ভাৰতৰ বন্ধু দেশ চৌদি আৰবৰ সৈতে প্ৰতিৰক্ষা চুক্তি স্বাক্ষৰ কৰিলে পাকিস্তানে। ইয়াৰ পিছত নতুন দিল্লীয়ে এই সন্দৰ্ভত এক বিবৃতি প্ৰকাশ কৰি বৃহস্পতিবাৰে পুৱা ভাৰতৰ বৈদেশিক মন্ত্ৰালয়ে কয় যে চুক্তিখনৰ প্ৰভাৱ পৰীক্ষা কৰা হ’ব। মন্ত্ৰালয়ৰ মুখপাত্ৰ ৰণধীৰ জয়ছৱালে কয় যে ভাৰত ইয়াৰ বিষয়ে অৱগত আৰু বিষয়টো পৰ্যালোচনা কৰা হৈছে। তেওঁ উল্লেখ কৰে যে চুক্তি পুনৰীক্ষণৰ সময়ত ভাৰতৰ জাতীয় স্বাৰ্থ আৰু আন্তঃৰাষ্ট্ৰীয় স্থিতিশীলতাৰ প্ৰতি লক্ষ্য ৰখা হ’ব।
বুধবাৰে পাকিস্তানৰ প্ৰধানমন্ত্ৰী শ্বাহবাজ শ্বৰীফে চৌদি আৰবৰ ক্ৰাউন প্ৰিন্স মহম্মদ বিন ছালমানৰ সৈতে সাক্ষাত কৰে। ইয়াৰ পিছত দুয়োখন দেশে ‘কৌশল আৰু পাৰস্পৰিক প্ৰতিৰক্ষা চুক্তি‘ স্বাক্ষৰ কৰে। এ এফ পিৰ প্ৰতিবেদন অনুসৰি ৰিয়াদৰ পৰা প্ৰকাশিত বিবৃতিত কোৱা হৈছে যে যদি পাকিস্তান বা চৌদি আৰবত আন এখন দেশে আক্ৰমণ কৰে তেন্তে ইয়াক দুয়োখন দেশৰ ওপৰত আক্ৰমণ হিচাপে গণ্য কৰা হ’ব। এই চুক্তিয়ে দুয়োখন দেশৰ মাজত সামৰিক সহযোগিতা বৃদ্ধি কৰিব।
পেহেলগামত সন্ত্ৰাসবাদী আক্ৰমণৰ পিছত ভাৰতে পাকিস্তানৰ মাটিত অৱস্থিত সন্ত্ৰাসবাদী শিবিৰৰ বিৰুদ্ধে ‘অপাৰেচন সিন্দুৰ’ নামৰ সামৰিক অভিযান আৰম্ভ কৰিছিল। ইয়াৰ ফলত ভাৰত-পাকিস্তানৰ মাজত চাৰিদিনীয়া সংঘাত হৈছিল। নতুন দিল্লীয়ে স্পষ্ট কৰি দিছে যে ইছলামাবাদে ভাৰতৰ বিৰুদ্ধে সন্ত্ৰাসবাদ সমৰ্থন কৰিলে তীব্ৰ প্ৰতিক্ৰিয়া দেখুৱাব। এনে পৰিস্থিতিত চুক্তি অনুসৰি পাকিস্তানৰ বিৰুদ্ধে সামৰিক ব্যৱস্থা ল’লে চৌদি আৰবে ইছলামাবাদৰ সৈতে থাকিব পাৰে।
