দেশত গুৰুতৰ হৈ পাৰিছে ছাত্ৰ-ছাত্ৰীৰ মানসিক স্বাস্থ্যৰ অৱনতি! উচ্চতম ন্যায়ালয়ে প্ৰদান কৰিলে ১৫টা গুৰুত্বপূৰ্ণ নিৰ্দেশনা

ভাৰতৰ শিক্ষানুষ্ঠান সমূহত শিক্ষাৰ্থীৰ ক্ৰমবৰ্ধমান আত্মহননৰ ঘটনাৰ প্ৰতি উদ্বেগ প্ৰকাশ কৰি ভাৰতৰ উচ্চতম ন্যায়ালয়ে। আত্মহত্যাৰ দৰে ঘটনা আৰু মানসিক স্বাস্থ্যৰ প্ৰত্যাহ্বানৰ সৈতে মোকাবিলা কৰিবলৈ শুকুৰবাৰে ১৫টা অন্তৱৰ্তীকালীন নিৰ্দেশনা জাৰি কৰিছে। ন্যায়াধীশ বিক্ৰম নাথ আৰু সন্দীপ মেহতাৰ বিচাৰপীঠে বিদ্যালয়, মহাবিদ্যালয় আৰু প্ৰশিক্ষক প্ৰতিষ্ঠানৰ বাবে আত্মহত্যা প্ৰতিৰোধৰ কাঠামোত থকা বিধান আৰু নিয়ন্ত্ৰণমূলক ব্যস্থাৰ অনুপস্থিতিৰ ওপৰত আলোকপাত কৰে।

উল্লেখ্য যে প্ৰশিক্ষিত পৰামৰ্শদাতা নিযুক্তি আৰু একেধৰণৰ মানসিক স্বাস্থ্য নীতি গ্ৰহণ কৰা এই নিৰ্দেশনাসমূহ আনুষ্ঠানিক আইন বা কাঠামো স্থাপন নোহোৱালৈকে বাধ্যতামূলক হৈ থাকিব বুলি উল্লেখ কৰে। অন্ধ্ৰ প্ৰদেশ উচ্চ ন্যায়ালয়ৰ ৰায়ৰ বিৰুদ্ধে আবেদনৰ পিছতে বিশাখাপট্টনমত ১৭ বছৰীয়া NEET আকাংক্ষী শিক্ষৰ্থীৰ সন্দেহজনক মৃত্যুৰ তদন্তৰ বাবে কেন্দ্ৰীয় তদন্তকাৰী ব্যুৰো (চিবিআই)ক নিৰ্দেশ প্ৰদান কৰিছে।

এই নিৰ্দেশনাৰ জড়িয়তে সকলো শিক্ষানুষ্ঠানকে কেন্দ্ৰীয় শিক্ষা মন্ত্ৰালয়ৰ ইউএমএমইইডিৰ খচৰা নিৰ্দেশনা, মনোদৰ্পণৰ পদক্ষেপ আৰু ৰাষ্ট্ৰীয় আত্মহত্যা প্ৰতিৰোধ কৌশলৰ ভিত্তিত এক একেধৰণৰ মানসিক স্বাস্থ্য নীতি গ্ৰহণ কৰিবলৈ নিৰ্দেশ দিছে।

নিৰ্দেশ অনুসৰি প্ৰতিষ্ঠানসমূহে এই নীতি বছৰি পৰ্যালোচনা কৰিব লাগিব আৰু ইয়াক ৱেবছাইট আৰু জাননী ফলকত ৰাজহুৱাভাৱে প্ৰদৰ্শন কৰিব লাগিব। ১০০ জনতকৈ অধিক ছাত্ৰ-ছাত্ৰী থকা প্ৰতিষ্ঠানসমূহে শিশু আৰু কিশোৰ-কিশোৰীৰ মানসিক স্বাস্থ্যৰ প্ৰশিক্ষণপ্ৰাপ্ত যোগ্য পৰামৰ্শদাতা বা মনোবিজ্ঞানী নিযুক্তি দিব লাগিব, আনহাতে সৰু প্ৰতিষ্ঠানসমূহে বাহ্যিক পেছাদাৰী লোকলৈ ৰেফাৰেলৰ ব্যৱস্থা কৰিব লাগিব। ৰাজহুৱাভাৱে লজ্জিত কৰা, অবাস্তৱ শৈক্ষিক লক্ষ্য নিৰ্ধাৰণ বা ছাত্ৰ-ছাত্ৰীক তেওঁলোকৰ প্ৰদৰ্শনৰ ওপৰত ভিত্তি কৰি গোট খোৱা আদি ক্ষতিকাৰক প্ৰথাৰ পৰা আঁতৰি থাকিবলৈও আদালতে নিৰ্দেশ দিয়ে, যিয়ে মানসিক স্বাস্থ্যৰ ক্ষতি কৰিব পাৰে।

অতিৰিক্ত ব্যৱস্থাসমূহৰ ভিতৰত আছে শিক্ষক আৰু অশিক্ষক কৰ্মচাৰীৰ বাবে বছৰত দুবাৰকৈ বাধ্যতামূলক মানসিক স্বাস্থ্য প্ৰশিক্ষণ আৰু আৱাসিক প্ৰতিষ্ঠানত সুৰক্ষাৰ সাৱধানতা, যেনে টেম্পাৰ-প্ৰুফ চিলিং ফেন আৰু ছাদৰ ওপৰৰ দৰে উচ্চ বিপদজনক অঞ্চলত নিষিদ্ধ প্ৰৱেশ। কোটা, দিল্লী, হায়দৰাবাদৰ দৰে চহৰৰ কোচিং চেণ্টাৰসমূহে মানসিক স্বাস্থ্যৰ সুৰক্ষাৰ বৰ্ধিত ব্যৱস্থা ৰূপায়ণ কৰিব লাগিব।

এই নিৰ্দেশনাসমূহ সকলো চৰকাৰী আৰু ব্যক্তিগত বিদ্যালয়, মহাবিদ্যালয়, বিশ্ববিদ্যালয় আৰু প্ৰশিক্ষণ কেন্দ্ৰৰ বাবে প্ৰযোজ্য হ’ব বুলি সদৰী কৰিছে ন্যায়ালয়ে।