‘ছিৰিয়েল কিলাৰ’ শব্দটোৰ অৰ্থ এতিয়া প্ৰায় সকলোৱে জানে। ইজনৰ পিছত সিজনক হত্যা কৰা যি হত্যাকাৰী। এনে চৰিত্ৰৰ কথা শুনিলেই ভয়ংকৰ চেহেৰাৰ বিকাৰগ্ৰস্ত মানুহৰ কথাই মনলৈ আহে। কিন্তু বহুতে ভাবিব পৰা নাছিল যে টকাৰ লোভত এগৰাকী সাধাৰণ গৃহিণী ইমান ভয়ানক হৈ উঠিব পাৰে। এজন বা দুজন নহয়, ছিৰিয়েল কিলাৰ এই মহিলাৰ হাতত প্ৰাণ হেৰুৱালে ১১ জনে। ইৰাণত সংঘটিত হৈছে এই ঘটনা।
অভিযুক্ত মহিলাগৰাকীৰ নাম কলছুম আখবাৰী। কিন্তু ভয়ংকৰ কাণ্ডৰ বাবে তেওঁক ‘ব্লেক উইডো’ বুলি অভিহিত কৰা হৈছে। তদন্তকাৰীয়ে অভিযোগ কৰিছে যে যোৱা ২২ বছৰত ১১ জন প্ৰাক্তন স্বামীক হত্যা কৰিছে। ১২ নং স্বামীক হত্যা কৰিবলৈ চেষ্টা কৰিছিল যদিও শেষত বিফল হয়। আৰু তেনেকৈয়ে ধৰা পৰে মহিলাগৰাকী। তদন্তকাৰীৰ মতে এইটো দেশৰ ইতিহাসৰ অন্যতম জটিল ধাৰাবাহিক হত্যাকাণ্ড।
আৰক্ষীৰ চাৰ্জশ্বীটত দাবী কৰা হৈছে যে ৫৭ বছৰীয়া আখবাৰীয়ে ২০০০ চনৰ পৰাই বয়সস্থ পুৰুষক বিয়া কৰাইছিল। বিবাহৰ কেইদিনমান পিছত গোপনে হত্যা কৰিছিল, যাতে সম্পত্তি আৰু যৌতুকৰ ধন কাঢ়ি ল’ব পাৰে।
অভিযোগ অনুসৰি ২০২৩ চনৰ ছেপ্টেম্বৰ মাহত শেষ স্বামী আজিজুল্লা বাবাইক হত্যা কৰাৰ পৰিকল্পনা কৰিছিল। কাকতলীয়াভাৱে সেই সময়ত পৰিয়ালৰ এজন বন্ধুৱে তেওঁলোকক জনাইছিল যে অভিযুক্ত মহিলাগৰাকীৰ প্ৰাক্তন স্বামীৰ সৈতে ইয়াৰ পূৰ্বেও এনে ঘটনা সংঘটিত হৈছিল। এই খবৰ পোৱাৰ পিছত আনুষ্ঠানিক তদন্ত আৰম্ভ কৰা হয়। ইয়াৰ ফলত কলছুমৰ অতীতৰ অপৰাধৰ এক দীঘলীয়া তালিকা উন্মোচিত হ’ল।
কলছুমে হত্যা কৰা এজন লোকৰ কন্যাই আদালতত কয় যে কলছুমে মৃত্যুক স্বাভাৱিক যেন লগাবলৈ পানীয়ৰ লগত হৃদৰোগৰ ঔষধ মিহলাইছিল। তদুপৰি মৃতকৰ পত্নীক সন্দেহ কৰাটো আৰক্ষীৰ বাবে কঠিন হৈছিল। ফলত সেই সময়ত আৰক্ষীয়ে হত্যাৰ প্ৰমাণ বিচাৰি নাপালে।
সমগ্ৰ বিষয়টো পোহৰলৈ অহাৰ লগে লগে ভুক্তভোগী পৰিয়ালে কলছুমৰ মৃত্যুদণ্ডৰ দাবী উত্থাপন কৰে। এই সকলোবোৰৰ মাজতো অভিযুক্ত মহিলাগৰাকীয়ে নিজৰ দোষ স্বীকাৰ কৰিবলৈ অস্বীকাৰ কৰে।
আখবাৰীৰ অধিবক্তাই দাবী কৰিছে যে আখবাৰী মানসিকভাৱে অসুস্থ। আনকি তেওঁ মানসিক স্বাস্থ্য পৰীক্ষাৰ বাবেও অনুৰোধ জনাইছে। কিন্তু ইয়াৰে এজন ভুক্তভোগীৰ উত্তৰাধিকাৰীয়ে এই দাবী মানি ল’বলৈ অনিচ্ছুক। তেওঁ সংবাদ মাধ্যমৰ আগত কয়, “এজন মানসিক ৰোগীয়ে ইমান নিখুঁত পৰিকল্পনাৰে ইমান মানুহক হত্যা কৰাটো সম্ভৱ নহয়।”
অৱশেষত দীৰ্ঘদিনীয়া তদন্তৰ অন্তত এই মাহতে আৰম্ভ হ’ল বিচাৰ। কিন্তু ইয়াৰ মাজতে আন এক বিতৰ্কৰ সৃষ্টি হৈছে। যিমানেই পলম হয় সিমানেই ক্ষতিগ্ৰস্ত পৰিয়ালবোৰৰ ক্ষোভ বাঢ়িছে। কাৰণ এই মৰ্মান্তিক গোচৰটোক লৈ ছ’চিয়েল মিডিয়াত ব্যাপ চৰ্চা চলিছে।
