ৰাজা ৰঘুবংশী হত্যাকাণ্ডৰ গোচৰত মেঘালয় আৰক্ষীৰ বিশেষ তদন্তকাৰী দলে ৭৯০ পৃষ্ঠাৰ অভিযোগনামা দাখিল কৰি পত্নী সোণম ৰঘুবংশী, প্ৰেমিক ৰাজ কুশৱাহা আৰু আন তিনিজনৰ বিৰুদ্ধে হত্যাৰ অভিযোগ উত্থাপন কৰিছে।
চোহৰা মহকুমাৰ প্ৰথম শ্ৰেণীৰ ন্যায়িক দণ্ডাধীশৰ আদালতত দাখিল কৰা হৈছে অভিযোগনামা।
পাঁচোজন অভিযুক্ত—সোনম, ৰাজ কুশৱাহা, আকাশ ৰাজপুত, আনন্দ কুৰ্মি, আৰু বিশাল সিং চৌহানক গ্ৰেপ্তাৰ কৰা হৈছে আৰু বৰ্তমান ন্যায়িক জিম্মাত আছে। ভাৰতীয় ন্যায় সংহিতাৰ অধীনত হত্যাৰ ১০৩(১) ধাৰা, প্ৰমাণ নোহোৱা কৰাৰ ২৩৮(ক) আৰু অপৰাধমূলক ষড়যন্ত্ৰৰ ৬১(২) ধাৰাত অভিযোগ উত্থাপন হৈছে।
পূব খাছী পাহাৰৰ আৰক্ষী অধীক্ষক বিবেক ছিয়েমে কয় যে অতিৰিক্ত ফৰেনছিক প্ৰতিবেদন উপলব্ধ হ’লে আৰু তিনিজন সহ-অভিযুক্ত সম্পত্তিৰ ব্যৱসায়ী চাইলোম জেমছ, বিল্ডিঙৰ মালিক লোকেন্দ্ৰ টোমৰ আৰু নিৰাপত্তাৰক্ষী বলবীৰ আহিৰবাৰৰ বিৰুদ্ধে পৰিপূৰক অভিযোগনামা দাখিল কৰা হ’ব। পূৰ্বে প্ৰমাণ ধ্বংস আৰু লুকুৱাই ৰখাৰ অভিযোগত গ্ৰেপ্তাৰ কৰা এই তিনিজনক বৰ্তমান জামিনত মুকলি কৰি দিয়া হৈছে।
ইন্দোৰৰ ২৯ বছৰীয়া ৰাজা আৰু ২৪ বছৰীয়া সোণম দুয়োজনেই মেঘালয়ত হানিমুনৰ সময়ত সন্ধানহীন হৈ পৰাৰ পিছতে প্ৰথম অৱস্থাত এই গোচৰটো “সন্ধানহীন দম্পতী”ৰ ঘটনা হিচাপে আৰম্ভ হৈছিল। পৰিয়ালৰ ব্যৱসায়ৰ একাউণ্টেণ্ট ৰাজ কুশৱাহাৰ সৈতে সোণমৰ সম্পৰ্ক অব্যাহত থকাৰ পিছতো ১১ মে’ত বিবাহপাশত আবদ্ধ হৈছিল দম্পতীহাল।
২৩ মে’ত ৰাজাৰ মৃতদেহ উদ্ধাৰ হোৱা ঠাইৰ পৰা প্ৰায় ২০ কিলোমিটাৰ দূৰত্বত থকা নংগ্ৰিয়াট গাঁৱৰ এটা হোমষ্টেৰ পৰা চেক আউট কৰাৰ পিছত ২৩ মে’ত নিৰুদ্দেশ হৈছিল ৰাজা আৰু সোণম।
উত্তৰ প্ৰদেশ আৰু মধ্যপ্ৰদেশৰ পৰা তেওঁৰ তিনিজন সহযোগী আকাশ, বিশাল আৰু আনন্দক গ্ৰেপ্তাৰ কৰাৰ কিছু সময়ৰ পিছতে ৮ জুনত উত্তৰ প্ৰদেশৰ গাজীপুৰত সোণম ওলাই আহি নন্দগঞ্জ থানাত আত্মসমৰ্পণ কৰে। পিছত ৰাজ কুশৱাহাক গ্ৰেপ্তাৰ কৰা হয়।
১১ জুনত সোণমে স্বামীক হত্যা কৰাৰ কথা স্বীকাৰ কৰা বুলি জানিব পৰা গৈছে। এই সন্দৰ্ভত ভাষ্য দি সোণমৰ ভাতৃ গোবিন্দই কয় যে পৰিয়ালটোৱে তেওঁৰ সৈতে সকলো সম্পৰ্ক বিচ্ছিন্ন কৰিছে আৰু ন্যায়ৰ সন্ধানত ৰাজাৰ পৰিয়ালক সমৰ্থন প্ৰকাশ কৰিছে।
বিশ্বাসঘাতকতা আৰু পূৰ্ব পৰিকল্পিত অপৰাধৰ জৰিয়তে দেশক স্তম্ভিত কৰা এই গোচৰটো অব্যাহত আছে কাৰণ এছ আই টিয়ে অভিযুক্ত বাকী থকাসকলৰ বিৰুদ্ধেও অতিৰিক্ত অভিযোগ প্ৰস্তুত কৰি আছে।
