কাৰোবাৰ বয়স বাঢ়িছে, কোনোবাই নাম সলনি কৰিছে, কোনোবাই ঠিকনা সলনি কৰিছে! বিশেষ ভোট পুনৰীক্ষণৰ সময়ত বিহাৰত ভোটাৰ তালিকাৰ খচৰা সন্দৰ্ভত এনে অভিযোগ পোহৰলৈ আহিছে।
ইতিমধ্যে খচৰা তালিকাখন দেখি মোহনপুৰ গাঁৱৰ ৰাইজে ভ্ৰু কোঁচাইছে। মুজাফ্ফৰপুৰৰ এই গাঁওখনৰ ১০০ শতাংশ বাসিন্দা হিন্দু। খচৰা তালিকাত দেখা গৈছে যে গাঁওখনত কমেও ১০০জন মুছলমান ভোটাৰ আছে। এনে অভিযোগে গাঁওখনত উত্তেজনা বিয়পাইছে।
বিহাৰত নিৰ্বাচনৰ পূৰ্বে SIRক লৈ ব্যাপক বিতৰ্কৰ সৃষ্টি হৈছে। উচ্চতম ন্যায়ালয়ত গোচৰ ৰুজু কৰা হৈছে। ইফালে খচৰা তালিকাত বিভিন্ন ভুলৰ অভিযোগে বিতৰ্ক আৰু অধিক বৃদ্ধি কৰিছে। এই পৰিবেশত মোহনপুৰে বাতৰিৰ শিৰোনাম দখল কৰিছে।
ইয়াৰ কাটেছাৰ পঞ্চায়তৰ ৬ নং ৱাৰ্ডৰ আটাইকেইটা ঘৰতে হিন্দু পৰিয়ালে বসবাস কৰে। যদিও ইয়াত খচৰা তালিকাত ৩৭, ৩৮ আৰু ৩৯ নম্বৰ ঘৰৰ ঠিকনা ১৫ জন মুছলমান ভোটাৰৰ। ইয়াৰ ব্যতিক্ৰম নহয় ৩০ নম্বৰ ঘৰ। এই ঘৰৰ বাসিন্দা কামেশ্বৰ ঠাকুৰে অভিযোগ কৰে, ‘আমাৰ পৰিয়ালত ৬ জন সদস্য আছে। কিন্তু খচৰা তালিকাত ৰোশন খাতুন আৰু মহম্মদ ছাবিৰ নামৰ দুজন ভোটাৰ আছে। যাৰ ঠিকনা আমাৰ ঘৰ।’
আন বহুতৰে অভিযোগ একেধৰণৰ। স্থানীয় ৰাইজৰ অভিযোগ যে গাঁৱৰ সকলোৱে হিন্দু। কিন্তু খচৰা ভোটাৰ তালিকাত এই গাঁওখন কমেও ১০০ মুছলমানৰ ঠিকনা হৈ পৰিছে। গাঁৱৰ ৰাইজে বিষয়টো সাধাৰণ ভুল বুলি মানি ল’বলৈ অনিচ্ছুক। ইয়াৰ আঁৰত ৰাজনৈতিক ষড়যন্ত্ৰ দেখা পাইছে। অভিযোগ উত্থাপন হৈছে যে স্থানীয় প্ৰশাসনে কাৰ্যতঃ বিষয়টোক আওকাণ কৰিছে। বিষয়টোৰ তদন্ত চলি থকা বুলি আয়োগে অৱগত কৰিছে।
