খালী হৈ আছে উচ্চ শিক্ষাৰ সংৰক্ষিত শিতানত আবণ্টিত অধ্যাপক পদ। সংসদত এই কথা স্বীকাৰ কৰিছে কেন্দ্ৰই। সংৰক্ষিত শিতানৰ তুলনাত সাধাৰণ শ্ৰেণীৰ পৰা প্ৰাৰ্থীৰ নিযুক্তি বহু বেছি হ’লেও অ’বিচি, দলিত আৰু জনজাতীয়ৰ ক্ষেত্ৰত ভালেমান পদ এতিয়াও খালী হৈয়েই আছ।
উল্লেখ্য যে ২০০৬ চনৰ সংসদীয় আইনৰ দ্বাৰা এই পদসমূহ পূৰণ কৰাটো বাধ্যতামূলক আছিল। কিন্তু এতিয়া ছবিখন যেন সম্পূৰ্ণ বেলেগ।
উদাহৰণস্বৰূপে অধ্যাপকৰ ক্ষেত্ৰত অ’বিচি শিতানৰ ৪২৩টা অনুমোদিত পদৰ ভিতৰত মাত্ৰ ৮৪টা পদহে পূৰণ হৈছে। অৰ্থাৎ ৮০ শতাংশ পদ এতিয়াও খালী হৈ আছে।
আনহাতে দলিত (SC)ৰ ক্ষেত্ৰত বিগত পাঁচ বছৰত ৩০৮টা অনুমোদিত পদৰ ভিতৰত মাত্ৰ ১১১টা পদহে পূৰণ হৈছে। এতিয়াও ৬৪ শতাংশ পদ বাকী আছে।
ইফালে জনজাতি সম্প্ৰদায়ৰ ১৪৪টা পদৰ ভিতৰত মাত্ৰ ২৪টা পদহে পূৰণ হৈছে। এতিয়াও ৮৩ শতাংশ পদ পূৰণ হোৱা নাই।
আনহাতে, সাধাৰণ শাখাত অনুমোদিত ১৫৩৮টা পদৰ ভিতৰত ৯৩৫টা পদ পূৰণ হৈছে। অৰ্থাৎ ৩৯ শতাংশ পদহে খালী আছে।
সহযোগী অধ্যাপকৰ ক্ষেত্ৰত এছ টি শিতানৰ বাবে অনুমোদিত পদৰ প্ৰায় ৬৫ শতাংশ খালী। ৩০৭টা পদৰ ভিতৰত ১০৮টা পদহে পূৰণ হৈছে।
অ’বিচি শিতানত ৬৯ শতাংশ পদ খালী ৮৮৩ টাৰ ভিতৰত ২৭৫ টা পূৰণ কৰা হৈছে।
অনুসূচিত জাতি(দলিত)ৰ ক্ষেত্ৰত ৫১ শতাংশ খালী পদ আছে। ৬৩২টা পদৰ ভিতৰত ৩০৮টা পদ পূৰণ হৈছে।
সাধাৰণ শ্ৰেণীত ১৬ শতাংশ পদ খালী। ৩০১৩টা পদৰ ভিতৰত ২৫৩৩টা পদ পূৰণ হৈছে।
সহকাৰী অধ্যাপকৰ ক্ষেত্ৰত খালী পদ সৰ্বনিম্ন। অ’বিচি শিতানত ২৩ শতাংশ (২৩৮২ৰ ভিতৰত ১৮৩৮টা), এছটিৰ ১৫ শতাংশ (৭০৪ৰ ভিতৰত ৫৯৫টা পূৰণ কৰা) আৰু এছচি শিতানত ১৪ শতাংশ (১৩৭০ৰ ভিতৰত ১১৮০টা পূৰণ কৰা হৈছে)।
উল্লেখ্য যে ৰাষ্ট্ৰীয় জনতা দলৰ অধ্যাপক সাংসদ মনোজ কুমাৰ ঝাই ৰাজ্যসভাক বিগত পাঁচ বছৰৰ অনুমোদিত অধ্যাপক পদ আৰু খালী পদৰ তথ্য জানিবলৈ অনুৰোধ কৰিছিল। এই তথ্য কেন্দ্ৰীয় শিক্ষা ৰাজ্য মন্ত্ৰী সুকান্ত মজুমদাৰে সেই প্ৰশ্নৰ লিখিত উত্তৰত দিছে।
