বুধবােৰে এক ভয়ংকৰ ভূমিকম্পৰ ফলত ফিলিপাইনছৰ জনজীৱনলৈ স্থবিৰতা নামি আহিছে৷দেশখনৰ চৰকাৰী বিষয়াসকলে সংবাদ সংস্থা ৰয়টাৰক জনোৱা মতে, বুধবাৰে মধ্য ফিলিপাইনছত হোৱা ৬.৯ ৰিখটাৰ স্কেলৰ ভূমিকম্পত মৃত্যুৰ সংখ্যা ৬৯ লৈ বৃদ্ধি পাইছে আৰু ১৫০ জনতকৈ অধিক লোক আহত হৈছে।
আমেৰিকাৰ ভূতাত্ত্বিক জৰীপে (USGS) জনোৱা মতে, ভূমিকম্পৰ কেন্দ্ৰবিন্দু চেবু প্ৰদেশৰ পৰ্যটন কেন্দ্ৰৰ প্ৰায় ৯০ হাজাৰ লোকৰ উপকূলীয় চহৰ বগোৰ পৰা প্ৰায় ১৭ কিলোমিটাৰ (১০ মাইল) উত্তৰ-পূবত অৱস্থিত। এই ভূমিকম্পৰ ফলত ফিলিপাইনছৰ চহৰ আৰু গাঁৱৰ মাজত যথেষ্ট গাঁথনিগত ক্ষতিসাধন হয়।
আটাইতকৈ বেছি ক্ষতিগ্ৰস্ত অঞ্চলৰ ভিতৰত অন্যতম বগোত কমেও ১৪ জন লোকৰ মৃত্যু হৈছে। পাহাৰীয়া গাঁৱত হোৱা ভূমিস্খলনে পৰিস্থিতি অধিক ভয়াৱহ কৰি তুলিছে৷ উদ্ধাৰকাৰীসকলে বিপজ্জনক ভূখণ্ডৰ মাজেৰে আগবাঢ়ি উদ্ধাৰ অভিযান চলাওতে যথেষ্ট সংগ্ৰাম কৰিবলগীয়া হৈছে। কৰ্তৃপক্ষই জনোৱা মতে, স্থানীয় চিকিৎসালয়খনো ক্ষয়-ক্ষতিৰ বাবে অচল অৱস্থাত আছে৷
শিল আৰু মাটিৰ তলত আৱদ্ধ হৈ থকা বুলি অনুমান কৰা লোকসকলৰ সন্ধান ক্ষিপ্ৰ কৰিবলৈ কৰ্তৃপক্ষই বেকহ’কে ধৰি গধুৰ যন্ত্ৰপাতি আনি উদ্ধাৰৰ কৰাৰ কাম কৰি আছে৷
উপ-পৌৰপতি আলফি ৰেইনছে জনোৱা মতে, ওচৰৰ ছান ৰেমিজিঅ’ চহৰত তিনিজন ক’ষ্ট গাৰ্ডৰ কৰ্মী, এজন অগ্নিনিৰ্বাপক বাহিনী আৰু এটি শিশুকে ধৰি ছয়জন লোকৰ মৃত্যু হোৱা বুলি নিশ্চিত কৰা হৈছে। ডি জে এম এম ৰেডিঅ’ৰ সৈতে হোৱা কথা-বতৰাত ৰেইনছে জৰুৰী সাহাৰ্য্য সামগ্ৰীৰ বাবে আবেদন জনায়।ৰেইনছে কয় যে আমাৰ জল ব্যৱস্থাৰ ক্ষতি হৈছে, আৰু আমাৰ বাসিন্দাসকলৰ বাবে খাদ্য আৰু বিশুদ্ধ পানীৰ প্ৰয়োজন।
