আহমেদাবাদ হ’ব ২০৩০ চনৰ কমনৱেলথ গেমছৰ আয়োজক চহৰ। কমনৱেলথ স্প’ৰ্টছৰ কাৰ্যবাহী ব’ৰ্ডে ২০৩০ চনৰ কমনৱেলথ গেমছৰ আয়োজক চহৰ হিচাপে আহমেদাবাদক দিয়া পৰামৰ্শ নিশ্চিত কৰিছে। দুহেজাৰ ত্ৰিশ চনত কমনৱেলথ গেমছৰ ২৪ সংখ্যক সংস্কৰণত অন্টাৰিঅ’ত প্ৰথমবাৰৰ আৰম্ভণি হোৱা এই ক্ৰীড়া মহোৎসৱৰ ১০০ বছৰ সম্পূৰ্ণ হ’ব।
কমনৱেলথ স্প’ৰ্টছৰ এক বিবৃতিত কোৱা হৈছে যে আহমেদাবাদক এতিয়া সম্পূৰ্ণ কমনৱেলথ স্প’ৰ্টছৰ সদস্যপদ আগবঢ়োৱা হ’ব, ২০২৫ চনৰ ২৬ নৱেম্বৰত গ্লাছগোত অনুষ্ঠিত হ’বলগীয়া কমনৱেলথ স্প’ৰ্টছ সাধাৰণ পৰিষদত চূড়ান্ত সিদ্ধান্ত লোৱা হ’ব।
চলিত বৰ্ষৰ নৱেম্বৰ মাহত অনুমোদন পালে আহমেদাবাদ ২০১০ চনত নতুন দিল্লীৰ পাছত কমনৱেলথ গেমছ আয়োজন কৰা ভাৰতৰ দ্বিতীয়খন চহৰ হিচাপে পৰিগণিত হ’ব।
ভাৰতে ২০৩৬ চনত অলিম্পিক গেমছ আয়োজনৰ পূৰ্বে কমনৱেলথ গেমছ আয়োজনৰ বাবে নিবিদা আগবঢ়াইছে। নাইজেৰিয়ায়ো ২০৩০ চনত কমনৱেলথ গেমছ আয়োজনৰ বাবে নিবিদা দাখিল কৰিছিল।
উল্লেখ্য যে ২০৩০ চনৰ কমনৱেলথ গেমছত ৭২খন দেশে অংশগ্ৰহণ কৰিব।
ভাৰতে ২০২৬ চনৰ কমনৱেলথ গেমছৰ পৰা বাদ পৰা কেইবাটাও ক্ৰীড়া শিতান ঘূৰাই আনি কমনৱেলথ গেমছ আয়োজন কৰিবলৈ চেষ্টা কৰিব। দুহেজাৰ ছাব্বিছ চনৰ কমনৱেলথ গেমছৰ পৰা বাদ পৰা প্ৰধান পদক ইভেণ্টসমূহৰ ভিতৰত হকী, ক্ৰিকেট, বেডমিণ্টন, মল্লযুঁজ, টেবুল টেনিছ, ডাইভিং, ৰাগবী চেভেনছ, বিচ ভলীবল, মাউণ্টেন বাইকিং, স্কোয়াছ আৰু ৰিদমিক জিমনাষ্টিকছ অন্যতম।
