বাহিৰলৈ ওলাই গ’লে অন্তৰ্বাস বা ব্ৰা পিন্ধাৰ প্ৰয়োজনীয়তা আহি পৰে। কিন্তু কিছুমান মানুহে ভাবে যে অন্তৰ্বাস বা ব্ৰা যেতিয়া গোটেই দিনটো পিন্ধা যায় তেতিয়া স্তনত বিষাক্ত পদাৰ্থ আবদ্ধ হৈ পৰে। বহুতে কয় যে টান ব্ৰা বা ভুল আকাৰৰ ব্ৰা পিন্ধিলে স্তন কেন্সাৰ হোৱাৰ সম্ভাৱনা বৃদ্ধি পায়। সঁচাকৈয়ে এনেকুৱা হ’ব পাৰেনে?
চিকিৎসকৰ মতে কোনো ধৰণৰ কাপোৰে কেন্সাৰ ৰোগত সৃষ্টি কৰিব নোৱাৰে। ইয়াৰ লগত অন্তৰ্বাসৰ কোনো সম্পৰ্ক নাই।
২০১৪ চনত ৱাশ্বিংটনৰ ফ্ৰেড হাচিনছন কেন্সাৰ চেণ্টাৰত এই বিষয়ে এক অধ্যয়ন কৰা হৈছিল। ১৫০০ মহিলাক পৰীক্ষা কৰাৰ পিছত গৱেষকসকলে এই সিদ্ধান্তত উপনীত হয় যে ব্ৰা পিন্ধাৰ কেন্সাৰৰ লগত কোনো সম্পৰ্ক নাই। ব্ৰা পিন্ধাৰ আকাৰ, প্ৰকাৰ আৰু সময়ৰো কোনো সম্পৰ্ক নাই।
এটা ভুল ধাৰণা আচলতে বহুদিনৰ পৰাই চলি আহিছে। অৱশ্যে ইয়াৰ উৎপত্তি এখন কিতাপৰ পৰাই হৈছিল। ১৯৯৫ চনত প্ৰকাশিত ‘ড্ৰেছড টু কিল’ নামৰ গ্ৰন্থখনত লিখা আছিল যে অন্তৰ্বাস বা ব্ৰাই স্তনৰ লিম্ফেটিক প্ৰবাহ বন্ধ কৰি দিয়ে। আৰু ফলত স্তন কেন্সাৰ হয়। কিন্তু ইয়াৰ কোনো বৈজ্ঞানিক ভিত্তি বিচাৰি নাপালে চিকিৎসকে। আৰু সময়ৰ লগে লগে এই ভুৱা তথ্য মুখে মুখে বাগৰি পৰিল।
