তিনিচুকীয়া জিলাৰ কাকপথাৰত বৃহস্পতিবাৰে মাজ নিশা ভাৰতীয় সেনাৰ এটা শিবিৰত অচিনাক্ত আক্ৰমণকাৰীয়ে গ্ৰেনেড নিক্ষেপ কৰাৰ লগতে নিৰ্বিচাৰে গুলীচালনা কৰি তীব্ৰ আক্ৰমণ চলাই আতংকৰ কৰে।
বাতৰি অনুসৰি, নিশা প্ৰায় ১২:৩০ বজাত সেনাবাহিনীৰ ইনষ্টলেশ্যনত তিনিটা আণ্ডাৰ বেৰেল গ্ৰেনেড লঞ্চাৰ (ইউবিজিএল) নিক্ষেপ কৰা হয়। তাৰ পিছত প্ৰায় ৩০ মিনিট ধৰি ধাৰাবাহিকভাৱে গুলীবৰ্ষণ চলোৱা হয়।
তীব্ৰ গুলীয়াগুলিৰ লগতে নিশা বিস্ফোৰণৰ শব্দই অঞ্চলটোৰ কাষৰীয়া বাসিন্দাসকলক আতংকিত কৰি তোলে।
প্ৰত্যক্ষদৰ্শীয়ে দাবী কৰা মতে আক্ৰমণকাৰীয়ে আক্ৰমণ সংঘটিত কৰাৰ পূৰ্বে এখন ট্ৰাকত উপস্থিত হৈছিল। এই কাণ্ডত সেনাবাহিনীৰ তিনিজন জোৱান আহত হোৱা বুলি জানিব পৰা গৈছে যদিও শিবিৰটোৰ ক্ষয়ক্ষতিৰ সৱিশেষ এতিয়াও আনুষ্ঠানিকভাৱে নিশ্চিত হোৱা নাই।
নিৰাপত্তা বাহিনীয়ে দ্ৰুতগতিত অঞ্চলটো ঘেৰাও কৰি সমগ্ৰ কাকপথাৰ আৰু কাষৰীয়া স্থানীয় অঞ্চলসমূহত ব্যাপক তালাচী অভিযান আৰম্ভ কৰে। কম্বিং অভিযান অব্যাহত থকাৰ বাবে সাধাৰণ নাগৰিকৰ চলাচলত বাধা আৰোপ কৰা হৈছে।
প্ৰাথমিক তদন্তই নিষিদ্ধ বিদ্ৰোহী সংগঠন আলফা (স্বাধীন) জড়িত থকাৰ সম্ভাৱনাকে দাঙি ধৰিছে। এই আক্রমণ বিগত কেইমাহমানৰ ভিতৰত উজনি অসমত সংঘটিত হোৱা অন্যতম ডাঙৰ আক্রমণ। এইটোৱে অঞ্চলটোত উগ্রপন্থী কার্যকলাপ পুনৰ সক্ৰিয় হৈ উঠাৰ ইংগিত বহন কৰে।
