উত্তৰ প্ৰদেশ বিধানসভাৰ আগন্তুক বাৰিষা অধিৱেশনৰ পূৰ্বে মুখ্যমন্ত্ৰী যোগী আদিত্যনাথে ডাঙৰ ঘোষণা কৰে। সোমবাৰে সাংবাদিকৰ সৈতে হোৱা এক সাক্ষাৎকাৰত তেওঁ কয় যে ৰাজ্যখনৰ উন্নয়নৰ বাবে চৰকাৰে ২৫ বছৰীয়া কাৰ্য্য পৰিকল্পনা দাখিল কৰিব। তেওঁ এই পৰিকল্পনাক ‘উন্নত উত্তৰ প্ৰদেশ’ৰ বাবে এক মাইলৰ খুঁটি বুলি অভিহিত কৰে।
প্ৰধানমন্ত্ৰীৰ ‘উন্নত ভাৰত’ৰ ধাৰণাৰে অনুপ্ৰাণিত হৈ যোগী চৰকাৰে এই পৰিকল্পনা প্ৰস্তুত কৰিছে। ইয়াৰ দ্বাৰা উত্তৰ প্ৰদেশক আত্মনিৰ্ভৰশীল আৰু উন্নত ৰাজ্য হোৱাৰ দিশত আগুৱাই নিব বুলি ধাৰণা কৰা হৈছে। নীতি আয়োগ আৰু বিশেষজ্ঞৰ সহায়ত এই পৰিকল্পনা বা ৰোড মেপ প্ৰস্তুত কৰা হৈছিল। আনকি সমাজৰ সকলো শ্ৰেণীৰ লোকৰ মতামতও লোৱা হৈছিল।
১৩ আৰু ১৪ আগষ্টত বিধানসভাত ২৪ ঘণ্টা ধৰি ধাৰাবাহিকভাৱে আলোচনা কৰা হ’ব এই ৰোড মেপ।যোগী আদিত্যনাথে কয় যে এই সিদ্ধান্ত সকলো পক্ষৰ সন্মতি সাপেক্ষে লোৱা হৈছে। এই পৰিকল্পনাত সাধাৰণ ৰাইজৰ মতামতকো গুৰুত্ব দিয়া হ’ব। তেওঁ দৃঢ়তাৰে কয় যে ২০৪৭ চনত যেতিয়া ভাৰত এখন উন্নত দেশ হ’ব, তেতিয়া উত্তৰ প্ৰদেশেও দেশ আৰু বিশ্বৰ সন্মুখত ‘উন্নত উত্তৰ প্ৰদেশ’ হিচাপে থিয় দিব।
অধিৱেশনৰ সময়ত সাধাৰণ ৰাইজৰ হৈ যিকোনো ব্যক্তিয়ে চৰকাৰক যিকোনো প্ৰশ্ন সুধিব পাৰে। চৰকাৰৰ হৈ সকলো প্ৰশ্নৰ উত্তৰ দিবলৈ বাধ্য হ’ব বুলি যোগীয়ে কয়। লগতে জিৰ’ আৱাৰত বিভিন্ন গুৰুত্বপূৰ্ণ বিষয়ৰ ওপৰত আলোচনা অনুষ্ঠিত হ’ব। সকলো প্ৰশ্নৰ উত্তৰ দিবলৈ সাজু চৰকাৰ আৰু গঠনমূলক সমালোচনাক আদৰণি জনাইছে। যোগী আদিত্যনাথে উত্তৰ প্ৰদেশৰ সকলো দলকে ইতিবাচক মনোভাৱেৰে আলোচনাত অংশগ্ৰহণ কৰি ৰাজ্যখনৰ উন্নয়নত অৰিহণা যোগাবলৈ আহ্বান জনায়।
