মনু ভাকৰৰ পদক জয়ৰ ধাৰা অব্যাহত আছে। কাজাখস্তানত অনুষ্ঠিত এছিয়ান শ্বুটিং চেম্পিয়নশ্বিপত ১০ মিটাৰ এয়াৰ পিষ্টল ইভেণ্টত ব্ৰঞ্জৰ পদক লাভ কৰে। এইবাৰৰ এছিয়ান শ্বুটিং টুৰ্ণামেণ্টত ভাৰতৰ এয়া নৱম পদক। মন কৰিবলগীয়া যে, ১৪৪ বছৰৰ ইতিহাস ভংগ কৰি অলিম্পিকত দুটাকৈ পদক লাভ কৰা প্ৰথমগৰাকী ভাৰতীয় হিচাপে পৰিগণিত হৈছিল মনু।
মনুৰ ইভেণ্টত ভাৰতীয় সতীৰ্থ সুৰুচি সিং আৰু পলকে ফাইনেলত প্ৰৱেশ কৰিব নোৱাৰিলে। কিন্তু মনুৱে লক্ষ্যত স্পৰ্শ কৰাত এক ভুল কৰা নাছিল। যদিও চীনৰ কিয়াংকে মায়ে ২৪৩.২ স্ক’ৰেৰে সোণৰ পদক লাভ কৰে। আনহাতে, কোৰিয়াৰ জিন ইয়াঙে ৰূপৰ পদক লাভ কৰে। মনুৱে ২১৯.৭ পইণ্টত ৰৈ যায়। ইয়াৰ পূৰ্বে মানুৱে অৰ্হতা ৰাউণ্ডত ৫৮৪ পইণ্ট লাভ কৰি ফাইনেলত প্ৰৱেশ কৰে। ৫৭৪ পইণ্টেৰে দ্বাদশ স্থান দখল কৰে সুৰুচিয়ে। ৫৭৩ পইণ্টেৰে ১৭ নম্বৰ স্থান দখল কৰে পালাকে। দলীয় ইভেণ্টত মনু, সুৰুচি আৰু পালাকে ১৭৩০ পইণ্টেৰে তৃতীয় স্থান দখল কৰে।
যোৱা বছৰ অলিম্পিকত এযোৰ ব্ৰঞ্জৰ পদক লাভ কৰাৰ পাছৰে পৰা মনুই যথেষ্ট ফৰ্মত আছে। চলিত বৰ্ষৰ এপ্ৰিল মাহত লিমা লীগত ১০ মিটাৰ এয়াৰ পিষ্টলত ৰূপৰ পদক লাভ কৰিছিল। অৱশ্যে জুন মাহত অনুষ্ঠিত মিউনিখ বিশ্বকাপত ২৫ মিটাৰ পিষ্টল ইভেণ্টত মনুৱে ষষ্ঠ স্থান দখল কৰিছিল।
আনহাতে, ১০ মিটাৰ এয়াৰ পিষ্টল ইভেণ্টৰ প্ৰথম দিনাই ভাৰতীয় পুৰুষৰ দলটোৱে ৰূপৰ পদক লাভ কৰে। আনমোল জৈনে (৫৮০), আদিত্য মালৰা (৫৭৯) আৰু এছিয়ান গেমছৰ স্বৰ্ণ পদক বিজয়ী সৌৰভ চৌধুৰীয়ে (৫৭৬) মিলি ১৭৩৫ পইণ্ট কৰি চীনৰ ঠিক পিছতে ১৭৪৪ পইণ্ট কৰে। ব্যক্তিগত ইভেণ্টত আনমোলে ফাইনেলত প্ৰৱেশ কৰিলেও সপ্তম স্থান দখল কৰে।
