গুৱাহাটীত ইণ্ডিয়ান ইনষ্টিটিউট অৱ মেনেজমেণ্ট (আই আই এম) স্থাপনৰ বিধেয়কত অনুমোদন জনাইছে কেন্দ্ৰীয় কেবিনেটে। কেবিনেটে ঘোষণা কৰা এই প্রতিষ্ঠান, ২০০৭ চনত স্থাপিত আই আই এম শ্বিলঙৰ পাছত উত্তৰ-পূর্বাঞ্চলৰ দ্বিতীয়টো আৰু দেশৰ ভিতৰতে ২২তম প্রতিষ্ঠান হিচাপে পৰিগণিত হ’ব৷ জ্যেষ্ঠ বিষয়াসকলৰ মতে, চৰকাৰে এই প্ৰকল্পৰ বাবে ৫০০ কোটিৰো অধিক টকাৰ প্ৰতিশ্ৰুতি প্ৰদান কৰিছে। পৰিচালনা শিক্ষাৰ উন্নতি, উদ্যোগীকৰণক প্ৰসাৰিত কৰা আৰু অঞ্চলটোৰ অৰ্থনৈতিক বিকাশত সহায় কৰাৰ লক্ষ্যৰে পদক্ষেপ গ্ৰহণ কৰা হৈছে বুলি উল্লেখ কৰিছে।
নতুন আই আই এমৰ জৰিয়তে উত্তৰ-পূৰ্বাঞ্চলত গুণগত ব্যৱস্থাপনা কাৰ্যসূচী আৰু গৱেষণাৰ দীৰ্ঘদিনীয়া প্ৰয়োজনীয়তা পূৰণ কৰাৰ লগতে সমগ্ৰ ভাৰতৰ ছাত্ৰ-ছাত্ৰীক আকৰ্ষণ কৰা হ’ব। ইতিমধ্যে গুৱাহাটীৰ আই আই টি গুৱাহাটী, ৰাষ্ট্ৰীয় আইন বিশ্ববিদ্যালয় আৰু ন্যায়িক একাডেমীৰ দৰে শিক্ষানুষ্ঠান, চাংসাৰীত এইমছৰ দৰে শিক্ষানুষ্ঠান থকা শিক্ষা কেন্দ্ৰ হিচাপে গুৱাহাটীৰ ভূমিকা আৰু অধিক শক্তিশালী কৰিব। বিষয়াসকলে জোৰ দি কয় যে প্ৰতিষ্ঠানটোৱে প্ৰতিভাৰ প্ৰবাহ বৃদ্ধি কৰিব, নিয়োগযোগ্যতা বৃদ্ধি কৰাৰ লগতে আঞ্চলিক আৰু ৰাষ্ট্ৰীয় উন্নয়নৰ মূল ক্ষেত্ৰসমূহক সমৰ্থন কৰিব বুলি আশা প্ৰকাশ কৰিছে। উল্লেখনীয় যে চলিত গ্ৰীষ্মকালীন অধিৱেশনৰ সময়তে সংসদত বিধেয়কখন উত্থাপন কৰা হ’ব বুলি সদৰী কৰিছে।
