান্সৰ সমৰ্থনক আৰু শক্তিশালী কৰিব বুলি আশা কৰা হৈছে, যদিও ই আঞ্চলিক আৰু আন্তৰ্জাতিক স্তৰত নতুন ৰাজনৈতিক জটিলতাৰ সৃষ্টি কৰিব পাৰে বুলি আন্তৰ্জাতিক মঞ্চই শংকা প্ৰকাশ কৰিছে।
